សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រះសីហនុ ៖ តំបន់សេដ្ឋកិច្ចពិសេសក្រុងព្រះសីហនុ ត្រូវបានចាត់ទុកថាជាតំបន់សេដ្ឋកិច្ចដែលធំ និងទាក់ទាញការវិនិយោគពីខាងក្រៅប្រទេសយ៉ាងសំខាន់ ដោយមានក្រុមហ៊ុនជាច្រើនបានបណ្ដាក់ទុនវិនិយោគនៅក្នុងតំបន់សេដ្ឋកិច្ចពិសេសមួយនេះ ។ ជាក់ស្ដែងគិតត្រឹមខែឧសភា ២០២៥នេះ តំបន់សេដ្ឋកិច្ចពិសេសក្រុងព្រះសីហនុ មានក្រុមហ៊ុនកំពុងវិនិយោគចំនួន២០០ ផ្តល់ការងារជូនប្រជាពលរដ្ឋជាង ៣ម៉ឺននាក់ និងរំពឹងថាអាចកើនឡើងដល់ ៣០០ ទៅ ៤០០ ក្រុមហ៊ុន នៅពេលឆាប់ៗខាងមុខនេះ ។
នៅក្នុងជំនួបជាមួយលោក ស៊ូ គុនលីង អភិបាលខេត្តជាំងស៊ូ ក្នុងដំណើរទស្សនកិច្ចខេត្តព្រះសីហនុ ឯកឧត្តម ម៉ាង ស៊ីណេត អភិបាលខេត្តព្រះសីហនុបានមានប្រសាសន៍ថា រាជរដ្ឋាភិបាលបានបោះទុនវិនិយោគលើហេដ្ឋារចនាសម្ព័ន្ធជាង ៣០០លានដុល្លា កសាងផ្លូវក្នុងក្រុងព្រះសីហនុមុនកូវីដ-១៩ រួមទាំងការអនុវត្តគោលនយោបាយ (ខ្សែក្រវាត់ និងផ្លូវ) ផ្សារភ្ជាប់នឹងគោលនយោយចតុកោណ និងគោលនយោបាយបញ្ចកោណដំណាក់កាលទី១ រាជរដ្ឋាភិបាលកម្ពុជា ទន្ទឹមនោះ ក៏មានសាងសង់រូបសំណាក់តំណាងឱ្យអរិយធម៌ និងវប្បធម៌ផងដែរ ។
លោក ស៊ូ គុនលីន អភិបាលខេត្តជាំងស៊ូ នៃសាធារណរដ្ឋប្រជាមានិតចិន បានរំលឹកថា កាលពីឆ្នាំ២០២២ ខាងខេត្តជាំងស៊ូ បានទទួលស្វាគមន៍អភិបាលខេត្តព្រះសីហនុ ក្នុងដំណើរទស្សនកិច្ចនៅខេត្តជាំងស៊ូ ដែលកាលនោះតំបន់សេដ្ឋកិច្ចពិសេសក្រុងព្រះសីហនុ មានក្រុមហ៊ុនវិនិយោគចំនួន១០០ ប៉ុណ្ណោះ ប៉ុន្តែមកដល់ថ្ងៃនេះ តំបន់សេដ្ឋកិច្ចពិសេសក្រុងព្រះសីហនុ មានក្រុមហ៊ុនចំនួន២០០ឯណោះ ។
លោកបន្តថា ខេត្តជាំងស៊ូ ជាប់សមុទ្រភាគខាងកើតនៃប្រទេសចិន ប្រជាជន ៨៥លាននាក់ មានសេដ្ឋកិច្ចមានការរីកចម្រើន ហើយដំណើទស្សនកិច្ចនាពេលនេះ ក្នុងគោលបំណងអនុវត្តនូវកិច្ចសហប្រតិបត្តិការលើគម្រោងវិនិយោគតំបន់សេដ្ឋកិច្ចពិសេសក្រុងព្រះសីហនុ ព្រោះគម្រោងតំបន់សេដ្ឋកិច្ចក្រុងព្រះសីហនុ ជាគម្រោងកិច្ចសហប្រតិបត្តិការរវាងចិន និងកម្ពុជា តាមរយៈគោលនយោបាយ ខ្សែក្រវាត់ និងផ្លូវ ហើយតំបន់សេដ្ឋកិច្ចពិសេសក្រុងព្រះសីហនុ សង្ឃឹមថានឹងទទួលបានក្រុមហ៊ុនពី៣០០ ទៅ៤០០ជាមិនខាន។
លោកបានបញ្ជាក់ថា ឆ្នាំ២០២៥ គឺជាឆ្នាំផ្លាស់ប្តូរទេសចរណ៍ចិន និងកម្ពុជា ហើយខេត្តជាំងស៊ូ និង ខេត្តព្រះសីហនុ មានភូមិសាស្ត្រដូចគ្នា បង្កើតបាននូវកិច្ចសហប្រតិបត្តិការជាមួយគ្នាលើវិស័យអប់រំ សុខាភិបាល ហើយដំណើទស្សនកិច្ចនាពេលនេះ ផ្តោតសំខាន់ទៅលើការងារមនុស្សធម៌ជួយដល់សាលាបឋមសិក្សា និងអនុវិទ្យាល័យបិទត្រាំង ជាំងស៊ូ ព្រមទាំងបាននាំមកនូវក្រុមគ្រូពេទ្យស្ម័គ្រចិត្តខេត្តជាំងស៊ូ ជួយពិនិត្យព្យាបាលជំងឺបេះដូង និងជំរុញបង្កើតមូលនិធិសប្បុរសធម៍បន្ថែមទៀតក្នុងការជួយគ្នាទៅវិញទៅមក ។
គួរបញ្ជាក់ថា ខេត្តព្រះសីហនុ ត្រូវបានប្រមុខរាជរដ្ឋាភិបាលសម្ដេចមហាបវរធិបតី ហ៊ុន ម៉ាណែត ប្រកាសជាខេត្តបញ្ចប់ការវាស់វែងដីធ្លី មានលក្ខណៈជាប្រព័ន្ធ នឹងបន្តចុះបញ្ជីក្បាលដី ដើម្បីត្រៀមចែកបណ្ណកម្មសិទ្ធិជូនពលរដ្ឋជាបន្តបន្ទាប់ផងដែរ ។ សម្ដេចធិបតីក៏បានលើកឡើងផងដែរថា ការបញ្ចប់ការវាស់វែងដីធ្លីនៅក្នុងខេត្តព្រះសីហនុ នឹងអាចទាក់ទាញការវិនិយោគនៅក្នុងខេត្តព្រះសីហនុបន្ថែមទៀត ពីព្រោះថាវិនិយោគិនដែលចូលមកស្វែងរកការវិនិយោគនៅក្នុងខេត្តព្រះសីហនុនឹងលែងបារម្ភថាដីដែលខ្លួនវិនិយោគនឹងមានបញ្ហា ឬទំនាស់ទៀតហើយ ៕
Account
Security
Favourite Content