សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ផ្លូវជាតិមួយខ្សែតភ្ជាប់ពីផ្លូវជាតិលេខ៤ទៅកាន់ទីរួមខេត្តកោះកុង គឺផ្លូវជាតិលេខ៤៨គិតត្រឹមថ្ងៃទី៣១ សីហា ឆ្នាំ២០២៣ សម្រេចបាន ៣៥ភាគរយ ។ នេះបើតាមសេចក្ដីប្រកាសព័ត៌មានរបស់ក្រសួងសាធារណការ និងដឹកជញ្ជូន ។
នៅក្នុងសេចក្ដីប្រកាសព័ត៌មានដដែលនេះឱ្យដឹងថា អន្តរក្រសួងរួមមានក្រសួងសាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ បានចុះត្រួតពិនិត្យគុណភាព និងវឌ្ឍនភាពការសាងសង់ផ្លូវជាតិលេខ ៤៨ ជាប្រចាំ ក្នុងគោលបំណងធ្វើការតាមដានការសាងសង់ ដើម្បីធានាថា ក្រុមហ៊ុនអនុវត្តបានត្រឹមត្រូវតាមបទដ្ឋានបច្ចេកទេសដែលបានកំណត់ សំដៅឱ្យខ្សែផ្លូវមានគុណភាព អាចប្រើប្រាស់បានយូរអង្វែង។
សេចក្ដីប្រកាសព័ត៌មាននេះថា តួលេខនៃវឌ្ឍនភាពនេះបង្ហាញឱ្យឃើញថា គម្រោងកំពុងមានវឌ្ឍនភាពល្អប្រសើរបើទោះជាមានភាពយឺតយ៉ាវជាងផែនការបន្តិចក៏ដោយ ។ ភាពយឺតយ៉ាវនេះបណ្តាលមកពីកត្តាភូមិសាស្រ្ត កត្តាអាកាសធាតុ បញ្ហាកូវីដ១៩ និងការប្រែប្រួលបន្ថែមទំហំការងារមួយចំនួន។
ជាការឆ្លើយតបទៅលើភាពយឺតយ៉ាវ ក្រុមហ៊ុនអនុវត្តការសាងសង់បានស្នើសុំពន្យាពេលចំនួន ១០ខែ ដោយគ្រោងបញ្ចប់នៅខែមេសា ឆ្នាំ២០២៥ខាងមុខ ។
ឯកឧត្តម សូរ វ៉ិចទ័រ រដ្ឋលេខាធិការក្រសួងសាធារណការ និងដឹកជញ្ជូន ក៏បានក្រើនរំលឹកដល់ក្រុមហ៊ុនសាងសង់ និងក្រុមហ៊ុនទីប្រឹក្សាបច្ចេកទេស ត្រូវអនុវត្តការងារសាងសង់គម្រោងឱ្យបានចប់រួចរាល់តាមផែនការដែលបានស្នើសុំ។ ឯកឧត្តមរដ្ឋលេខាធិការ ក៏បានចុះសិក្សាពិនិត្យលទ្ធភាពក្នុងការលើកកម្រិតគុណភាពកំណាត់ផ្លូវជាតិលេខ ៤៨ ដែលនៅសល់ប្រវែង ៧,៨គីឡូម៉ែត្រ ចាប់ពីគល់ស្ពានកោះកុង រហូតដល់ច្រកទ្វារព្រំដែនអន្តរជាតិ ចាំយាម-ក្លងយ៉ៃ និងគម្រោងស្ថាបនាស្ពានកោះកុងថ្មី អមស្ពានចាស់ ដែលមានប្រវែងប្រមាណ ១៩០០មផងដែរ ។
គួររម្លឹកថា ផ្លូវជាតិថ្មីមួយខ្សែទៀតដែលតភ្ជាប់ពីតំបន់ព្រំដែនប៉ែកពាយព្យនៃប្រទេសទៅកាន់ខេត្តកោះកុង គឺផ្លូវជាតិលេខ១០ ក៏បាន និងកំពុងសាងសង់ជិតរាល់រាល់ និងត្រៀមដាក់ដំណើរការនៅពេលរួចរាល់នេះផងដែរ ដែលផ្លូវពីរខ្សែនេះ ( ផ្លូវលេខ៤៨ និងផ្លូវលេខ១០ ) នឹងជំរុញសក្ដានុពលលខេត្តកោះកុងកាន់តែមានភាពទាក់ទាញក្នុងការវិនិយោគបន្ថែមទៀតស្របនឹងបច្ចុប្បន្ននេះ អ្នកវិនិយោគក្នុងស្រុកជាច្រើនក៏បានត្រៀមដីត្រៀមទីតាំងដើម្បីអភិវឌ្ឍន៍គម្រោងរបស់ខ្លួននាពេលខាងមុខនេះផងដែរ ។
បើតាមអ្នកជំនាញអចលនទ្រព្យប្រចាំខេត្តកោះកុងបានបញ្ជាក់ផងដែរថា អ្នកវិនិយោគដីធ្លីដែលចង់វិនិយោគក្នុងខេត្តកោះកុង ពេលនេះគឺជាឱកាសល្អសម្រាប់ពួកគេ ដោយសារតែពេលនេះតម្លៃដីធ្លីនៅមានកម្រិត និងអាចចំណេញនៅពេលអនាគត ជាពិសេសពេលផ្លូវទាំងពីរខ្សែសាងសង់រួច ហើយបើចាំដល់ផ្លូវធ្វើរួចរាល់ចាំចាប់ផ្ដើមវិនិយោគវាអាចជាការយឺតយ៉ាវបន្តិចហើយ៕
Account
Security
Favourite Content