សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ក្រោយពីមានភាពរកាំរកូសលើការនាំចេញត្រី និងបង្គាជិតពីរខែ មេដឹកនាំម៉ាឡេស៊ី និងថៃបានជួបពិភាក្សាគ្នាដោះស្រាយបញ្ចប់បញ្ហានេះរួចរាល់ ព្រមទាំងប្តេជ្ញាពង្រឹងពាណិជ្ជកម្មទ្វេភាគីឱ្យដល់គោលដៅ ៣០ ពាន់លានដុល្លារត្រឹមឆ្នាំ ២០២៧។ នេះបើយោងតាមការរាយការណ៍ពី CNA។
ការរកាំរកូសចាប់ផ្តើមនៅក្នុងខែឧសភា បន្ទាប់ពីទីក្រុងបាងកករឹតបន្តឹងការនាំចូលត្រី Sea Bass ពីម៉ាឡេស៊ី ក្រោមហេតុផលព្រួយបារម្ភអំពីសំណល់គីមីនៅក្នុងត្រី។ ជាការឆ្លើយតប ម៉ាឡេស៊ីអនុវត្តការហាមឃាត់ការនាំចូលបង្គា ៥ ប្រភេទពីថៃចាប់តាំងពីថ្ងៃទី ១ ខែមិថុនាមកម្ល៉េះ ក្រោមហេតុផលព្រួយបារម្ភពីសុវត្ថិភាពចំណីអាហារ។
ផលប៉ះពាល់កើតឡើងទៅលើប្រទេសទាំងពីរ ដោយក្រុមអ្នកនាំចេញបង្គារបស់ថៃជួបប្រទះនឹងការលុបចោល ឬ ពន្យារពេលកុម្ម៉ង់ពីម៉ាឡេស៊ី ដែលធ្វើឱ្យចំណាយលើការរក្សាទុកកើនឡើង។ ប្រសិនបើបង្គាទាំងនោះត្រូវបង្វែរមកលក់ក្នុងស្រុកវិញ វាអាចធ្វើឱ្យតម្លៃបង្គាក្នុងស្រុកចុះថោក ដែលប៉ះពាល់ដល់ប្រាក់ចំណេញរបស់អ្នកចិញ្ចឹម។
ឧស្សាហកម្មបង្គារបស់ថៃកំពុងជួបការលំបាកស្រាប់ទៅហើយ ដោយសារបញ្ហាជំងឺ និងការប្រែប្រួលអាកាសធាតុ រួមជាមួយនឹងការកើនឡើងនៃការប្រកួតប្រជែងពីប្រទេសអាស៊ីដូចជា ឥណ្ឌា វៀតណាម និងឥណ្ឌូណេស៊ី។
ផលប៉ះពាល់លើប្រទេសម៉ាឡេស៊ីវិញ គឺអ្នកលក់គ្រឿងសមុទ្រត្អូញត្អែរថា អាជីវកម្មរបស់ពួកគេដើរយឺត ដោយសារខ្វះខាតបង្គានាំចូលពីថៃដែលមានតម្លៃធូរថ្លៃជាង។ ដូច្នោះហើយ ពួកគេត្រូវបង្ខំចិត្តទិញបង្គាក្នុងស្រុកដែលមានតម្លៃថ្លៃជាង ដែលធ្វើឱ្យចំនួនអ្នកទិញក៏ថយចុះតាមនោះដែរ។
បន្ទាប់ពីជំនួបពិភាក្សាទ្វេភាគីបិទទ្វារកាលពីថ្ងៃព្រហស្បតិ៍កន្លងទៅនេះ លោក អាន់វ៉ា បានថ្លែងនៅក្នុងសន្និសីទសារព័ត៌មានរួមគ្នាជាមួយនាយករដ្ឋមន្ត្រីថៃ លោក អានុទីន ឆានវីរ៉ាកុល ថា ‘ខាងភាគីរដ្ឋមន្ត្រីចង់ឱ្យអនុស្សរណៈនៃការយោគយល់គ្នា (MOU) នេះមានប្រសិទ្ធភាពក្នុងរយៈពេលមួយខែ ប៉ុន្តែយើងបានព្រមព្រៀងគ្នាឱ្យវាមានប្រសិទ្ធភាពក្នុងរយៈពេលត្រឹមតែមួយសប្តាហ៍ប៉ុណ្ណោះ។’
ទន្ទឹមនឹងនេះ លោក អានុទីន កំពុងបំពេញទស្សនកិច្ចផ្លូវការរយៈពេលពីរថ្ងៃនៅប្រទេសម៉ាឡេស៊ី។ នាយករដ្ឋមន្ត្រីថៃរូបនេះ លើកឡើងថា ភាគីទាំងពីរបានស្វាគមន៍ចំពោះលទ្ធផលនៃជំនួបរវាងរដ្ឋមន្ត្រីកសិកម្មនៃប្រទេសទាំងពីរនាពេលកន្លងមក ក្នុងការស្វែងរកដំណោះស្រាយដោយសន្តិវិធី។
នៅក្នុងឱកាសនោះផងដែរ មេដឹកនាំទាំងពីរបានអញ្ជើញជាអធិបតី និងជាសាក្សីក្នុងពិធីផ្លាស់ប្តូរអនុស្សរណៈនៃការយោគយល់គ្នា (MOU) ស្តីពីកិច្ចសហប្រតិបត្តិការលើវិស័យកសិកម្មរវាងរដ្ឋមន្ត្រីក្រសួងកសិកម្ម និងសន្តិសុខស្បៀងម៉ាឡេស៊ី លោក Datuk Seri Mohamed Sabu និង រដ្ឋមន្ត្រីក្រសួងកសិកម្ម និងសហករណ៍ថៃ លោក Suriya Jungrungreangkit។
យោងតាមសេចក្តីថ្លែងការណ៍របស់ក្រសួងកសិកម្ម និងសន្តិសុខស្បៀងម៉ាឡេស៊ី បានឱ្យដឹងថា អនុស្សរណៈនៃការយោគយល់គ្នា (MOU) នេះផ្តល់នូវក្របខណ្ឌគ្រប់ជ្រុងជ្រោយដែលគ្របដណ្តប់លើផ្នែកជាច្រើនរួមមាន ដំណាំ, បសុសត្វ, ជលផល, ការសម្របសម្រួលពាណិជ្ជកម្ម និងការទីផ្សារផលិតផលកសិកម្ម, ការស្រាវជ្រាវ និងការអភិវឌ្ឍ (R&D), ការកសាងសមត្ថភាព, និង វិធានការអនាម័យជាដើម។
លើសពីនេះ នាយករដ្ឋមន្ត្រីទាំងពីរបានបញ្ជាក់ថា ប្រទេសទាំងពីរក៏បានព្រមព្រៀងគ្នាលើការបង្កើនការតភ្ជាប់ឆ្លងកាត់ព្រំដែន ការអភិវឌ្ឍតំបន់សេដ្ឋកិច្ចពិសេស និងការកែលម្អវិធានការកាត់បន្ថយទឹកជំនន់។
នៅថ្ងៃសុក្រនេះ មេដឹកនាំទាំងពីរចូលរួមជាអធិបតីបើកសម្ពោធផ្លូវតភ្ជាប់រវាងប៉ុស្តិ៍ត្រួតពិនិត្យព្រំដែនគោក Bukit Kayu Hitam របស់ម៉ាឡេស៊ី និង ប៉ុស្តិ៍ត្រួតពិនិត្យព្រំដែនគោក CIQ Sadao របស់ថៃ ជាមួយនឹងការប្តេជ្ញាជំរុញតំបន់សេដ្ឋកិច្ចពិសេសតាមព្រំដែន និង បង្កើតក្រុមការងាររួមមួយដើម្បីប្រយុទ្ធប្រឆាំងនឹងបទល្មើសឆ្លងដែន។ ក្រៅពីនេះ ម៉ាឡេស៊ី និង ថៃបង្កើនកិច្ចសហការតាមដានកម្រិតទឹក និងការពារទឹកជំនន់នៅអាងទន្លេកូឡុកផងដែរ។
លោក អាន់វ៉ា សង្កត់ធ្ងន់ថា ទាំងម៉ាឡេស៊ី និងថៃត្រូវតែខិតខំប្រឹងប្រែងរួមគ្នាដើម្បីសម្រេចឱ្យបាននូវគោលដៅពាណិជ្ជកម្មទ្វេភាគីចំនួន ៣០ ពាន់លានដុល្លារត្រឹមឆ្នាំ ២០២៧ ខណៈដែលលោក អានុទីន បានបង្ហាញជំនឿចិត្តយ៉ាងមុតមាំថា គោលដៅពាណិជ្ជកម្មនេះនឹងអាចសម្រេចបានក្នុងពេលឆាប់ៗខាងមុខ។
មិនត្រឹមតែប៉ុណ្ណោះ ប្រទេសទាំងពីរប្តេជ្ញាជំរុញការអនុវត្តគម្រោងតភ្ជាប់ផ្សេងៗដូចជា បណ្តាញអគ្គិសនីអាស៊ាន និង ការបង្កើនការតភ្ជាប់តាមបណ្តោយព្រំដែន Rantau Panjang-Sungai Golok។
លោក អាន់វ៉ា បង្ហើបដែរថា លោក អានុទីន បានសម្តែងការកោតសរសើរចំពោះតួនាទីយ៉ាងសកម្មរបស់ម៉ាឡេស៊ីក្នុងការសម្របសម្រួលកិច្ចសន្ទនា និងកិច្ចខិតខំប្រឹងប្រែងស្វែងរកសន្តិភាពនៅក្នុងតំបន់អាស៊ាន រួមទាំងការដោះស្រាយជម្លោះរវាងប្រទេសថៃ និងកម្ពុជាផងដែរ៕
Account
Security
Favourite Content