សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពត ៖ រយៈពេល៦ខែនៃឆមាសទី១ ឆ្នាំ២០២៦កន្លងទៅនេះ ផលិតកម្មអំបិលនៅក្នុងខេត្តកំពតសម្រេចបានទិន្នផលរហូតដល់ទៅជាង ៨ ម៉ឺនតោន ដែលជាបរិមាណដ៏ខ្ពស់មួយ បន្ទាប់ពីការធ្លាក់ចុះយ៉ាងគំហុកកាលពីឆ្នាំ២០២៥។
វិស័យផលិតកម្មអំបិលធម្មជាតិរបស់កម្ពុជា បានបង្ហាញសញ្ញាវិជ្ជមានយ៉ាងខ្លាំង ដោយត្រឹមរយៈពេល ៦ខែក្នុងឆ្នាំ២០២៦ នេះ ខេត្តកំពតសម្រេចបានទិន្នផលអំបិលរហូតដល់ទៅជាង ៨ម៉ឺនតោន និងបានចែកចាយនៅលើទីផ្សារក្នុងស្រុកប្រមាណ ៦ម៉ឺនតោន រួចហើយ។
លោក មឿង គង្គា អភិបាលរងខេត្តកំពត បានគូសបញ្ជាក់ឱ្យដឹងថា មុខរបរផលិតអំបិលនៅក្នុងខេត្តកំពត មិនត្រឹមតែជាអត្តសញ្ញាណជាតិប៉ុណ្ណោះទេ ប៉ុន្តែថែមទាំងជាសសរទ្រូងសេដ្ឋកិច្ចមួយផងដែរ ហើយខេត្តក៏ត្រៀមលក្ខណៈសម្រាប់ការនាំចេញទៅកាន់ទីផ្សារអន្តរជាតិទៀតផង។
ដោយឡែកចំពោះតម្លៃនៅលើទីផ្សារបច្ចុប្បន្ន លោក មឿង គង្គា បានបញ្ជាក់ថា អំបិលកំពត កំពុងមានតម្លៃស្ថិរភាពល្អបង្គួរ ដោយលក់ចេញបានក្នុងតម្លៃចន្លោះពី ១៣ ០០០ រៀល ទៅ ២០ ០០០ រៀល ក្នុងមួយបាវ ទម្ងន់ ៥០ គីឡូក្រាម ទៅតាមប្រភេទ និងគុណភាពអំបិល។
សូមរំលឹកថា កាលពីឆ្នាំ២០២៥ វិស័យផលិតកម្មអំបិលកម្ពុជាបានជួបប្រទះវិបត្តិដោយការធ្លាក់ចុះទិន្នផលយ៉ាងធ្ងន់ធ្ងរបំផុត ដេលប្រមូលផលបានត្រឹមតែប្រមាណ ១៨ ០០០ ទៅ ២០ ០០០ តោនប៉ុណ្ណោះ ពោលគឺថយចុះរហូតដល់ទៅជាង ៩០ ភាគរយ បើធៀបទៅនឹងឆ្នាំ២០២៤ ដែលធ្លាប់ទទួលបានទិន្នផលខ្ពស់រហូតដល់ ១៣ម៉ឺនតោន។ ការធ្លាក់ចុះទិន្នផលយ៉ាងគំហុកកាលពីឆ្នាំមុន គឺបណ្តាលមកពីកត្តាប្រែប្រួលអាកាសធាតុ ដែលមានភ្លៀងធ្លាក់ញឹកញាប់ខុសប្រក្រតីនៅរដូវប្រមូលផល។
សូមបញ្ជាក់ថា «អំបិលកំពត-កែប» មិនត្រឹមតែជាទំនិញយុទ្ធសាស្ត្រសម្រាប់ជីវភាពប្រចាំថ្ងៃនោះទេ ប៉ុន្តែត្រូវបានក្រសួងពាណិជ្ជកម្មចុះបញ្ជីជា «ម៉ាកសម្គាល់ភូមិសាស្ត្រទំនិញ» ផ្លូវការ កាលពីខែមេសា ឆ្នាំ២០២៣ ដើម្បីការពារតម្លៃ និងលើកកម្ពស់កេរ្តិ៍ឈ្មោះនៅលើឆាកអន្តរជាតិ ហើយជាទូទៅ ជាមធ្យមក្នុងមួយឆ្នាំអាចផលិតបានអំបិលក្នុងចន្លោះពី ១០ ទៅ ១៣តោន៕ ដោយ ៖ ទួន សុផល
Account
Security
Favourite Content