សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ការប្រើប្រាស់ថាមពលស្អាតអាចកាត់បន្ថយថ្លៃដើមផលិតកម្មពី ១០ ទៅ ២០ ភាគរយ និងជួយពង្រឹងភាពប្រកួតប្រជែងនៃការនាំចេញរបស់កម្ពុជា ជាពិសេសក្នុងវិស័យកាត់ដេរ សម្លៀកបំពាក់ វាយនភណ្ឌ ស្បែកជើង និងការកែច្នៃផលិតផលកសិកម្ម។
យោងតាមរបាយការណ៍របស់អង្គការ EnergyLab Asia ការប្រើប្រាស់ថាមពលស្អាតអាចជួយកាត់បន្ថយថ្លៃដើមផលិតកម្មក្នុងវិស័យកាត់ដេរ និងការកែច្នៃផលិតផលកសិកម្ម ព្រមទាំងជួយឱ្យក្រុមហ៊ុនធានាការអនុលោមតាមស្តង់ដារបរិស្ថាន សង្គម និងអភិបាលកិច្ច (ESG)។
តម្រូវការរបស់អ្នកបញ្ជាទិញទូទាំងពិភពលោកក៏កំពុងផ្លាស់ប្តូរទៅរក ទំនិញផលិតដោយប្រើប្រាស់អគ្គិសនីពីប្រភពកកើតឡើងវិញ ១០០ ភាគរយនៅត្រឹមឆ្នាំ ២០៣០។ ស្ថានភាពនេះតម្រូវឱ្យក្រុមហ៊ុនផ្គត់ផ្គង់ និងផលិតនៅកម្ពុជាពន្លឿនការផ្លាស់ប្តូរទៅរកផលិតកម្មដែលមិនប៉ះពាល់ដល់បរិស្ថាន ដើម្បីរក្សាឱកាសនាំចេញទៅកាន់ទីផ្សារអន្តរជាតិធំៗ។
ផលិតផលនាំចេញសំខាន់ៗរបស់កម្ពុជាជាង ៧០ ភាគរយ ដូចជា សម្លៀកបំពាក់ ស្បែកជើង និងផលិតផលកែច្នៃកសិកម្ម សុទ្ធតែត្រូវការការវេចខ្ចប់។ ប៉ុន្តែបច្ចុប្បន្ន សម្ភារៈវេចខ្ចប់ទាំងនេះត្រូវបាននាំចូលពីបរទេស។
ក្នុងកិច្ចប្រជុំកំពូល Clean Energy Week 2026 កាលពីថ្ងៃទី ១៥ ខែកញ្ញា លោកស្រី អ៊ុត សុផាល់គន្ធ អ្នកគ្រប់គ្រងផ្នែកគោលនយោបាយថាមពល និងទំនាក់ទំនងរដ្ឋាភិបាលប្រចាំអង្គការ EnergyLab Asia បានបង្ហាញថា កម្ពុជាទទួលបានចំណែកតម្លៃតិចជាង ៣០ ភាគរយនៅក្នុងខ្សែសង្វាក់តម្លៃសម្លៀកបំពាក់សកល ដោយសារតែជាប់គាំងនៅក្នុងការងារកាត់ ដេរ និងតុបតែង (Cut-Make-Trim) ដែលផ្តល់ប្រាក់ចំណេញទាប។
លោកស្រីបានមានប្រសាសន៍ថា៖ «របាយការណ៍នេះដាក់ថាមពលស្អាតជាស្នូលនៃការអភិវឌ្ឍសេដ្ឋកិច្ច និងឧស្សាហកម្មរបស់កម្ពុជា ព្រមទាំងកំណត់នូវមាគ៌ាដើម្បីប្រែក្លាយសក្តានុពលថាមពលកកើតឡើងវិញរបស់ខ្លួនទៅជាគុណសម្បត្តិប្រកួតប្រជែងនៅក្នុងវិស័យអាទិភាពនានា រួមមានវិស័យកាត់ដេរ និងវាយនភណ្ឌប្រកបដោយនិរន្តរភាព ការផលិតសម្ភារៈវេចខ្ចប់ដែលបញ្ចេញកាបូនទាប និងសេដ្ឋកិច្ចឌីជីថលដែលមានកម្រិតការបញ្ចេញកាបូនទាប»។
ថ្លែងប្រាប់បណ្តាញសារព័ត៌មាន AMS កាលពីថ្ងៃទី ១៦ ខែកញ្ញា លោក ជ័យ តិច អ្នកវិភាគផ្នែកសេដ្ឋកិច្ច និងសង្គម បានលើកឡើងថា របាយការណ៍របស់ EnergyLab Asia មានសារៈសំខាន់ និងផ្តល់ផលល្អដល់ការនាំចេញ និងសមត្ថភាពប្រកួតប្រជែងរបស់កម្ពុជា ជាពិសេសសម្រាប់វិស័យឧស្សាហកម្មកាត់ដេរ សម្លៀកបំពាក់ វាយនភណ្ឌ និងស្បែកជើង (GFT) ក៏ដូចជាវិស័យផលិតកម្មផ្សេងទៀត រួមទាំងការកែច្នៃផលិតផលកសិកម្ម។
លោកបានមានប្រសាសន៍ថា៖ «ការអនុវត្តតាមគោលការណ៍ ESG គឺមានសារៈសំខាន់ណាស់សម្រាប់ការនាំចេញ ក៏ដូចជាជាតម្រូវការរបស់ប្រទេសនាំចូល។ ទោះជាយ៉ាងណាក៏ដោយ ថាមពលបៃតងមិនត្រឹមតែមានប្រយោជន៍សម្រាប់ការការពារបរិស្ថានប៉ុណ្ណោះទេ ប៉ុន្តែនៅក្នុងបរិបទបច្ចុប្បន្ន វាក៏មានសារៈសំខាន់ផងដែរចំពោះសមត្ថភាពប្រកួតប្រជែង ដោយសារវាជួយកាត់បន្ថយថ្លៃដើមផលិតកម្ម និងកាត់បន្ថយសម្ពាធពីកត្តាខាងក្រៅ»។
ថាមពលកកើតឡើងវិញរបស់កម្ពុជាមានប្រភពមកពីវារីអគ្គិសនី ថាមពលពន្លឺព្រះអាទិត្យ ថាមពលខ្យល់ និងប្រភពផ្សេងៗទៀត។ លោក ជ័យ តិច បានបញ្ជាក់ថា រហូតមកដល់ពេលនេះ កម្ពុជាអាចផលិតថាមពលប្រភេទនេះបានជាង ៦០ ភាគរយ។
លោកបានមានប្រសាសន៍ថា កម្ពុជានៅតែប្រើប្រាស់ឥន្ធនៈក្នុងវិស័យមួយចំនួន ដូចជា វិស័យដឹកជញ្ជូន កសិកម្ម និងខ្សែសង្វាក់ផលិតកម្មផ្សេងៗទៀត។ វិស័យជាច្រើនចាំបាច់ត្រូវផ្លាស់ប្តូរទៅប្រើប្រាស់អគ្គិសនីដែលផលិតចេញពីថាមពលកកើតឡើងវិញ ដូចជាការផ្លាស់ប្តូរពីការប្រើប្រាស់រថយន្តធម្មតាមកប្រើប្រាស់រថយន្តអគ្គិសនី (EV) ជាដើម។
លោក សារ៉ន សុវិជ្ជា ប្រធានលេខាធិការដ្ឋាននៃគំនិតផ្តួចផ្តើម Sustainable Textiles of the Asian Region (STAR) បានលើកឡើងថា វិស័យកាត់ដេរបានដើរតួនាទីយ៉ាងសំខាន់ក្នុងការបង្កើតការងារ និងការរួមចំណែកដល់សេដ្ឋកិច្ច ប៉ុន្តែការផ្លាស់ប្តូរទៅរកភាពបៃតងកំពុងក្លាយជាប្រធានបទសំខាន់សម្រាប់វិស័យនេះ។
លោកបានកត់សម្គាល់ថា អ្នកទិញអន្តរជាតិកំពុងតម្រូវឱ្យកម្ពុជាផ្លាស់ប្តូរទៅរកគំរូផលិតកម្មដែលមិនប៉ះពាល់ដល់បរិស្ថាន។ ក្នុងដំណើរការផលិតកម្ម អ្នកផ្គត់ផ្គង់ចាំបាច់ត្រូវប្រើប្រាស់ថាមពលកកើតឡើងវិញសម្រាប់ដំណើរការរោងចក្រ ប៉ុន្តែការផ្លាស់ប្តូរប្រភពថាមពលបែបនេះគឺជាកិច្ចការស្មុគស្មាញសម្រាប់រោងចក្រនានា។
ដើម្បីឆ្លើយតបទៅនឹងការប្តេជ្ញាចិត្តរបស់ក្រុមហ៊ុនម៉ាកយីហោអន្តរជាតិដែលកំណត់យកការប្រើប្រាស់អគ្គិសនីពីប្រភពកកើតឡើងវិញ ១០០ ភាគរយនៅត្រឹមឆ្នាំ ២០៣០ ជាលក្ខខណ្ឌនៃការធ្វើអាជីវកម្ម លោកបានសង្កត់ធ្ងន់ថា៖ «ឆ្នាំ ២០៣០ គឺនៅសល់ពេលមិនដល់ ៤ ឆ្នាំទៀតទេ។ ប្រសិនបើអ្នកជាម្ចាស់រោងចក្រ ហើយចង់ដំឡើងប្រព័ន្ធថាមពលពន្លឺព្រះអាទិត្យនៅលើដំបូល អ្នកមិនអាចពឹងផ្អែកទាំងស្រុងលើថាមពលពន្លឺព្រះអាទិត្យដើម្បីដំណើរការរោងចក្រទាំងមូលបានឡើយ ព្រោះវាមានកម្រិតកំណត់របស់វា»។
លោកក៏បានលើកឡើងពីយន្តការមួយដែលគេហៅថា «កិច្ចព្រមព្រៀងទិញថាមពលដោយផ្ទាល់» (DPPA) ដែលអនុញ្ញាតឱ្យរោងចក្រអាចទិញអគ្គិសនីដោយផ្ទាល់ពីក្រុមហ៊ុនផលិត ដើម្បីធានាថាការប្រើប្រាស់អគ្គិសនីរបស់ពួកគេបានមកពីប្រភពថាមពលកកើតឡើងវិញទាំងស្រុង។ លោកបានគូសបញ្ជាក់ថា ជម្រើសបែបនេះមិនទាន់មានសម្រាប់អនុវត្តនៅកម្ពុជានៅឡើយទេ។
លោកបានបន្ថែមថា សម្រាប់រោងចក្រនានាដែលពឹងផ្អែកលើបណ្តាញអគ្គិសនីជាតិ ថាមពលកកើតឡើងវិញនៅក្នុងបណ្តាញជាតិមានប្រភពជាង ៦០ ឬ ៧០ ភាគរយមកពីថាមពលវារីអគ្គិសនី។ ប៉ុន្តែវាមិនមែនមានន័យថា មានការបញ្ជាក់ជាផ្លូវការពេញលេញដើម្បីបង្ហាញថា ថាមពលនោះជាថាមពលស្អាត ១០០ ភាគរយនោះទេ។ លោកចាត់ទុកបញ្ហានេះថាជាចំណុចមួយដែលកម្ពុជាចាំបាច់ត្រូវដោះស្រាយ។
ទោះជាយ៉ាងណាក៏ដោយ នៅថ្ងៃទី ៨ ខែកញ្ញា លោកជំទាវ ស្រី ចម និម្មល រដ្ឋមន្ត្រីក្រសួងពាណិជ្ជកម្ម បានមានប្រសាសន៍ថា ការអនុវត្តតាមស្តង់ដារបរិស្ថានអន្តរជាតិ គួបផ្សំជាមួយការគោរពយ៉ាងពេញលេញនូវលក្ខខណ្ឌការងារ ផ្តល់ឱ្យក្រុមហ៊ុនផលិតសម្លៀកបំពាក់របស់កម្ពុជានូវគុណសម្បត្តិប្រកួតប្រជែងដ៏សំខាន់មួយនៅលើទីផ្សារអន្តរជាតិ ជាពិសេសនៅក្នុងចំណោមក្រុមហ៊ុនលក់រាយឈានមុខគេលើពិភពលោក។
យោងតាមទីភ្នាក់ងារសារព័ត៌មាន AKP លោកជំទាវ ក៏បានលើកទឹកចិត្តដល់ក្រុមហ៊ុនផលិតនានាឱ្យបន្តវិនិយោគលើការអភិវឌ្ឍជំនាញកម្លាំងពលកម្ម បច្ចេកវិទ្យាបៃតងកម្រិតខ្ពស់ និងការផលិតប្រកបដោយនិរន្តរភាពបរិស្ថាន ព្រមទាំងធានាឱ្យបាននូវការគោរពយ៉ាងតឹងរ៉ឹងចំពោះច្បាប់របស់កម្ពុជា និងស្តង់ដារអន្តរជាតិ។
ទាក់ទងនឹងអាជីវកម្មបៃតងថ្មីៗ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានមានប្រសាសន៍ថា នៅពេលដែលសេដ្ឋកិច្ចកាន់តែងាកទៅរកអគ្គិសនី ប្រសិទ្ធភាពនៃការផលិតក៏កាន់តែមានសារៈសំខាន់ផងដែរ។
ឯកឧត្តមបានបន្ថែមថា អគ្គិសនីភាវូបនីយកម្មក្នុងការដឹកជញ្ជូនអាចពង្រីកទីផ្សារក្នុងស្រុកសម្រាប់ឧបករណ៍ និងសេវាកម្មពាក់ព័ន្ធ ដែលផ្តល់ឱ្យក្រុមហ៊ុនកម្ពុជានូវឱកាសដើម្បីកសាងបទពិសោធន៍ និងមាត្រដ្ឋាន។ ការបំភាយឧស្ម័នក្នុងស្រុករបស់កម្ពុជាមានទំហំតូច ហើយវាអាចជួយឧស្សាហកម្មកម្ពុជាកសាងសមត្ថភាពដែលត្រូវការដើម្បីផ្គត់ផ្គង់គ្រឿងបន្លាស់សម្រាប់ប្រព័ន្ធថាមពលស្អាតនៅកន្លែងផ្សេងទៀត៕
Account
Security
Favourite Content