ភ្នំពេញ ៖ ធនាគារអភិវឌ្ឍន៍ជនបទ និងកសិកម្ម (ARDB) បានសហការជាមួយសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) រៀបចំព្រឹត្តិការណ៍នៃវេទិកាថ្នាក់ជាតិលើកដំបូង ក្រោមប្រធានបទ «លទ្ធភាពទទួលបានហិរញ្ញប្បទានរបស់សហគ្រាសធុនមីក្រូ តូច និងមធ្យម» ដែលមានរយៈពេល ២ថ្ងៃ (២៧-២៨ ខែតុលា ឆ្នាំ២០២៦) នៅមជ្ឈមណ្ឌលសន្និបាត និងពិព័រណ៍កោះពេជ្រ (អគារ A, B, C) រាជធានីភ្នំពេញ ក្រោមអធិបតីភាព ឯកឧត្តម អគ្គបណ្ឌិត សភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។

ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) មានប្រសាសន៍ថា វេទិកានេះ មិនមែនជាវេទិកានិយាយតែទ្រឹស្តីនោះឡើយ ប៉ុន្តែគឺជា វេទិកាប្រតិបត្តិជាក់ស្តែង ដែលនាំមកនូវផលប្រយោជន៍ធំធេងចំនួនពីរជាស្នូល៖ ទី១. ផលប្រយោជន៍ក្នុងការទទួលបានទុន និងទី២. ផលប្រយោជន៍ក្នុងការបើកទូលាយទីផ្សារ សម្រាប់ផលិតផលខ្មែរ។ វេទិកា បានរៀបចំជំនួបពាណិជ្ជកម្ម ដោយផ្ទាល់រវាងសហគ្រាសផលិតក្នុងស្រុក ជាមួយក្រុមហ៊ុនបញ្ជាទិញធំៗ ផ្សារទំនើប សណ្ឋាគារ និងភោជនីយដ្ឋាន។ ជាមួយគ្នានោះ ក៏បាននិងកំពុងរួមគ្នាបង្កើតចលនាជាតិមួយ ដែលបំផុសឱ្យគ្រប់ ក្រសួង ស្ថាប័ន វិស័យឯកជន និងប្រជាពលរដ្ឋគ្រប់រូប ផ្តល់អាទិភាព ខ្ពស់បំផុតក្នុងការប្រើប្រាស់ ផលិតផលខ្មែរ ក្នុងពិធីការ កិច្ចប្រជុំ និងជីវភាពរស់នៅប្រចាំថ្ងៃ។

ឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC)
បានមានប្រសាសន៍ថា គោលបំណងសំខាន់នៅក្នុងវេទិកានាពេលនេះគឺ យើងខ្ញុំចង់ប្រមូលផ្ដុំបណ្ដាធនាគារពាណិជ្ជ និងធនាគារគោលនយោបាយរបស់រដ្ឋទាំងអស់ដើម្បីសហការគ្នារិះរកមធ្យោបាយសម្របសម្រួលបន្ធូរបន្ថយលក្ខខណ្ឌវិនិច្ឆ័យផ្តល់កម្ចីដល់សហគ្រាសធុនមីក្រូ តូច និងមធ្យម( MSMEs) ដែលកន្លងមកភាគច្រើនជួបនូវបញ្ហាសំខាន់ៗ ចំនួនពីរជាចំបងគឺ ខ្វះទ្រព្យបញ្ចាំ និងខូចប្រវត្តិឥណទាន(CBC) ដោយសារបញ្ហាវិបត្តិសេដ្ឋកិច្ចសកល និងកូវីដ១៩ ដែលធ្វើឲ្យការសងត្រឡប់ មិនបានទៀងទាត់ទៅឱ្យធនាគារនាពេលកន្លងមក ដែលតម្រូវឱ្យរាជរដ្ឋាភិបាលជួយដោះស្រាយ និងមានវិធានការ។

លោកបានសង្កត់ធ្ងន់ថា តាមរយៈវេទិកាថ្នាក់ជាតិស្តីពីហិរញ្ញប្បទានសម្រាប់ MSMEs លើកទី១ ឆ្នាំ២០២៦ ក្រោមប្រធានបទ «លទ្ធភាពទទួលបានហិរញ្ញប្បទានរបស់ MSMEs» ដែលសហការរៀបចំដោយFASMEC និង ARDB នាពេលនេះ គឺជាស្ពានចម្លងដ៏សំខាន់ រវាងម្ចាស់សហគ្រាស និងស្ថាប័នហិរញ្ញវត្ថុ។

ឯកឧត្តម អគ្គបណ្ឌិត សភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា វេទិកាថ្នាក់ជាតិ ស្តីពីហិរញ្ញប្បទានសម្រាប់ MSMEs គឺជាយន្តការដ៏សំខាន់មួយក្នុងការផ្សារភ្ជាប់រវាងផ្នែកផ្គត់ផ្គង់ហិរញ្ញប្បទាន (Supply Side); ដែលជាគ្រឹះស្ថានធនាគារ និងគ្រឹះស្ថានហិរញ្ញវត្ថុ ទាំងរដ្ឋ និង ឯកជន ជាមួយផ្នែកតម្រូវការឥណទាន (Demand Side); ដែលជាសហគ្រាសធុនមីក្រូ, តូច និងមធ្យម សំដៅជំរុញការអភិវឌ្ឍវិស័យឯកជន ដែលផ្ដោតជាសំខាន់លើការលើកកម្ពស់លទ្ធភាពទទួលបានហិរញ្ញប្បទានប្រកបដោយបរិយាបន្ន និងភាពបត់បែន ដើម្បីធានាស្ថិរភាពអាជីវកម្ម, បង្កើនសមត្ថភាពប្រកួតប្រជែង និងជំរុញសកម្មភាពសេដ្ឋកិច្ចជាតិឱ្យមានសម្ទុះកាន់តែខ្លាំងក្លាឡើងបន្ថែមទៀត តាមរយៈកិច្ចសហប្រតិបត្តិការស្អិតល្មួត និងការសម្របសម្រួលជិតស្និទ្ធ ក្នុងចំណោមក្រសួង-ស្ថាប័នពាក់ព័ន្ធនៃរាជរដ្ឋាភិបាល ជាមួយនឹងវិស័យឯកជន ។

ឯកឧត្តម បានបន្តថា តាមរយៈវេទិកានេះ ក្រសួង-ស្ថាប័នពាក់ព័ន្ធ និងវិស័យឯកជន នឹងមានឱកាសដ៏ពិសិដ្ឋសម្រាប់ផ្លាស់ប្តូរទស្សនៈ ចែករំលែកបទពិសោធ និងបន្ស៊ីគោលនយោបាយពាក់ព័ន្ធនានា សំដៅដោះស្រាយបញ្ហាប្រឈម និងឆ្លើយតបទៅនឹងតម្រូវការជាក់ស្តែងរបស់ MSMEs ជាពិសេស ការត្រៀមខ្លួនរបស់ MSMEs ឱ្យបានរួចរាល់ក្នុងការទទួលបាននូវហិរញ្ញប្បទាន និងប្រភពទុនបន្ថែម ក្នុងទំហំសមស្រប ទាន់ពេល និងចំទិសដៅ តាមរយៈកម្ចីពីគ្រឹះស្ថានធនាគារ និងហិរញ្ញវត្ថុ ទាំងរដ្ឋ និងឯកជន ក៏ដូចជាតាមរយៈការបោះផ្សាយលក់ភាគហ៊ុន និង/ឬ មូលបត្របំណុល (សញ្ញាបណ្ណ) សម្រាប់ក្រុមហ៊ុនដែលមានលក្ខណៈសម្បត្តិគ្រប់គ្រាន់ និងបានបំពេញលក្ខខណ្ឌតម្រូវ ។ ជាការពិត, MSMEs គឺជា «ឆ្អឹងខ្នងនៃសេដ្ឋកិច្ចជាតិ» ។

សូមបញ្ជាក់ដែរថា ផ្អែកតាមជំរឿនសេដ្ឋកិច្ចឆ្នាំ២០២២ របស់វិទ្យាស្ថានជាតិស្ថិតិ បានបង្ហាញថា MSMEs បានរួមចំណែកប្រមាណ ៦៣% នៃផលិតផលក្នុងស្រុកសរុប និងបានផ្តល់ការងារលើសពី ៧០% ជូនដល់ប្រជាជនដោយមិនរាប់បញ្ចូលនូវវិស័យកសិកម្ម ៕