សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
រាជរដ្ឋាភិបាលកម្ពុជាបន្តយកចិត្តទុកដាក់លើការថែទាំ និងផ្តល់ការគាំទ្រដល់គម្រោងវិនិយោគដែលមានស្រាប់ ខណៈបន្តខិតខំទាក់ទាញវិនិយោគិនថ្មីៗ ដើម្បីជំរុញការពង្រីកទុនវិនិយោគ និងការរីកចម្រើនប្រកបដោយចីរភាពនៅកម្ពុជា។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) ដឹកនាំគណៈប្រតិភូជាន់ខ្ពស់ចុះទស្សនកិច្ចផ្ទាល់នៅរោងចក្រផលិតស៊ីម៉ងត៍ Kampot Cement កាលពីថ្ងៃទី២៨ ខែកក្កដា ឆ្នាំ២០២៦ ស្ថិតក្នុងភូមិសាស្ត្រស្រុកបន្ទាយមាស និងស្រុកដងទង់ ខេត្តកំពត។
ដំណើរទស្សនកិច្ចនេះមានគោលបំណងពិនិត្យផ្ទាល់អំពីប្រតិបត្តិការរបស់រោងចក្រ ពាក់ព័ន្ធនឹងការគ្រប់គ្រងសង្វាក់ផលិតកម្ម ការប្រើប្រាស់បច្ចេកវិទ្យាទំនើបសម្រាប់ត្រួតពិនិត្យគុណភាពស៊ីម៉ងត៍ឱ្យស្របតាមបទដ្ឋានអន្តរជាតិ ព្រមទាំងជួបសំណេះសំណាលជាមួយបុគ្គលិក កម្មករ និយោជិត និងតំណាងចែកចាយធំៗរបស់ក្រុមហ៊ុន។
ក.អ.ក. បានឱ្យដឹងថា សកម្មភាពនេះជាសក្ខីកម្មនៃការអនុវត្តសេវាថែទាំវិនិយោគ (Investment Aftercare Service) របស់រាជរដ្ឋាភិបាល តាមរយៈការយកចិត្តទុកដាក់ និងផ្តល់ការគាំទ្រយ៉ាងជិតស្និទ្ធដល់គម្រោងវិនិយោគដែលមានស្រាប់។
ក.អ.ក. បានឱ្យដឹងទៀតថា ការថែទាំវិនិយោគិនចាស់មានគោលដៅធានាឱ្យប្រតិបត្តិការអាជីវកម្មអាចបន្តរីកចម្រើនប្រកបដោយចីរភាព និងជំរុញឱ្យវិនិយោគិនពង្រីកទុនវិនិយោគបន្ថែមនៅកម្ពុជា ខណៈការទាក់ទាញវិនិយោគិនថ្មីក៏នៅតែជាអាទិភាពសំខាន់មួយរបស់រាជរដ្ឋាភិបាល។
ក្នុងឱកាសនោះ ឯកឧត្តម ស៊ុន ចាន់ថុល បានសម្តែងការកោតសរសើរចំពោះគំនិតផ្តួចផ្តើម និងការយកចិត្តទុកដាក់របស់ក្រុមហ៊ុនលើការកាត់បន្ថយកាបូន និងការការពារបរិស្ថាន ជាពិសេសតាមរយៈការអនុវត្តបច្ចេកទេសអាជីវកម្មរ៉ែបៃតង (Green Mining)។
ក្រុមហ៊ុនបានអនុវត្តបច្ចេកទេស Semi-Open Cut Mining ដោយរក្សាកំពែងធម្មជាតិ និងព្រៃឈើជុំវិញភ្នំ ដើម្បីកាត់បន្ថយធូលី សំឡេង និងរំញ័រ ព្រមទាំងការពារប្រព័ន្ធអេកូឡូស៊ី និងកាត់បន្ថយផលប៉ះពាល់ដល់សហគមន៍ជុំវិញ។ ក្រុមហ៊ុនក៏បានរៀបចំការស្តារគម្របបៃតងឡើងវិញតាមរយៈការដាំដើមឈើ និងរៀបចំផ្ទៃដីឡើងវិញភ្លាមៗ បន្ទាប់ពីការកាយយកថ្ម។
ឯកឧត្តម ស៊ុន ចាន់ថុល ក៏បានវាយតម្លៃខ្ពស់ចំពោះការរួមចំណែករបស់ក្រុមហ៊ុនក្នុងការអភិវឌ្ឍមូលធនមនុស្សនៅកម្ពុជា តាមរយៈការផ្តល់អាហារូបករណ៍ដល់សិស្ស-និស្សិត និងការផ្ទេរចំណេះដឹង ព្រមទាំងបច្ចេកទេសទំនើបដល់បុគ្គលិក កម្មករ និងនិយោជិតក្នុងស្រុក ស្របតាមការវិវត្តនៃបច្ចេកវិទ្យាឧស្សាហកម្មសម័យថ្មី។
ក្នុងដំណើរទស្សនកិច្ចនេះ ថ្នាក់ដឹកនាំ ក.អ.ក. និងគណៈគ្រប់គ្រងក្រុមហ៊ុនក៏បានរួមគ្នាដាំកូនឈើជានិម្មិតរូបនៅមជ្ឈមណ្ឌលសិក្សាជីវចម្រុះ និងនៅលើកំពូលភ្នំទទុង ដើម្បីបង្ហាញពីការប្តេជ្ញាចិត្តរួមគ្នារវាងរដ្ឋ និងវិស័យឯកជន ក្នុងការស្តារគម្របបៃតង និងលើកកម្ពស់ការធ្វើអាជីវកម្មរ៉ែប្រកបដោយការទទួលខុសត្រូវចំពោះបរិស្ថាន និងសង្គម។
ក្រុមហ៊ុន Kampot Cement Co., Ltd. បានចាប់ផ្តើមដំណើរការអាជីវកម្មតាំងពីឆ្នាំ ២០០៦ និងមានសមត្ថភាពផលិតស៊ីម៉ងត៍ប្រមាណ ២ លានតោនក្នុងមួយឆ្នាំ។ រោងចក្រនេះបាន និងកំពុងចូលរួមចំណែកផ្គត់ផ្គង់តម្រូវការស៊ីម៉ងត៍សម្រាប់ទីផ្សារសំណង់ក្នុងស្រុក កាត់បន្ថយការនាំចូលពីបរទេស និងគាំទ្រដល់ការអភិវឌ្ឍហេដ្ឋារចនាសម្ព័ន្ធនៅកម្ពុជា។
Account
Security
Favourite Content