ក្រូចក្រសាំង ឬក្រូចខៀវ ជាក្រូចមួយប្រភេទដែលពុំសូវមានគេនិយមដាំដូចក្រូចពោធិ៍សាត់នោះទេ ក៏ប៉ុន្តែតាមរយៈអ្នកធ្លាប់ដាំក្រូចប្រភេទនេះបានឱ្យដឹងថា វាងាយស្រួលដាំ មិនត្រូវការថែទាំច្រើន ពិសេសគឺឱ្យផលបានច្រើន និងមានផ្លែខួបប្រាំង-ខួបវស្សាតែម្ដង។

លោក អែម លី ម្ចាស់ចំការក្រូចក្រសាំងមួយកន្លែងស្ថិតនៅស្រុកស្អាង ខេត្តកណ្ដាល បានមានប្រសាសន៍ប្រាប់ឱ្យដឹងថា លោកបានដាំក្រូចក្រសាំងនេះជាយូរមកហើយ ដោយសារមើលឃើញថា មិនសូវមានគេដាំច្រើន ហើយក្រូចនេះផ្លែអត់មានរដូវទេ ឱ្យតែមានទឹកគឺផ្លែខួបប្រាំងខួបវស្សាតែម្ដង។

លោកបន្ថែមថា បច្ចុប្បន្នចំការរបស់លោកមានក្រូចក្រសាំងប្រមាណ ៣០០ដើម ដោយភាគច្រើនពេញផ្លែចាប់ពីខែធ្នូទៅ ពោលគឺផ្លែគ្រប់មែកស្អេកស្កះតែម្ដង ហើយមួយដើមអាចបេះបានដល់ទៅ ២០០គីឡូក្រាមក៏មាន។  ចំណែកតម្លៃក្រូចនេះវិញ យើងអាចលក់បានប្រមាណ ៥០០០រៀលក្នុងមួយគីឡូក្រាម ដោយនៅរដូវពេញផ្លែ អាចបេះបានប្រមាណ ១០០-៥០០គីឡូក្រាមអាស្រ័យតាមការកម្ម៉ង់របស់អតិថិជន ដែលមានទាំងម៉ូយមកទិញដល់ចំការ និងមានគេកម្ម៉ង់ទិញតាមអនឡាញផងដែរ។  

ម្ចាស់ចំការរូបនេះបញ្ជាក់ទៀតថា ប្រភេទក្រូចក្រសាំងនេះ ផ្លែរបស់វាគឺមានទឹកច្រើន ងាយស្រួលក្នុងការគៀប ឬច្របាច់យកទឹកមកទទួលទាន។ មិនថាខែប្រាំង ឬវស្សានេះទេ ឱ្យតែស្រោចទឹក វាចាប់ផ្ដើមចេញផ្កា ចេញផ្លែទៀតតែម្ដង ហើយបើស្រោចទឹកបានគ្រប់គ្រាន់គឺវាកាន់តែរីកផ្លែបានកាន់តែធំល្អ។

គួរបញ្ជាក់ដែរថា លោក អែម លី បានចាប់ផ្ដើមដាំក្រូចក្រសាំងប្រមាណ ៧ឆ្នាំមកហើយ ដោយពីមុនដីនេះជាដីដាំបន្លែទេ តែដោយសារឃើញក្រូចនេះមានផ្លែច្រើន ឆ្ងាញ់ ល្អចំពោះសុខភាព ជំនួយកម្លាំង ទើបលោកសម្រេចចិត្តទិញពូជយកមកដាំជាបន្តបន្ទាប់រហូតដល់បច្ចុប្បន្ន។

ដោយឡែក ការដាំក្រូចក្រសាំងក៏មិនមានអ្វីខុសពីការដាំដំណាំផ្សេងទៀតដែរ ដោយគេត្រូវកាប់រណ្ដៅរាងធំបន្តិច ដាក់ជីនៅបាតរណ្ដៅ និងដាក់ដាំមែកដែលសាកហើយ។ ការដាំដោយប្រើការសាកមែកនេះគឺវាឆាប់បានផ្លែ ហើយកសិករគួរដាំឃ្លាតគ្នាចន្លោះពី ៥-៦ម៉ែត្របួនជ្រុងក្នុងមួយគុម្ព ដើម្បីឱ្យក្រូចអាចចេញមែកល្អ មែកកាន់តែធំ វាកាន់តែផ្លែច្រើន ហើយក៏ទូលាយងាយស្រួលបេះផងដែរ។ ចុងក្រោយ លោក អែម លី ក៏មានមតិផ្តាំផ្ញើខ្ផងដែរលះ ជាពិសេសសម្រាប់អ្នកមានដីទំនេរ គួរតែដាំក្រូចក្រសាំងនេះ មិនបាច់មានដីធំរាប់ហិកតានោះទេ ដោយអាចដាំបានត្រឹម ១-២ដើមក៏បាន ព្រោះក្រូចនេះវាឆ្ងាញ់ផង ផ្ដល់កម្លាំងផង និងជំនួយដល់ការចងចាំទៀតផង៕