សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កូនខ្មែរម្នាក់ បានសម្រេចបោះទុនវិនិយោគជាង ៦ លានដុល្លារអាម៉េរិក បង្កើតរោងចក្រផលិតត្រីខកំប៉ុងម៉ាកយីហោខ្មែរ នៅខេត្តកែប ដើម្បីផ្គត់ផ្គង់ទីផ្សារក្នុងស្រុកផង និងសម្រាប់នាំចេញទៅក្រៅប្រទេសផង ដោយសារមើលឃើញពីសន្ទុះនៃការគ្រាំទ្រផលិតផលក្នុងស្រុកកើនឡើងខ្លាំង ស្របពេលពេលដែលប្រជាជនខ្មែរ ធ្វើពហិការឈប់ប្រើផលិតផលថៃ។ នេះបើយោងតាមការបញ្ជាក់របស់អាជ្ញាធរខេត្តកែប។
ឯកឧត្តម សោម ពិសិដ្ឋ អភិបាលនៃគណៈអភិបាលខេត្តកែប ថ្លែងប្រាប់បណ្ដាញសារព័ត៌មាន AMS Economy នៅព្រឹកថ្ងៃទី ១៥ ខែកក្កដា ឆ្នាំ២០២៦ ថា ក្រុមហ៊ុនខាងលើឈ្មោះ សៃសាន់ អ៊ីនវេសមិន ឯ.ក (Saisons Investment Co., Ltd.) មានទីតាំងនៅខេត្តកែប ភាគនិរតីនៃប្រទេសកម្ពុជា។
ឯកឧត្តមមានប្រសាសន៍ថា ក្នុងកាលៈទេសៈដែលប្រទេសជាតិត្រូវបានឈ្លានពាន កូនខ្មែរក្នុងស្រុក បានសម្រេចចិត្តបោះទុនវិនិយោគខាងលើ ផលិតម្ហូបអាហារដែលមានរសជាតិ គុណភាព និងសុវត្ថិភាពជូនពលរដ្ឋក្នុងស្រុក និងសម្រាប់នាំចេញថែមទៀតផង។
ឯកឧត្តមមានប្រសាសន៍ដូច្នេះថា៖
“ក្នុងកាលៈទេសៈដែលសៀមឈ្លានពាន បានធ្វើឱ្យអ្នកវិនិយោគក្នុងស្រុករបស់ខ្មែរយើងត្រូវពង្រឹងខ្លួនឯង យើងជំរុញពហិការ ហើយយើងត្រូវតែខ្លាំងខ្លួនឯង យើងពហិការអត់អីហូបក៏មិនកើតដែរ ដូច្នេះអ្នកវិនិយោគខ្មែរយើង ត្រូវខិតខំលើការងារនេះឱ្យបានគ្រប់លក្ខណៈសម្បត្តិ ដើម្បីបម្រើសេវាផ្គង់ផ្គង់ចំណីអាហារដែលមានគុណភាព និងអនាម័យ។”
ក្នុងដំណាក់កាលដំបូងក្រុមហ៊ុន សៃសាន់ អ៊ីនវេសមិន ឯ.ក ផលិតត្រីខកំប៉ុង និងទឹកត្រី ក្នុងបរិមាណរាប់សិបតោនក្នុងមួយឆ្នាំៗ ដែលមានតម្រូវការវត្ថុធាតុដើមទាំងត្រីទឹកសាប និងត្រីសមុទ្រ ហើយនឹងសហការជាមួយកសិករចិញ្ចឹមត្រីតាមបែបវារីវប្បកម្ម សម្រាប់ផ្គត់ផ្គង់ដល់ចង្វាក់ផលិតកម្មក្រុមហ៊ុនថែមទៀត ដែលជាផ្នែកមួយដ៏សំខាន់ក្នុងការគាំទ្រផលិតផលក្នុងស្រុក និងការជំរុញទីផ្សារក្នុងស្រុក។
នៅដំណាក់កាលបន្ទាប់ ក្រុមហ៊ុននឹងសហការជាមួយកសិករប្រមូលទិញម្សៅដំឡូងមី និងផលិតផលកសិកម្មផ្សេងទៀតសម្រាប់ផលិតមី រួមនឹងការទិញផ្លែស្វាយស្រស់ផលិតជាផ្លែឈើក្រៀមផ្គង់ផ្គង់លើទីផ្សារ ជំរុញឱ្យកសិផលខ្មែរកាន់តែមានទីផ្សារខ្ពស់ថែមទៀត។
លោក ភោគ សុខេន ប្រធានមន្ទីរឧស្សាហកម្ម បច្ចេកវិទ្យា និងនវានុវត្តន៍ ខេត្តកែប មានប្រសាសន៍ថា ក្រុមហ៊ុនផលិតត្រីខកំប៉ុងខាងលើ សម្រេចវិនិយោគលើផ្ទៃដីប្រហែល ១០ ហិកតា មានទីតាំងស្ថិតនៅភូមិអន្លង់ស ឃុំកំពង់ទឹក ស្រុកដំណាក់ចង្អើរ មានលទ្ធភាពបង្កើតការងារបានជាង ២០០ កន្លែង។
លោកបន្តថា មកទល់បច្ចុប្បន្ន ក្រុមហ៊ុនសម្រេចបានការសាងសង់ប្រមាណជាង ៦០ ភាគរយ។ នេះជាការសម្រេចចិត្តដ៏ត្រឹមត្រូវរបស់កូនខ្មែរ ក្នុងការបោះទុនវិនិយោគបង្កើតឡើងនូវផលិតផល ដែលមានតម្រូវការចាំបាច់ សម្រាប់ជីវភាពរស់នៅប្រចាំថ្ងៃ ក្នុងកាលៈទេសៈដែលប្រជាពលរដ្ឋខ្មែរ ធ្វើពហិការផលិតផលបរទេសជិតខាង និងតម្រូវឱ្យមានផលិតផលក្នុងស្រុកមកជំនួស។
យោងតាមរបាយការណ៍ ក្រុមប្រឹក្សាអភិវឌ្ឍន៍កម្ពុជា (CDC) ចេញផ្សាយនៅ ខែកក្កដា ឆ្នាំ២០២៦នេះ បានអនុម័តគម្រោងបង្កើតរោងចក្រត្រីខកំប៉ុង និងទឹកត្រី ក្រោមទំហំទុនវិនិយោគ ៧ លានដុល្លាររ ដែលជារោងចក្រត្រីខធំជាងគេបង្អស់នៅកម្ពុជា។ ក្រុមហ៊ុនមានតម្រូវការចាំបាច់ក្នុងការប្រមូលទិញត្រីពីប្រជានេសាទ ទាំងត្រីទឹកសាបនិងត្រីទឹកប្រៃ មានដូចជាត្រីកាម៉ុង ត្រីគួន ត្រីកាកឺម ជាដើម៕
Account
Security
Favourite Content