ជាទូរទៅក្ងានស្រែមួយក្បាល មានទម្ងន់ជាមធ្យមចន្លោះពី ៣.៥០ គីឡូក្រាមទៅដល់ ៥.០០គីឡូក្រាម មានតម្លៃចន្លោះពី ០៨ ម៉ឺនរៀលទៅដល់ ១២ ម៉ឺនរៀលក្នុងមួយក្បាល ដែលធ្វើឱ្យកសិកររកចំណូលបានច្រើន និងមានតម្រូវការទីផ្សារខ្ពស់ទៀតផង។ 

អ្នកនាង វ៉ា ដ្រាវ័ន្ត កសិកររស់នៅក្នុងភូមិព្រៃដាច់ ឃុំអូតាគី ស្រុកថ្មគោល ខេត្តបាត់ដំបង បានចាប់ផ្តើមរបរចីញ្ចឹមក្ងានស្រែកាលពីឆ្នាំមុន ដែលដំបូងឡើយ អ្នកនាងទិញមេក្ងានចំនួន ១០ ក្បាល និងក្ងានឈ្មោលសម្រាប់ធ្វើបា ចំនួន ០២ ក្បាល ទុកធ្វើជាបា​បង្កាត់យកកូនចិញ្ចឹមលក់។

ក្រោយពីចិញ្ចឹមបានមួយរយៈពេលខ្លី ក្ងានញីចាប់ផ្តើមពង និងញាស់កូនជាបន្តបន្ទាប់ ដែលសរុបទាំងអស់មានចំនួនប្រ​ហែល ៥០ ក្បាល ហើយបានដាក់ឱ្យកូនក្ងានតូចៗដើររកចំណីស៊ីជាមួយកូនមាន់ធម្មតា ដោយមិនបានចាក់វ៉ាក់សាំង ប្រើថ្នាំសង្កូវការពារជំងឺនោះទេ។ អ្នកនាង វ៉ា ដ្រាវ័ន្ត ថា៖

“ចិញ្ចឹមក្ងានងាយស្រួលជាងចិញ្ចឹមមាន់ទារ វាធន់នឹងជំងឺជាងមាន់ទារ កើតមកមិនបាច់ចាក់វ៉ាក់សាំងការពារជំងឺ មិនបាច់ប្រើថ្នាំព្យាបាលនោះទេ ឱ្យចំណីវាស៊ីគ្រប់គ្រាន់ទៅវានឹងធំធាត់លឿន និងឆាប់បានលក់ទៀតផង។”

ដោយគ្រាន់តែចំណាយពេលដាក់ចំណីមួយថ្ងៃ ០២ ដង (ព្រឹកម្តងនិងល្ងាចម្តង) ក្ងានចាប់ផ្តើមធំធាត់ពីមួយថ្ងៃទៅមួយថ្ងៃ រហូតដល់អាយុ ០៤ ខែ ក្ញានញីមានទម្ងន់ជិត ៣ គីឡូក្រាម ចំណែកក្ងានឈ្មោលបានទម្ងន់ដល់ទៅជិត ០៤ គីឡូ ដែលអាចចាប់លក់ឱ្យអតិថិជនជាបណ្តើរៗហើយ ក្នុងមួយគីឡូក្រាមសាច់ក្ងានមានតម្លៃជាមធ្យម ២៥,០០០​ រៀល។

នៅអំឡុងពេលអាយុ ០៤ ខែខាងលើនោះ សាច់ក្ងាននៅខ្ចីនៅឡើយ និងមិនទាន់ពេញណែនល្អ តែរហូតដល់អាយុចាប់ពី ០៦ ខែទៅដល់ ០៧ ខែ ទើបក្ងានពេញសាច់ល្អមានទម្ងន់ចន្លោះពី ៣,៥ គីឡូក្រាម (ក្ងានញី) រហូតដល់ជាង ៥ គីឡូក្រាម (ក្ងានឈ្មោល) មានតន្លៃចន្លោះពី ៨ ម៉ឺនរៀលទៅដល់ ១២ ម៉ឺនរៀលអាស្រ័យតាមតូចតាមធំ។

អ្នកនាង វ៉ា ដ្រាវ័ន បញ្ជាក់ថា ក្ងានស៊ីចំណីច្រើនជាងមាន់បន្តិច។ អ្នកនាងនិយាយ៖

“វាមិនមែនដើរចឹកគ្រាប់ស្រូវម្តងមួយគ្រាប់ៗ ដូចសត្វមាន់ទេ វាហួរពេញមួយគែ ទើបវាលេបម្តងហើយផឹកទឹក ហើយវាហួរទៀតរហូតដល់ឆ្អែតទើបវាឈប់ យកល្អយើងមានដីធំទុកដាំស្មៅឱ្យវាចឹកស៊ី ដើម្បីកាត់បន្ថយការចំណាយទិញចំណី ហើយធ្វើឱ្យក្ងានមានសុខភាពល្អ បំបាត់ស្រ្តេសធ្វើឱ្យក្ងានឆាប់ធំ និងសាច់មានរស់ជាតិឆ្ងាញ់ទៀតផង។”​

បើតាមកសិករខាងលើបញ្ជាក់ថា សាច់ក្ងានងាយស្រួលលក់មិនលំបាករកទីផ្សារនោះទេ នៅពេលចិញ្ចឹមវាធំមានអ្នកភូមិជិតខាងមកទិញហូរហែរជាបន្តបន្ទាប់។ កត្តាដែលធ្វើឱ្យសាច់ក្ងានងាយស្រួលលក់ ដោយសារមានតម្លៃទាប ២៥,០០០រៀលក្នុងមួយគីឡួក្រាម ដោយឡែកសាច់មានរស់ជាតិឆ្ងាញ់ជាងសាច់មាន់ ឬសាច់ទា ដែលគេនិយមទទួលទាន លក្ខណៈគ្រួសារ ជួបជុំមិត្តភក្រ និងកម្មវិធីជប់លាងផ្សេងៗ។

នៅលើផ្ទៃប្រហែលមួយហិកតាជុំវិញបរិវេណផ្ទះ កសិករខាងលើ មិនមែនចិញ្ចឹមក្ងានស្រែតែមួយប្រភេទនោះទេ ពោលមានចិញ្ចឹមក្ងានក្បាលតោ ដែលមានតម្លៃ ៣០០ ដុល្លារក្នុងមួយក្បាល និងចិញ្ចឹមមាន់ស្រែចំនួនជាង ២០០ ក្បាលផ្សេងទៀត ដែលអាចរកចំណូលបានច្រើនជារៀងរាល់ខែ។

សូមបញ្ជាក់ថា មុននឹងចាប់យកវិស័យចិញ្ចឹមសត្វលក់ អ្នកនាង វ៉ា ដ្រាវ័ន្ត ជាអ្នកធ្វើការនៅក្រុមហ៊ុនឯកជន ប៉ុន្តែដោយសារនិយស្ស័យស្រលាញ់សត្វ​ និងគិតថា អាចរកចំណូលបានច្រើន ទើបសម្រេចចិត្តឈប់ធ្វើការកាលពីឆ្នាំ ២០២៤ ងាកមកចិញ្ចឹមសត្វរហូតមកទល់បច្ចុប្បន្ន៕