សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តាមរយៈក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ពោតបារាំង ឬហៅថា អូក្រា មានឈ្មោះជាភាសាបរទេសថា Okra ឬ Ladies’ Finger ជាដំណាំធន់នឹងអាកាសធាតុរាំងស្ងួតខ្លាំង មិនរើសដី និងដាំឆាប់បានផល ដែលកសិករយើងគួរងាកមកសាកល្បងដាំនៅលើដីដែលទំនេរចោលនៅជុំវិញផ្ទះ។
ក្នុងការដាំដំណាំនេះ កសិករត្រូវការប្រើទឹកតិចបំផុត មិនត្រូវការជីបំប៉នច្រើន មានដំណុះខ្ពស់ ងាយស្រួលដាំដុះ និងថែទាំ មិនសូវមានការបំផ្លាញពីជំងឺ និងកត្តាចង្រៃផ្សេងៗទៀតនោះទេ។ បន្ថែមពីលើនេះ គេអាចប្រមូលផលពោតបារាំងនៅអាយុត្រឹម ៥០ ទៅ ៦០ថ្ងៃ ក្រោយពេលដាំ និងបន្តប្រមូលផលជាបន្តបន្ទាប់រហូតអស់ផ្លែតែម្ដង។ ដោយឡែក ផ្លែពោតបារាំងងាយទៅជាចាស់ណាស់ ហេតុនេះអ្នកដាំត្រូវប្រមូលផលឱ្យបានទៀតទាត់ជារៀងរាល់ថ្ងៃ ឬមួយថ្ងៃខានមួយថ្ងៃ ព្រោះបើប្រមូលផលមិនទាន់ ផ្លែនឹងទៅជារឹង មិនអាចលក់នៅលើទីផ្សារបានថ្លៃនោះទេ។
ជាទូទៅ កសិករដាំពោតបារាំងដោយវិធីសាស្ត្រយកគ្រាប់កប់ផ្ទាល់ទៅក្នុងរណ្តៅដែលបានទ្រាប់បាតដោយជីរួចរាល់ ប៉ុន្តែមុនពេលដាំ គ្រាប់ពូជត្រូវដាស់ដំណេកដោយការត្រាំទឹកក្តៅអ៊ុនៗជាមុនសិន ព្រោះថា ការធ្វើបែបនេះ គ្រាប់នឹងមានដំណុះល្អ ហើយចំណេញពេលវេលា។ ពោតបារាំងដែលកំពុងដាំដុះនៅក្នុងប្រទេសកម្ពុជាយើងមានច្រើនពូជខុសៗគ្នា ដូចជាផ្លែពោតបារាំងមានពណ៌បៃតងខ្ចី ពណ៌បៃតងចាស់ និងពណ៌ស្វាយ ដែលមានការដាំដុះតិចតួចនៅឡើយ។
គួរបញ្ជាក់ដែរថា ដំណាំពោតបារាំង វាត្រូវបានដាំដុះច្រើនជាងគេនៅតំបន់ត្រូពិចនៅជុំវិញពិភពលោក ដែលមានបរិមាណផលប្រមាណ ១០.៥លានតោនក្នុងមួយឆ្នាំ លើផ្ទៃដីដាំដុះប្រហែល ២.៥លានហិកតា ដែល ៦០.៤ភាគរយ ដាំដុះនៅប្រទេសឥណ្ឌា។ នេះបើយោងតាមរបាយការណ៍របស់ FAO ក្នុងឆ្នាំ២០២០។
សម្រាប់អត្ថប្រយោជន៍របស់ដំណាំប្រភេទនេះវិញ ពោតបារាំងសម្បូរសារធាតុចិញ្ចឹមច្រើនដូចជា វិតាមីនA វីតាមីនC វីតាមីនB ក៏ដូចជាសារធាតុប្រឆាំងអ៊ីកស៊ីតកម្មផ្សេងៗ កាត់បន្ថយហានិភ័យនៃជំងឺបេះដូង ប្រឆាំងជំងឺមហារីក កាត់បន្ថយជាតិស្ករក្នុងឈាម និងមានប្រយោជន៍ដល់ស្រ្តីមានផ្ទៃពោះ៕
Account
Security
Favourite Content