បរទេស៖ យោងតាមប្រភពពី CNN បានលើកឡើងថា កំដៅក្តៅខ្លាំងបានធ្វើឲ្យមនុស្សរាប់ម៉ឹននាក់ស្លាប់ជារៀងរាល់ឆ្នាំ ហើយទីក្រុងខ្លះ​កំពុងអនុវត្តវិធីមួយចំនួនក្នុងការទប់ទល់នឹងកំដៅ។

Barcelona បាន​ក្លាយ​ជា​ទីក្រុងមួយដែលមានពិសោធន៍ប្រកបដោយភាពច្នៃប្រឌិត​ និង​​សិក្សា​​អំពី​ប្រសិទ្ធភាព​នៃ​ដើមឈើ។ ទីក្រុងមួយនេះមានគោលបំណងដាំប្រភេទដើមឈើដែលធន់នឹងអាកាសធាតុ ៣០ ភាគរយនៃដីរបស់ខ្លួននៅឆ្នាំ២០៣៧។ សព្វថ្ងៃនេះ ដើមឈើប្រភេទ Hold Oaks, Aleppo, Plane Trees, និង ដើមស្រល់ ត្រូវបានដាំជាជួរនៅទីសាធារណៈ។

Seville ដែលជាទីក្រុងមួយរបស់ប្រទេសអេស្ប៉ាញបានឡើងកំដៅដល់ ៤០ អង្សាសេជាទៀងទាត់នៅក្នុងរដូវក្តៅ ហើយត្រូវបានគេចាត់ទុកជាទីក្រុងដែលមានរលកកំដៅដំបូងគេនៅលើពិភពលោក។ ដើម្បីទប់ទល់នឹងការកើនឡើងកំដៅ សំយ៉ាបជាច្រើនត្រូវបានដំឡើងនៅទូទាំងទីក្រុងមួយនេះ។ ការធ្វើសំយ៉ាបគឺបានផ្តល់ម្លប់ការពារពីកំដៅ និង មានភាពងាយស្រួលដល់ការប្រើប្រាស់ផ្លូវរបស់មនុស្ស។

Wuhan និង Chongqing ជាកន្លែងមានសីតុណ្ហភាពលើសពី ៤៥ អង្សាសេហៃកាលពីឆ្នាំមុន។ ដូច្នោះហើយ គេបានប្រើឡានធំៗសម្រាប់បាញ់ទឹកត្រជាក់នៅតាមសួនកម្សាន្ត ក្រៅផ្សារទំនើប និងចំណតឡានក្រុង។ ការបាញ់ទឹកត្រជាក់នេះអាចបន្ថយសីតុណ្ហភាពបានដល់ទៅ ៧ ភាគរយ។ ទន្ទឹមនឹងនេះ ទីក្រុង Vienna ប្រទេសអូទ្រីសបានកំណត់តំបន់ចំនួន ២២ ជាផ្លូវត្រជាក់ដែលបំពាក់ដោយធុងសម្រាប់ផឹកទឹក ទុយោបាញ់ទឹកផ្កាឈូក និងប្រព័ន្ធប្រោះទឹកឆ្លាតវៃ ដែលដំណើរការដោយស្វ័យប្រវត្តិនៅពេលសីតុណ្ហភាពកើនឡើងលើសពី ៣៥ អង្សាសេ។

កោះ Santorini សម្បូរទៅដោយការលាបពណ៌លើដំបូលផ្ទះ និងអគារជាពណ៌ស ដែលវាគឹជាការការពារកំដៅដ៏មានប្រសិទ្ធភាព និងមានតម្លៃថោកសមរម្យ។ គេហៅវាថា “Albedo Effect” គឺជាទម្រង់ដែលដំបូលពណ៌សចំណាំងពន្លឺព្រះអាទិត្យទៅបរិយាកាសវិញប្រហែល ៨៥​ ភាគរយ។ លើសពីនេះ ទីក្រុង Los Angeles របស់សហរដ្ឋអាមេរិកបានលាបពណ៌សលើហេរដ្ឋារចនាសម្ព័ន្នដើម្បីការពារពីរលកកំដៅ ដោយអាជ្ញាធរទីក្រុងនេះបានចាប់ផ្តើមធ្វើការពិសោធលើការលាបផ្លូវពណ៌សកាលពីឆ្នាំ២០១៩ កន្លងទៅនេះ។ គោល​បំណង​គឺ​ដើម្បី​ឲ្យ​កាំរស្មី​ព្រះអាទិត្យ​ត្រឡប់​ទៅ​ក្នុង​លំហ​វិញ និងដើម្បី​ធ្វើ​ឱ្យ​តំបន់​ជុំវិញ​នោះ​ត្រជាក់ ដែលរហូត​មក​ដល់​ពេល​នេះផ្លូវនៅ​ក្នុងសង្កាត់​ចំនួន​ ១០ ​ត្រូវ​បាន​គេ​លាប​ពណ៌ស៕