ភ្នំពេញ ៖ ការផ្សព្វផ្សាយ និងលើកកម្ពស់ចំណេះដឹងហិរញ្ញវត្ថុជូនដល់ប្រជាពលរដ្ឋ បានក្លាយជារបៀបវារៈមួយដ៏សំខាន់ ខណៈគេជឿជាក់ថា នៅពេលប្រជាពលរដ្ឋមានចំណេះដឹងហិរញ្ញវត្ថុគ្រប់គ្រាន់ នឹងធ្វើឱ្យវិស័យហិរញ្ញវត្ថុ ក៏ដូចជាសហគមន៍ និងសង្គមជាតិទាំងមូលរីកចម្រើនកាន់តែឆាប់រហ័ស និងប្រកបដោយនិរន្តរភាព។

លោក សុខ វឿន ប្រធានក្រុមប្រឹក្សាភិបាល សមាគមមីក្រូហិរញ្ញវត្ថុកម្ពុជា និងជាប្រធាននាយកប្រតិបត្តិនៃគ្រឹះស្ថានមីក្រូហិរញ្ញវត្ថុ អិលអូអិលស៊ី (LOLC) បានថ្លែងប្រាប់ AMS ថា ធនាគារជាតិនៃកម្ពុជា សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា តែងតែយកចិត្តទុកដាក់ និងបានសហការគ្នាយ៉ាងជិតស្និទ្ធដើម្បីលើកកម្ពស់ចំណេះដឹងហិរញ្ញវត្ថុ និងការអនុវត្តនូវកិច្ចការពារអតិថិជនយ៉ាងយកចិត្តទុកដាក់បំផុត។

លោកបានបន្តថា កន្លងមកសមាគមក៏ធ្លាប់បានសិក្សាលើបញ្ហាមួយចំនួនដែលទទួលបានពីកិច្ចស្រាវជ្រាវដោយ    ស្ថាប័នឯករាជ្យ ការផ្តល់មតិកែលម្អ និងបណ្តឹងមួយចំនួនពីអតិថិជន។ ជាលទ្ធផលឃើញថា បញ្ហាភាគច្រើនកើតឡើងពាក់ព័ន្ធនឹងចំណេះដឹងហិរញ្ញវត្ថុ។

លោកបានឱ្យដឹងបន្តថា៖

«ដោយយោងលើចំណុចទាំងអស់នេះហើយ ទើបបានជាសមាគមជំរុញ និងលើកទឹកចិត្តដល់សមាជិករបស់ខ្លួនទាំងអស់ឱ្យចូលរួម និងលើកកម្ពស់ចំណេះដឹងហិរញ្ញវត្ថុជូនដល់ប្រជាពលរដ្ឋដើម្បីជំរុញបន្ថែមភាពវិជ្ជមានក្នុងវិស័យ និងស្ថិរភាពរយៈពេលវែងសម្រាប់សង្គមជាតិយើងទាំងមូល»។

ស្របពេលជាមួយគ្នានេះ ឯកឧត្តម រ័ត្ន សុវណ្ណនរៈ ទេសាភិបាលរង ធនាគារជាតិនៃកម្ពុជា ក៏ធ្លាប់មានប្រសាសន៍ឱ្យដឹងដែរថា ៖

“ធនាគារជាតិនៃកម្ពុជា បានកំណត់យកចំណេះដឹងផ្នែកហិរញ្ញវត្ថុជាសសរស្ដម្ភដ៏សំខាន់ក្នុងការលើកកម្ពស់សេដ្ឋកិច្ចឌីជីថល និងជំរុញលទ្ធភាពស្មើគ្នាក្នុងការទទួលបានសេវាហិរញ្ញវត្ថុ និងភាពជាសហគ្រិន”។

គួររំលេចថា ឆ្លើយតបនឹងការលើកឡើងខាងលើ គេសង្កេតឃើញមានធនាគារ និងគ្រឹះស្ថានហិរញ្ញវត្ថុភាគច្រើនបានចូលរួមផ្សព្វផ្សាយចំណេះដឹងហិរញ្ញវត្ថុទៅកាន់អតិថិជនរបស់ខ្លួន ក្នុងនោះ អិលអូអិលស៊ី (LOLC) ដែលជាគ្រឹះស្ថានមីក្រូហិរញ្ញវត្ថុដ៏ធំមួយនៅកម្ពុជា ក៏បានចូលរួមយ៉ាងសកម្មលើកិច្ចការងារនេះ ដោយបានផ្សព្វផ្សាយលើបណ្តាញនានារបស់ខ្លួន ក៏ដូចជារៀបចំវគ្គបណ្តុះបណ្តាលផ្សព្វផ្សាយអប់រំចំណេះដឹងផ្នែកហិរញ្ញវត្ថុទៅកាន់អតិថិជន នៅតាមបណ្តាខេត្ត រាជធានីជាច្រើនក្រោមប្រធានបទស្តីពីការគ្រប់គ្រង “ចំណូល និងចំណាយ” “ការគ្រប់គ្រងហិរញ្ញវត្ថុផ្ទាល់ខ្លួន” និងសកម្មភាពជាច្រើនទៀត ដើម្បីឱ្យពួកគាត់យល់ដឹងទាក់ទងទៅនឹងចំណេះដឹងផ្នែកហិរញ្ញវត្ថុ និងកំណត់ផែនការហិរញ្ញវត្ថុច្បាស់លាស់ និងមានប្រសិទ្ធភាពខ្ពស់៕