ភ្នំពេញ ៖ ស្របជាមួយនឹងភាពងាយស្រួលនៃបច្ចេកវិទ្យាហិរញ្ញវត្ថុនាពេលបច្ចុប្បន្ន វាក៏បានបង្កជាផលលំបាកដល់ប្រជាជនក្នុងការគ្រប់គ្រងប្រាក់កាស់របស់ខ្លួនផងដែរ។ លំបាកក៏ដោយសារតែការចំណាយនានាអាចធ្វើឡើងបានដោយមិនទាមទារឱ្យកាន់សាច់ប្រាក់ទៅទូទាត់ ពោលគឺស្នាក់នៅតែក្នុងផ្ទះក៏អាចចាយវាយបាន។

ចេញពីបទពិសោធន៍ផ្ទាល់ខ្លួន លោក ទុំ សុភានុ ដែលជាអតិថិជនរបស់គ្រឹះស្ថានហិរញ្ញវត្ថុ បានឱ្យ​ដឹងថា ភាពងាយស្រួលនៃសង្គមឌីជីថលនេះ បានធ្វើឱ្យមនុស្សភាគច្រើន​ដើរហួសបន្ទាត់​សន្សំ ហើយដល់ពេលខ្លះក៏ធ្លាក់ក្នុងបំណុលទៀតផង។

បើតាមលោក ទុំ សុភានុ ការសន្សំមិនមែនមានន័យថា ជាការកាត់ចំណាយទាំងអស់ទេ ក៏មិនមែន​ជាការកាត់បន្ថយស្តង់ដារនៃការរស់នៅដែរ ប៉ុន្តែវាជាការកាត់បន្ថយចំណាយដែលមិនចាំបាច់។ វាជាការចេះបែងចែកចំណាយទៅជា ៣កម្រិតធំៗរួមមាន កម្រិតទាបបំផុត គួរឱ្យទៅលើការ​ចំណាយ​ដែលមិនចាំបាច់ កម្រិតមធ្យមគួរបែងចែកដាក់ជាប្រាក់សន្សំ និងកម្រិតខ្ពស់ ជាអាទិភាព​សម្រាប់​ចំណាយដែលចាំបាច់ ដែលយើងម្នាក់ៗត្រូវការដើម្បីរស់រាន។

ថ្លែងក្នុងវេទិកា «ទិវាសន្សំអាស៊ាន» កាលពីពេលកន្លងទៅ លោក សុភានុ បន្តចែករំលែកទៀតថា៖​

«ខ្ញុំតែងតែប្រើច្បាប់ ៥០ ៣០ ២០ ដែលមានន័យថា បើខ្ញុំរកបាន១ខែ ១០០ដុល្លារ គឺ៥០ដុល្លារ​នឹងជាលុយសម្រាប់ចំណាយចាំបាច់ ៣០ដុល្លារសម្រាប់សន្សំ និង២០ដុល្លារសម្រាប់ជាកាដូ​ឱ្យខ្លួនឯង»។

ក្នុងនាមជាអ្នកអនុវត្តការសន្សំ លោក សុភានុ បានអះអាងថា ការសន្សំគឺជាហេតុផលដ៏ធំ​មួយ​ក្នុងការបង្កើនគុណភាពនៃការរស់នៅ។

កញ្ចប់សន្សំមួយកញ្ចប់ អាចកសាងសុខភាពផ្លូវចិត្តដ៏ល្អមួយសម្រាប់បុគ្គល ដោយកាត់បន្ថយការ ព្រួលបារម្ភផ្សេងៗ និងអាចដោះទាល់នៅពេលមានករណីអាសន្នណាមួយ។

សម្រាប់លោក ការសន្សំនេះក៏ស្មើទៅនឹងការផ្លាស់ប្ដូរជីវភាពរបស់លោកផងដែរ។ ផ្លាស់ប្ដូរជីវភាពនៅ ត្រង់នេះមិនមែនមានន័យថា សន្សំដើម្បីមានបាននោះទេ ប៉ុន្តែសន្សំដើម្បីមានដើមទុនក្នុងការបើក អាជីវកម្ម ឬចាប់ផ្ដើមកិច្ចការណាមួយ ដើម្បីបង្កើនប្រាក់ចំណូល។

លើសពីនេះ ប្រាក់សន្សំអាចជួយឱ្យសម្រេចគោលដៅទៅថ្ងៃអនាគត តាមរយៈការទិញទ្រព្យទុក ដូចចាការទិញដី ទិញផ្ទះជាដើម។

ក្រៅតែពីផលប្រយោជន៍ខាងលើនេះ លោក សុភានុ ក៏បានបន្តសង្កត់ធ្ងន់ផងដែរថា៖

«ការសន្សំក៏​បានផ្លាស់​ប្ដូរទម្លាប់នៃការរស់នៅរបស់ខ្ញុំ ព្រោះខ្ញុំដឹងថា ចំណាយដែលមិនចាំបាច់គឺត្រូវកាត់បន្ថយ ដើម្បីបន្ថែមលើចំណាយដែលចាំបាច់។ ដូច្នេះវាក៏ជះឥទ្ធិពលលើការរស់នៅរបស់យើងដូចគ្នា រឿងមិនចាំបាច់ក៏យើងលែងសូវធ្វើ យើងងាកមកធ្វើរឿងណាដែលយើងគិតថាចាំបាច់។»

យ៉ាងណាមិញ នៅក្នុងការសន្សំវិញ លោកលើកទឹកចិត្តឱ្យជ្រើសរើសយកការសន្សំបែបវៃឆ្លាត តាមរយៈការយកប្រាក់ទៅដាក់នៅគ្រិះស្ថានធនាគារ ឬមីក្រូហិរញ្ញវត្ថុ ដើម្បីយកការប្រាក់៕