សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ឆ្នាំ ២០២៦ នេះ វិស័យអចលនទ្រព្យនៅក្នុងប្រទេសកម្ពុជា នៅតែបន្តមានកំណើនយឺត ដោយមិនទាន់មានសន្ទុះងើបឡើងខ្ពស់នៅឡើយ ហើយបើតាមការរំពឹងទុករបស់រាជរដ្ឋាភិបាលកម្ពុជា វិស័យនេះ អាចនឹងឡើងត្រឹម ០,៦ ភាគរយប៉ុណ្ណោះ ក្នុងឆ្នាំ ២០២៦ នេះ។
បើតាមក្របខ័ណ្ឌហិរញ្ញវត្ថុសាធារណៈរយៈពេលមធ្យមឆ្នាំ ២០២៧-២០២៩ របស់រាជរដ្ឋាភិបាលកម្ពុជា បានឱ្យដឹងថា ក្នុងឆ្នាំ ២០២៦ វិស័យអចលនទ្រព្យនៅតែបន្តមាននិន្នាការថមថយ ដោយរំពឹងថាវាមានកំណើនក្នុងអត្រា ០,៦ ភាគរយប៉ុណ្ណោះ ដោយសារកម្មវិបាកជាអវិជ្ជមាននៃភាពមិនប្រាកដប្រជានៃកត្តាសេដ្ឋកិច្ច និងផលរំខាននៃការបង្ក្រាប និងទប់ស្កាត់សកម្មភាពឆបោកតាមប្រព័ន្ធបច្ចេកវិទ្យា ក្នុងរយៈពេលខ្លះ មកលើសកម្មភាពទិញ-លក់ ជារួម ជាពិសេសអគារិយាល័យ និងអគារប្រើប្រាស់ចម្រុះ។
ទោះជាយ៉ាងនេះក្ដី ការបន្តអនុវត្តវិធានការ ៨ ចំណុច ជាពិសេសលើការលើកលែងពន្ធប្រថាប់ត្រាចំពោះការទិញ-លក់ និងផ្ទេរកម្មសិទ្ធិលំនៅឋាន មានតម្លៃក្រោម ២១ ម៉ឺនដុល្លារអាម៉េរិក ក៏រំពឹងថា ជួយគាំពារកំណើននៃវិស័យនេះ។
បើតាមក្របខ័ណ្ឌហិរញ្ញវត្ថុសាធារណៈបានឱ្យដឹងថា ក្នុងឆ្នាំ ២០២៥ កន្លងទៅ វិស័យអចលនទ្រព្យ ត្រូវបានវាយតម្លៃថាបន្តមានកំណើនយឺតដូចគ្នា ដោយសារតែបន្តថមថយចរន្តទិញ-លក់ និងជួលអចលនវត្ថុថ្លៃខ្ពស់ ប៉ុន្តែកំណើជារួមត្រូវបានគាំទ្រ ដោយសកម្មភាពទិញ-លក់ជួលអចលនវត្ថុថ្លៃសមរម្យ ពោលទាំងលំនៅឋាន និងខុនដូ ស្របពែលដែលមានការជួលឃ្លាំង និងដី បម្រើឱ្យវិស័យឧស្សាហកម្មក៏នៅតែបន្តមាននិន្នាការល្អ។
លោកឧកញ៉ា សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍ថា បើនិយាយជារួម វិស័យអចលនទ្រព្យវាពិតជាមានផលប៉ះពាល់ពិតមែន ប៉ុន្តែបើនិយាយដោយឡែក ចំពោះអចលនទ្រព្យដែលមានតម្រូវការជាក់ស្ដែង និងស្ថិតនៅទីតាំងដែលមានសក្ដានុពល វានៅតែអាចទាញចំណូលដល់ម្ចាស់អចលនទ្រព្យនោះបានដដែល។
លោកឧកញ៉ា បានបន្តថា ជាក់ស្ដែង អចលនទ្រព្យដែលមានទីតាំងស្ថិតនៅទីប្រជុំជន នៅតែមានតម្រូវការសម្រាប់ប្រើប្រាស់ ដូចជាសម្រាប់បើកអាជីវកម្មនានា ហើយតួយ៉ាងនៅផ្លូវ ៦០ ម៉ែត្របច្ចុប្បន្ននេះ បើទោះបីជាតំបន់ផ្សេងទៀតកំពុងមានបញ្ហាតែនៅតំបន់ផ្លូវ ៦០ ម៉ែត្រមានតែឡើងថ្លៃ។
អ្នកស្រីអាន សុធីតា នាយិកាប្រតិបត្តិនៃក្រុមហ៊ុនអចលនទ្រព្យ PropNex Cambodia បានឱ្យដឹងថា ក្នុងឆ្នាំ ២០២៦ លំហូរនៃការទិញលក់អចលនទ្រព្យនៅតែមាន ប៉ុន្តែទីផ្សារហាក់រឹតត្បិតជាងឆ្នាំមុន។ អចលនទ្រព្យដែលអាចលក់បាន គឺត្រូវតែជាទ្រព្យដែលល្អ ពោលគឺសំដៅដល់ទីតាំងល្អ អ្នកទិញ គេទិញហើយអាចបង្កើតអាជីវកម្មផ្ដល់ចំណូលបាន ដូចជាចំណូលពីការជួល ចំណូលពីប្រើប្រាស់សម្រាប់ជាប្រយោជន៍ផ្សេងៗ។
អ្នកស្រីមានប្រសាសន៍ថា៖
“ទីផ្សារអចលនទ្រព្យក្នុងឆ្នាំ ២០២៦ នេះ លែងផ្ដោតលើទីផ្សារដែលមានតម្លៃខ្ពស់ទៀតហើយ គឺផ្ដោតលើទីផ្សារអចលនទ្រព្យដែលមានតម្លៃមធ្យម និងសមរម្យ ដូច្នេះអ្នកអភិវឌ្ឍន៍អចលនទ្រព្យក៏គួរតែផ្ដោតលើទីផ្សារទាំងនេះ។”
លោក ចេង វុទ្ធី នាយកប្រតិបត្តិនៃក្រុមហ៊ុនអចលនទ្រព្យ INVA Real Estate ក៏បានថ្លែងប្រាប់បណ្ដាញព័ត៌មាន AMS ឱ្យដឹងថា ស្ថានភាពអចលនទ្រព្យនៅកម្ពុជាឆ្នាំ ២០២៦ នេះ វានឹងបន្តងើបឡើងវិញ ហើយក៏ជាឱកាសសម្រាប់អ្នកវិនិយោគ ក៏ដូចជាអ្នកអភិវឌ្ឍន៍ អាចជ្រើសរើសទីតាំងអចលនទ្រព្យដែលមានសក្ដានុពលសម្រាប់អភិវឌ្ឍន៍រកប្រាក់ចំណេញនៅពេលអនាគត។
យោងតាមវិទ្យាស្ថានជាតិស្ថិតិ និងក្រសួងសេ្ដឋកិច្ចហិរញ្ញវត្ថុ បានបង្ហាញទស្សនវិស័យសេដ្ឋកិច្ចកម្ពុជាតាមវិស័យ ដោយក្នុងនោះក៏បានបង្ហាញពីស្ថានភាពវិស័យអចលនទ្រព្យអាចនឹងមានកំណើនខ្ពស់ឡើងវិញជាបន្តបន្ទាប់នៅឆ្នាំ ២០២៧ ដោយរំពឹងថាឆ្នាំ ២០២៧ នឹងកើនឡើង ០,៩ ភាគរយ ឆ្នាំ ២០២៨ កើនឡើង ១,៧ ភាគរយ ហើយឆ្នាំ ២០២៩ នឹងកើនឡើងដល់ ២,៩ ភាគរយ៕
Account
Security
Favourite Content