សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សម្រាប់ការដាំដំណាំជាលក្ខណៈអាជីវកម្ម កសិករមិនត្រឹមតែត្រូវការដឹងពីបច្ចេកទេសដាំ ការថែទាំ និងការជ្រើសរើសពូជប៉ុណ្ណោះទេ តែគេក៏ត្រូវដឹងពីតម្រូវការទីផ្សារ ថាតើរដូវណាគួរដាំដំណាំអ្វីទើបអាចលក់បានថ្លៃ។ ក្នុងនោះ គ្រូបង្គោលផ្នែកកសិកម្មបានបង្ហើបថា សម្រាប់រដូវនេះ ប៉េងប៉ោះ ជាដំណាំមានទីផ្សារល្អ ដែលកសិករគួររៀបចំដាំ។
លោក ស្ងួន ទូច ជាគ្រូបង្គោល និងជាគណៈកម្មការសហគមន៍កសិកម្ម គុណវុឌ្ឍិល្បើក ស្ថិតក្នុងភូមិត្រពាំងថ្ម ឃុំល្បើក ស្រុកឈូក ខេត្តកំពត បានប្រាប់ឱ្យដឹងថា សម្រាប់រដូវវស្សានេះលោក និងកសិករក្នុងសហគមន៍កំពុងរៀបចំដាំដំណាំប៉េងប៉ោះ ព្រោះវាពិបាកដាំ ពិបាកថែទាំបន្តិច តែអាចលក់ក្នុងតម្លៃថ្លៃ។
លោកបញ្ជាក់ថា៖
«ជាធម្មតាដំណាំគេអាចដាំបានមិនរើសរដូវនោះទេ ឱ្យតែកសិករមានទីតាំងសមស្រប និងចេះជ្រើសរើសគ្រាប់ពូជបានត្រឹមត្រូវ ដោយឡែករដូវវស្សានេះ យើងកំពុងរៀបចំដាំប៉េងប៉ោះ ត្បិតប៉េងប៉ោះវាពិបាកក្នុងការដាំ និងថែទាំនៅរដូវភ្លៀង ឆាប់ខូច ឆាប់រលួយ ប៉ុន្តែសម្រាប់អ្នកដែលមានដីនៅទីទួល មិនលិចទឹក ឬមានដីសមស្របអាចលើករងដាំបាន យើងគួរតែដាំវា ព្រោះគេមិនសូវដាំ យើងអាចលក់បានថ្លៃ ជាពិសេសចន្លោះខែសីហា ដល់ខែធ្នូ តែម្ដង»។
លោកបន្ថែមថា ៖
«សម្រាប់តម្លៃប៉េងប៉ោះកាលពីឆ្នាំមុនគេអាចលក់បានចន្លោះពី ៤០០០-៦០០០រៀល ក្នុងមួយគីឡូក្រាម ដោយការដាំត្រូវការរយៈពេលប្រមាណ ៨៥ថ្ងៃ ទើបអាចប្រមូលផលបាន ហើយគេអាចបេះបណ្ដើរៗ ជារឿយៗ បានរយៈពេល ៣ខែ ទើបអស់ ហើយការថែទាំក៏មិនខុសពីដំណាំដទៃទៀតដែរ ដោយយើងមានប្រើជីកំប៉ុស្តិ៍ដើម្បីបំប៉នឱ្យដើមល្អ ផ្លែមានរសជាតិឆ្ងាញ់ និងសុវត្ថិភាពដល់អ្នកទទួលទាន»។
សម្រាប់អ្នកចង់ដាំដំណាំ ឬបន្លែ បើគ្រាន់តែសម្រាប់ហូបគឺអាចដាំបានច្រើនមុខ មិនរើសរដូវនោះទេ ឱ្យតែមានដីគឺអាចលើករងដាំបាន តួយ៉ាងនៅរដូវធ្លាក់ភ្លៀងច្រើនគេអាចលើករងត្រឹម ៣-៥តឹកគឺអាចដាំបាន។ ដោយឡែកសម្រាប់អ្នកដាំបន្លែសម្រាប់លក់ត្រូវដឹងពីទីផ្សារ និងតម្រូវការរបស់អ្នកទទួលទានជាមុនសិន។
គ្រូបង្គោលខាងលើរៀបរាប់ទៀតថា បើរដូវខ្វះទឹកគេអាចដាំដំណាំរយៈពេលខ្លី និងមិនសូវត្រូវការទឹកច្រើន ដូចជាតាសក់ សណ្ដែកកួរ ននោង ខ្ទឹមស្លឹក ដែលមានរយៈដាំត្រឹម ៣០-៤០ថ្ងៃ ឯរដូវមានទឹកគ្រប់គ្រាន់គេអាចដាំត្រកួន ស្ពៃ ម្ទេស ត្រឡាច ម្រះ និងប៉េងប៉ោះបន្ថែមទៀត។ រីឯសណ្ដែកកួរ និងតាសក់ ជាបន្លែដែលគេពេញនិយម ព្រោះគេអាចច្នៃជាម្ហូបបានច្រើនមុខ តែនៅរដូវភ្លៀងមិនសូវមានទីផ្សារល្អប៉ុន្មានទេដោយសារគេអាចដាំបានស្ទើរគ្រប់គ្នា៕
Account
Security
Favourite Content