សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ មន្ត្រីជាន់ខ្ពស់ក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា វិស័យដែនដី និងអចលនទ្រព្យគឺជាដង្ហើមសេដ្ឋកិច្ចជាតិដ៏ធំមួយ និងត្រូវការពារវិស័យនេះកុំឱ្យដួលរលំ ។
ឯកឧត្តម គិត ច័ន្ទគ្រឹស្នា អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា ដើម្បីឱ្យវិស័យដែនដី នគរូបនីយកម្ម សំណង់ និងអចលនទ្រព្យកាន់តែរីកចម្រើន ក្រសួងបានធ្វើទំនើបកម្មដោយជំរុញឱ្យប្រើប្រាស់សេវានានារបស់ក្រសួងតាមថ្នាលឌីជីថល ហើយប្រព័ន្ធនេះ គឺប្រៀបបានជាច្រកចេញចូល ដែលជួយសម្រួលដល់ពលរដ្ឋជាអ្នកប្រើប្រាស់សេវាមានភាពងាយស្រួល និងអាចប្រើពេលណាក៏បាន នៅទីណាក៏បាន ។
ឯកឧត្តមមានប្រសាសន៍បន្តទៀតថា ៖
បច្ចុប្បន្នក្រសួងរៀបចំដែនដី នគរូបនីយកម្ម និងសំណង់ បានសហការជាមួយ CamDX Verify ដូច្នេះ ប្លង់ដីដែលបានចេញនៅពេលក្រោយៗនេះ នឹងមានភ្ជាប់ជាមួយប្រព័ន្ធ Verify របស់ក្រសួងប្រៃសណីយ៍ និងទូរគមនាគមន៍ទាំងអស់ ដើម្បីការពារការក្លែងបន្លំលើសន្លឹកប្លង់រឹងនោះ ។
សូមជម្រាបដែរថា ប្រព័ន្ធនេះដែរ នឹងចូលរួមផ្តល់ភាពងាយស្រួលដល់បណ្ដាធនាគារ និងហិរញ្ញវត្ថុក្នុងការត្រួតពិនិត្យ និងផ្ទៀងផ្ទាត់ដើម្បីឱ្យច្បាស់ពីព័ត៌មានម្ចាស់ ក៏ដូចជាប្រភេទនៃការប្រើប្រាស់ដីនោះ ថាតើដីនោះអាចសង់អគារបានកម្ពស់ណា សង់ផ្ទះបានប៉ុន្មានជាន់ជាដើម ។
ឯកឧត្តមបានបញ្ជាក់ថា ៖
«វិស័យដីធ្លី ឬវិស័យដែនដី និងអចលនទ្រព្យ ជាដង្ហើមសេដ្ឋកិច្ចរបស់ជាតិយើងធំណាស់ ដូច្នេះ យើងត្រូវការពារវិស័យនេះឱ្យបានគង់វង្ស និងកុំឱ្យដួលរលំ ដើម្បីជំរុញខឿនសេដ្ឋកិច្ចរបស់យើងឱ្យកាន់តែរឹងមាំនិងឆ្ពោះទៅមុខជាបន្តទៀត ។ ដើម្បីវិស័យនេះកាន់តែរីកចម្រើន និងឆ្ពោះទៅមុខបន្តទៀត ក្រសួងដែនដី បានរៀបចំប្រមូល និងចងក្រងទិន្នន័យក្នុងប្រព័ន្ធតែមួយ ធ្វើយ៉ាងណាឱ្យពលរដ្ឋមានភាពងាយស្រួលក្នុងស្វែងរកអ្វីមួយពាក់ព័ន្ធនឹងវិស័យដែនដី»។
មន្ត្រីជំនាញរូបនេះបានបន្តឱ្យដឹងផងដែរថា បច្ចុប្បន្ននេះ ក្រុមការងារបរិវត្តកម្មឌីជីថល ក៏ដូចជាក្រុមការងាររបស់ក្រសួង បាន និងកំពុងខិតខំប្រឹងប្រែងដោះស្រាយទាំងបញ្ហាបុរី ទាំងបញ្ហាសេវាផ្សេងៗ ដោយបានសហការជាមួយក្រសួងមហាផ្ទៃ និងអាជ្ញាធរមានសមត្ថកិច្ចថ្នាក់ក្រោមជាតិ។
ពាក់ព័ន្ធនឹងវិស័យដីធ្លីនេះដែរ ឧកញ៉ា នួន រឹទ្ធី អគ្គនាយកក្រុមហ៊ុន Khmer Foundation Appraisal (KFA) បានមានប្រសាសន៍ថា បើទោះបីជាស្ថានភាពសេដ្ឋកិច្ចសកលមានបញ្ហានិងមិនទាន់មានភាពច្បាស់លាស់ក៏ដោយ តែអ្នកអភិវឌ្ឍន៍ក្នុងប្រទេសនៅតែបន្តប្រឹងប្រែងអភិវឌ្ឍន៍ទៅមុខជាបន្តបន្ទាប់ ប៉ុន្តែវិស័យនេះនៅមិនទាន់មានការវិនិយោគពីខាងក្រៅឡើងវិញនៅឡើយ។
យោងតាមប្រសាសន៍ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានលើកឡើងថា ដើម្បីឱ្យការវិនិយោគ និងការអភិវឌ្ឍកាន់តែមានភាពងាយស្រួល ហើយអាចទាក់ទាញវិនិយោគិនពីខាងក្រៅប្រទេស រាជរដ្ឋាភិបាលកម្ពុជា តាមរយៈក្រសួងរៀបចំដែនដី នគរូបនីយកម្ម និងសំណង់ បានខិតខំក្នុងការបញ្ចប់ការវាស់វែងដីធ្លី ការចុះបញ្ជី និងចេញបណ្ណកម្មសិទ្ធិឱ្យបានចប់ទាំងស្រុង ដោយក្នុងនោះដែរ ក្រសួងបានបញ្ចប់ការវាស់វែងដីធ្លីមានលក្ខណៈជាប្រព័ន្ធ ហើយនឹងបន្តបញ្ចប់ការចុះបញ្ជីដីធ្លីនៅទូទាំងប្រទេសក្នុងពេលឆាប់ៗនេះដើម្បីចេញបណ្ណជូនពលរដ្ឋឱ្យបានចប់សព្វគ្រប់ ៕
Account
Security
Favourite Content