សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្នុងគោលបំណងបង្កើនប្រសិទ្ធភាពព្យាបាល និងលើកកម្ពស់វិស័យសុខាភិបាល ក្រុមហ៊ុន ជីប ម៉ុង បានប្រគល់ម៉ាស៊ីន ម៉ូនីទ័រ សម្រាប់អ្នកជំងឺ ម៉ូដែល K12 ចំនួន ១០០ គ្រឿងដល់មន្ទីរពេទ្យមិត្តភាពកម្ពុជា-ចិន ព្រះកុសមៈ ព្រមទាំងបានជួបសំណេះសំណាលសួរសុខទុក្ខអ្នកជំងឺកំពុងសម្រាកព្យាបាលក្នុងមន្ទីរពេទ្យ ស្របពេលនៃបុណ្យទិវាអន្តរជាតិនារី៨មីនា។
ពិធីប្រគល់ម៉ូនីទ័រ និងសំណេះសំណាលជាមួយអ្នកគ្រូពេទ្យ គិលានុបដ្ឋាយិកា ក៏ដូចជាបុគ្គលិកមន្ទីរពេទ្យនេះ បានប្រព្រឹត្តទៅក្រោមវត្តមានលោកអ្នកឧកញ៉ា ភាព ហៀក ស្ថាបនិកក្រុមហ៊ុន ជីប ម៉ុង និងអ្នកឧកញ៉ា លាង ម៉េង សហស្ថាបនិក និងជាប្រធានក្រុមអគ្គនាយកក្រុមហ៊ុន ជីប ម៉ុង និងឯកឧត្តម តាន់ សុគន្ធ នាយកមន្ទីរពេទ្យមិត្តភាពកម្ពុជា ចិន នាព្រឹកថ្ងៃទី ០៨ ខែមីនា ឆ្នាំ ២០២៦។
ក្នុងឱកាសទិវាអន្តរជាតិនារី លោកអ្នកឧកញ៉ា ភាព ហៀក ស្ថាបនិកក្រុមហ៊ុន ជីប ម៉ុង ក៏បានចែករំលែកបទពិសោធន៍ជីវិត ក៏ដូចជាការតស៊ូរបស់លោក ដើម្បីផ្តល់កម្លាំងចិត្ត និងលើកទឹកចិត្តដល់អ្នកគ្រូពេទ្យ គិលានុបដ្ឋាយិកា និងបុគ្គលិកមន្ទីរពេទ្យផងដែរ។ ឆ្លៀតក្នុងឱកាសនេះ អ្នកឧកញ៉ា លាង ម៉េង បានសម្តែងការគោរពអរគុណដល់ការលះបង់ដ៏ធំធេងរបស់អ្នកគ្រូពេទ្យ គិលានុបដ្ឋាយិកា និងបុគ្គលិកផ្នែកសុខាភិបាលទាំងអស់ ដែលខិតខំបម្រើប្រជាជនកម្ពុជា តាមជំនាញបច្ចេកទេសរៀងខ្លួន ព្រមទាំងអ្នកម្តាយគ្រប់រូប ដែលបានលះបង់ដើម្បីសុភមង្គលគ្រួសារ និងធនធានមនុស្សនៅក្នុងសង្គម។
លោក តាន់ សុគន្ធ នាយកមន្ទីរពេទ្យមិត្តភាពកម្ពុជា ចិន បានមានប្រសាសន៍ថា៖ ឧបករណ៍ម៉ូនីទ័រនេះ មានប្រយោជន៍សំខាន់ណាស់សម្រាប់តាមដាន និងសង្រ្គោះជីវិតអ្នកជំងឺ និងមានមុខងារតាមដានចង្វាក់បេះដូង សម្ពាធឈាម ចាប់យកចរន្តអុកស៊ីសែននៅចុងដៃ តាមដានកំដៅ និងមានតួនាទីសំខាន់ៗមួយចំនួនទៀត។
លោកបានបញ្ជាក់ថា៖ ខណៈពេលដែលប្រជាពលរដ្ឋមកទទួលសេវាវេជ្ជសាស្រ្តនៅទីនេះកើនឡើងជាបន្តបន្ទាប់ ជំនួយរបស់ក្រុមហ៊ុន ជីប ម៉ុង គឺឆ្លើយតបត្រូវតម្រូវការរបស់មន្ទីរពេទ្យ និងបង្ហាញពីការយកចិត្តទុកដាក់ខ្លាំងចំពោះវិស័យសុខាភិបាល។
សូមជម្រាបថា ក្រុមហ៊ុន ជីប ម៉ុង តែងតែចូលរួមយ៉ាងសកម្មជាមួយវិស័យសុខាភិបាលនៅកម្ពុជា ដូចជាការឧបត្ថម្ភទៅកាន់មូលនិធិគន្ធបុប្ជាកម្ពុជា, យុទ្ធនាការប្រយុទ្ធប្រឆាំងជំងឺរាតត្បាតកូវីដ ១៩, មន្ទីរពេទ្យ ហ្លួងម៉ែ, មន្ទីរពេទ្យកាល់ម៉ែតជាដើម។ ជាក់ស្ដែង ថ្មីៗនេះ ជីប ម៉ុង ក៏បានប្រកាសឧបត្ថម្ភថវិកាចំនួន ១ លានដុល្លារ ជូនដល់កាកបាទក្រហមកម្ពុជាក្នុងឱកាសខួបទី១៦៣ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ ២០២៦ ដើម្បីបន្តគាំទ្រដល់សកម្មភាពមនុស្សធម៌ជាមួយកាកបាទក្រហមកម្ពុជាផងដែរ៕
Account
Security
Favourite Content