រដ្ឋមន្ត្រីក្រសួងព័ត៌មាន ឯកឧត្តម នេត្រ ភក្ត្រា នាព្រឹកថ្ងៃទី១៥ ខែកញ្ញា ឆ្នាំ២០២៣នេះ បានអនុញ្ញាតឱ្យថ្នាក់ដឹកនាំក្រុមហ៊ុន Apsara Media Service (AMS) ចូលជួបសម្ដែងការគួរសម និងពិភាក្សាការងារមួយចំនួនពាក់ព័ន្ធទៅនឹងការផ្សព្វផ្សាយព័ត៌មានប្រកបដោយក្រមសីលធម៌ និងវិជ្ជាជីវៈ ឱ្យកាន់តែទូលំទូលាយ មានប្រសិទ្ធភាពខ្ពស់ ដើម្បីជាប្រយោជន៍ដល់សង្គមជាតិ ក៏ដូចជាផ្តល់នូវព័ត៌មានពិតដល់សាធារណជនទាំងជាតិ និងអន្តរជាតិ។
លោកជំទាវ ឌិត នីតា ប្រធានក្រុមប្រឹក្សាភិបាលក្រុមហ៊ុន Apsara Media Service (AMS) បានលើកឡើងថា បច្ចុប្បន្ន ក្រុមហ៊ុនបណ្តាញព័ត៌មាន Apsara Media Service (AMS) មានការផលិត និងផ្សព្វផ្សាយមាតិកាព័ត៌មានជាច្រើន ដែលផ្តល់ការអប់រំ និងមានអត្ថប្រយោជន៍ដល់សង្គមជាតិ ជាពិសេសផ្តល់នូវចំណេះដឹងទូទៅ បង្ហាញពីកិច្ចអភិវឌ្ឍន៍សង្គមជាតិកម្ពុជាទៅកាន់សាធារណជនយ៉ាងទូលំទូលាយ។
នៅក្នុងឱកាសនេះផងដែរ លោកជំទាវ ឌិត នីតា ក៏បានថ្លែងអំណរគុណចំពោះការគាំទ្ររបស់ក្រសួងព័ត៌មានដល់ AMS នាពេលកន្លងមកនេះ ហើយតាមរយៈកិច្ចពិភាក្សាការងារនេះដែរ លោកជំទាវ បានគូសបញ្ជាក់ថា នឹងនៅតែបន្ដពង្រឹងការផ្សព្វផ្សាយព័ត៌មានដែលមានគុណភាពល្អ ទាំងរូបភាព ទាំងខ្លឹមសារ ទៅឱ្យសាធារណជនប្រកបដោយក្រមសីលធម៌ និងវិជ្ជាជីវៈ។
ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានថ្លែងអំណរគុណចំពោះ ក្រុមហ៊ុន AMS ដែលបានដើរ នាទីសំខាន់នៅក្នុងការផ្ដល់ព័ត៌មានទៅឱ្យសាធារណជន ដែលមានគុណភាពល្អ ទាំងរូបភាព ទាំងខ្លឹមសារ ជាការរួមចំណែកធ្វើឱ្យប្រជាពលរដ្ឋខ្មែរគឺទទួលបាននូវព័ត៌មាន ដែលមានខ្លឹមសារល្អៗ ពាក់ព័ន្ធជាមួយព័ត៌មានអប់រំ សេដ្ឋកិច្ច បរិស្ថាន នយោបាយ ប្រវត្តិសាស្ត្រផ្សេងៗ ជាភាពសម្បូរបែបនៃខ្លឹមសារសម្រាប់ការផ្សព្វផ្សាយទៅដល់សាធារណជន។
ឯកឧត្តម នេត្រ ភក្ត្រា ក៏បានណែនាំឱ្យប្រព័ន្ធផ្សព្វផ្សាយទាំងអស់ត្រូវផ្ដោតសំខាន់ទៅលើខ្លឹមសារនៃអត្ថបទ ដែលមានគុណភាព សម្រាប់ជាប្រយោជន៍ដល់ប្រជាពលរដ្ឋ។ ដូចនេះ សូមឱ្យប្រព័ន្ធផ្សព្វផ្សាយទាំងអស់ផ្តោតសំខាន់ទៅលើគុណភាពអត្ថបទ និងគុណភាពសារព័ត៌មាន ដែលសំដៅទៅលើការផលិតនៅព័ត៌មានដែលមានគុណភាពសម្រាប់ជាប្រយោជន៍ដល់ប្រជាជនក៏ដូចជាដល់អ្នកអានទូទៅ។
ឯកឧត្តមរដ្ឋមន្រ្ដីក៏បានលើកទឹកចិត្តឱ្យប្រព័ន្ធផ្សព្វផ្សាយទាំងអស់ ជាពិសេសប្រពន្ធ័ផ្សព្វផ្សាយ AMS ត្រូវបង្កើននូវការងារផ្សាយឱ្យបានទូលំ ទូលាយបន្ថែមទៀត ព្រោះបច្ចុប្បន្ននេះប្រជាពលរដ្ឋ គឺមានចំណេះដឹងខ្ពស់ ដែលត្រូវធ្វើឱ្យព័ត៌មាន របស់យើងប្រកបដោយគុណភាពខ្ពស់៕