សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ប្រធានាធិបតីចិន លោក Xi Jinping កាលពីថ្ងៃពុធ សប្ដាហ៍នេះ ក្នុងពេលជួបជាមួយរដ្ឋមន្ត្រីការបរទេសវៀតណាម លោក Le Hoai Trung នៅទីក្រុងប៉េកាំង បានជំរុញឱ្យវៀតណាមពង្រឹងកិច្ចសហប្រតិបត្តិការ និងលើកកម្ពស់មិត្តភាពឱ្យកាន់តែស៊ីជម្រៅ។
យោងតាមក្រសួងការបរទេសចិនបានឲ្យដឹងថា លោក Xi Jinping បានយកចិត្តទុកដាក់ក្នុងកិច្ចអភិវឌ្ឍន៍ និងលើកកម្ពស់ទំនាក់ទំនងជាមួយវៀតណាមឲ្យកាន់តែប្រសើរឡើង ក្នុងឆន្ទៈបន្តលើកកម្ពស់មិត្តភាពឲ្យកាន់តែស៊ីជម្រៅ ដើម្បីពង្រឹងកិច្ចសហប្រតិបត្តិការលើគ្រប់វិស័យ និងសិក្សាពីភាពខុសគ្នាឱ្យបានត្រឹមត្រូវក្នុងស្មារតីជាអ្នកជិតខាងល្អ មិត្តល្អ និងដៃគូល្អ។
ទន្ទឹមនឹងនេះ រដ្ឋមន្ត្រីការបរទេសវៀតណាម លោក Le Hoai Trung បានបង្ហាញពីការត្រៀមខ្លួនរួចជាស្រេចរបស់វៀតណាមក្នុងការជំរុញទំនាក់ទំនងទ្វេភាគីទៅកាន់កម្រិតថ្មីមួយ។ ក្នុងអំឡុងពេលកិច្ចប្រជុំជាមួយកាលពីថ្ងៃអង្គារ៍ រដ្ឋមន្ត្រីការបរទេសចិន លោក Wang Yi ក៏បានបង្ហាញពីការគាំទ្រសម្រាប់ការរួបរួមយ៉ាងជិតស្និទ្ធជាមួយវៀតណាម ដោយលើកឡើងថា ទីក្រុងប៉េកាំង និងទីក្រុងហាណូយគួរតែរួបរួមគ្នា និងសហការគ្នាយ៉ាងជិតស្និទ្ធ ដើម្បីធានានូវអាទិភាពទាំងសងខាងសម្រាប់ការអភិវឌ្ឍន៍ និងសន្តិសុខ ការពារប្រព័ន្ធអន្តរជាតិយ៉ាងរឹងមាំជាមួយអង្គការសហប្រជាជាតិជាស្នូល និងសណ្តាប់ធ្នាប់ពិភពលោកដែលគាំទ្រដោយច្បាប់អន្តរជាតិ។
យោងតាមសេចក្តីថ្លែងការណ៍របស់រដ្ឋាភិបាលវៀតណាមបានឲ្យដឹងថា រដ្ឋមន្ត្រីការបរទេសទាំងពីរបានពិភាក្សាអំពីការអនុវត្តកិច្ចព្រមព្រៀងកម្រិតខ្ពស់ រួមទាំងបញ្ហាក្នុងតំបន់ និងពិភពលោក ដោយសន្យាពង្រឹងការសម្របសម្រួលពហុភាគី និងធ្វើឱ្យការរួមចំណែកប្រកបដោយការទទួលខុសត្រូវចំពោះសន្តិភាព កិច្ចសហប្រតិបត្តិការ និងការអភិវឌ្ឍន៍។ លើសពីនេះ រដ្ឋមន្ត្រីការបរទេសវៀតណាម លោក Le Hoai Trung បានស្នើឱ្យមានការបង្កើនកិច្ចសហប្រតិបត្តិការនៅក្នុងវិស័យសំខាន់ៗដែលកំពុងរីកចម្រើនដូចជា វិទ្យាសាស្ត្រ បច្ចេកវិទ្យា និងនវានុវត្តន៍ ក៏ដូចជាការពន្លឿនការតភ្ជាប់ផ្នែកដឹកជញ្ជូន ជាពិសេសផ្លូវដែក។ គួរឲ្យបញ្ជាក់ដែរថា កាលពីខែកុម្ភៈ ឆ្នាំ ២០២៥ រដ្ឋាភិបាលវៀតណាមបានអនុម័តគម្រោងសាងសង់ផ្លូវរថភ្លើង Lao Cai-Hanoi-Hai Phong តម្លៃជាង ៨ ពាន់លានដុល្លារ ដែលជាគម្រោងដ៏សំខាន់មួយសម្រាប់តភ្ជាប់ក្នុងតំបន់ចំនួន ៦ ខេត្ត និងជំរុញការអភិវឌ្ឍន៍សេដ្ឋកិច្ចនៅភាគខាងជើងវៀតណាម ជាពិសេសជាប់ព្រំប្រទល់ខេត្តយូណាន ភាគនិរតីនៃប្រទេសចិន ដែលគម្រោងនេះត្រូវបានចាប់ផ្តើមសាងសាង់កាលពីអំឡុងខែធ្នូ ឆ្នាំ ២០២៥៕
Account
Security
Favourite Content