សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រះសីហនុ ៖ ព្រះសីហនុ ជាខេត្តមួយក្នុងចំណោមខេត្តទាំង៤នៃតំបន់ឆ្នេរ ដែលមានសក្ដានុពលពិសេស ត្រូវបានរាជរដ្ឋាភិបាលកំពុងពូនជ្រំប្រែក្លាយទៅជារបៀងសេដ្ឋកិច្ច និងទេសចរណ៍ដ៏សំខាន់ ដែលអាចទ្រទ្រង់សេដ្ឋកិច្ចជាតិតាមរយៈការបង្កើនបរិយាកាសអនុគ្រោះសម្រាប់ការវិនិយោគ និងការធានាឱ្យបាននូវការអភិវឌ្ឍប្រកបដោយចីរភាព ។ យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា គិតចាប់ពីឆ្នាំ២០១៧ ដល់ខែតុលា ២០២៤ ទុនវិនិយោគក្នុងវិស័យសំណង់ក្នុងខេត្តព្រះសីហនុមានចំនួនជាង ១០ពាន់លានដុល្លារអាមេរិក ។
បើតាមរបាយការណ៍ដដែលនេះឱ្យដឹងថា សំណង់ស្នើសុំលិខិតអនុញ្ញាតសាងសង់ចាប់ពីឆ្នាំ២០១៧ ដល់ឆ្នាំ២០២៤ (ត្រឹមដំណាច់ខែតុលា) មានចំនួន ២ ០៣៥ គម្រោង លើផ្ទៃក្រឡាសំណង់សរុបជាង ១៩លានមែត្រក្រឡា និងមានទុនវិនិយោគចំនួន ១០,៥៥ពាន់លានដុល្លារអាមេរិក ក្នុងនោះសំណង់ក្នុងដែនសមត្ថកិច្ចក្រសួង មានចំនួន ៥៣៨ម្រោង លើផ្ទៃក្រឡាសំណង់សរុបចំនួន ១៨,២២លានម៉ែត្រក្រឡា មានទុនវិនិយោគចំនួន១០,០៤ពាន់លានដុល្លារអាមេរក ក្នុងដែនសមត្ថកិច្ចខេត្តមានចំនួន ៤១៧គម្រោង លើផ្ទៃក្រឡាសំណង់សរុបជាង៧៦ម៉ឺនម៉ែត្រក្រឡា មានទុនវិនិយោគចំនួន ៤១៩,៥១លានដុល្លារអាមេរិក និងក្នុងដែនសមត្ថកិច្ចក្រុងព្រះសីហនុ មានចំនួន ១០៨០គម្រោង លើផ្ទៃក្រឡាសរុបចំនួន ២៧ម៉ឺនម៉ែត្រក្រឡា និងមានទុនវិនិយោគសរុបចំនួនជាង៩៣លានដុល្លារអាមេរិក ។
យោងតាមមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តព្រះសីហនុ បានបង្ហាញផងដែរថា ផ្អែកលើសំណង់ដែលបានស្នើសុំលិខិតអនុញ្ញាតសាងសង់ទាំងដែនសមត្ថកិច្ចក្រសួង ទាំងដែនសមត្ថកិច្ចខេត្ត និងដែនសមត្ថកិច្ចក្រុងស្រុក ឃើញថា ចាប់ពីឆ្នាំ២០១៧ ដល់ឆ្នាំ២០១៩ សំណង់អគារនៅក្នុងខេត្តព្រះសីហនុ មានសន្ទុះកើនឡើងខ្លាំង ជាក់ស្ដែងក្នុងរយៈពេល៣ឆ្នាំនេះ គ្រោងវិនិយោគសរុបមានរហូតដល់ ១.១៣៧គម្រោងដែលក្នុងនោះគម្រោងក្នុងដែនសមត្ថកិច្ចក្រសួងមានចំនួន៣១១គម្រោង សមត្ថកិច្ចខេត្តចំនួន ២០៩គម្រោង និងក្នុងដែនសមត្ថកិច្ចក្រុងស្រុកមានចំនួន ៦១៧គម្រោង ។
យ៉ាងណាក្ដីបន្ទាប់ពីឆ្នាំ២០១៩ ចូលដល់ឆ្នាំ២០២០ ការវិនិយោគក្នុងវិស័យសំណង់ចាប់ផ្ដើមថយចុះ ដោយការស្នើសុំលិខិតអនុញ្ញាតសាងសង់ចាប់ពីឆ្នាំ២០២០ ដល់ដំណាច់ខែតុលា ២០២៤ មានចំនួនត្រឹមតែ ៨៩៨គម្រោង ។
បើតាមរបាយការណ៍ដដែលឱ្យដឹងថា សំណង់អគារដែលស្ថិតនៅក្នុងភូមិសាស្ត្រក្រុងព្រះសីហនុ កម្ពស់ចាប់ពី ៥ជាន់ឡើងទៅមានចំនួន ៩៥៤គម្រោង និងមាន ១ ០៦០អគារ មានផ្ទៃក្រឡាសំណង់សរុបប្រមាណ៨,៩លានម៉ែត្រក្រឡា និងបានចំណាយថវិកាក្នុងការវិនិយោគអស់ប្រមាណ ៤,២ពាន់លានដុល្លារអាមេរិក ។ អគារទាំងអស់នោះ មានមួយចំនួននៅមិនទាន់បានបញ្ចប់គម្រោងនៅឡើយ ដូច្នេះបើតាមស្ថិតិរបស់មន្ទីរបានបង្ហាញថា សម្រាប់អគារដែលមិនទាន់បានបញ្ចប់ ត្រូវការទុនវិនិយោគប្រមាណ ១២០០លានដុល្លារ អាមេរិកដើម្បីបញ្ចប់ការសាងសង់ ។
បើតាមអ្នកជំនាញនៃវិស័យអចលនទ្រព្យប្រចាំខេត្តព្រះសីហនុ បានលើកឡើងថា ក្នុងឆ្នាំ២០២៤នេះ គម្រោងអគារដែលបានជាប់គាំងកាលពីអំឡុងមានវិបត្តិកូវីដ បានចាប់ផ្ដើមដំណើរការសាសងសង់ឡើងវិញជាបន្តបន្ទាប់ ជាពិសេសក្រោយមានការដាក់ចេញនូវកម្មវិធីជំរុញការវិនិយោគពិសេសក្នុងខេត្តព្រះសីហនុរបស់ប្រមុខរាជរដ្ឋាភិបាលកម្ពុជាចាប់តាំងពីដើមឆ្នាំ២០២៤កន្លងមក ៕
Account
Security
Favourite Content