សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ មានការលើកឡើងថា ការចាប់ផ្តើមធ្វើអាជីវកម្ម ឬមុខជំនួញអ្វីមួយ គោលដៅចម្បងបំផុតនោះគឺការទទួលបានប្រាក់ចំណូល ផលចំណេញពីកិច្ចដំណើរដែលខ្លួនបានធ្វើ ប៉ុន្តែលើសពីនេះទៅទៀតគឺភាគរីកចម្រើន អាចបន្តការអភិវឌ្ឍន៍អាជីវកម្មឱ្យកាន់តែធំធាត់ ជាពិសេសអាចជួយដល់សេដ្ឋកិច្ច និងជីវភាពរបស់ប្រជាសហគមន៍ទាំងក្នុង និងក្រៅមូលដ្ឋានបានយ៉ាងប្រសើរ។ ជាក់ស្ដែង ក្រុមហ៊ុនក្នុងស្រុកមួយដែលផ្តើមចេញពីសហគ្រាសខ្នាតមធ្យម បានព្យាយាមស្វែកវិធីសាស្ត្រកែច្នៃកសិផលដែលគ្មានទីផ្សារ និងមានតម្លៃថោក ដូចជា ស្ពៃ ម្នាស់ ស្លឹកគ្រៃ ទៅជាសាប៊ូដែលផលិតផលថ្មីសម្រាប់ប្រើប្រាស់ប្រចាំថ្ងៃយ៉ាងមានប្រជាប្រិយភាព។
LSV Industry ជាក្រុមហ៊ុនផលិតសាប៊ូក្នុងស្រុកមួយ ដែលគេស្គាល់ដំបូងថាជាផលិតផលសាប៊ូ OKA បាន និងកំពុងកែច្នៃកសិផលដែលប្រមូលទិញពីកសិករ ទៅកែច្នៃ និងផលិតឱ្យចេញជាផលិតផលថ្មី ដូចជាសាប៊ូលាងចានជាដើម ប្រកបទៅដោយគុណភាព សុវត្ថិភាព និងមានតម្លៃសមរម្យ។
អ្នកស្រី នុត សម្ផស្ស ជាអគ្គនាយិការក្រុមហ៊ុន LSV Industry បានប្រាប់ឱ្យដឹងថា ៖ គម្រោងផលិតសាប៊ូច្នៃចេញពីបន្លែ ផ្លែឈើផ្សេងៗ ទាំងអស់នេះ គឺកើតឡើងដោយសារមើលឃើញពីផលលំបាករបស់បងប្អូនកសិករដែលតែងជួបប្រទះបញ្ហាទីផ្សារនៅក្នុងរដូវប្រមូលផលជន់ជោរ លក់មិនចេញ ហើយទទួលបានតម្លៃថោកមិនអាចទទួលយកបាន ឬមិនរួចថ្លៃដាំដុះផងនោះ។
អ្នកស្រីបានបញ្ជាក់ថា ៖
«ភាគច្រើន កសិផលដែលមិនមានតម្រូវការទីផ្សារ គឺដោយសារវាខុសស្ដង់ដារដែលគេយកបាន ដូចជាមានទំហំតូចពេក មានរូបរាង និងពណ៌មិនល្អ ជាពិសេស កសិផលទាំងនោះមានភាពជនជោរខ្លាំង ដោយសារតែរដូវកាលប្រមូលផលរួមគ្នាក្នុងពេលតែមួយ ដែលធ្វើឱ្យចាក់គរនៅលើទីផ្សារ ជាមួយការទទួលបានតម្លៃថោក ឬគ្មានអ្នកទទួលទិញតែម្ដង។ ឃើញដូច្នេះ ទើបខ្ញុំមានគំនិតយកកសិផលដែលគ្មានទីផ្សារទាំងនោះមកសិក្សា និងកែច្នៃឱ្យចេញជាផលិតផលថ្មី មានគុណតម្លៃសម្រាប់ប្រើប្រាស់ប្រចាំថ្ងៃ និងប្រកបដោយប្រសិទ្ធភាព ដូចជា សាប៊ូលាងចាន សាប៊ូដុសខ្លួន និងសាប៊ូដុសមុខជាដើម»។
ដូចទៅនឹងការលើកឡើងខាងលើនេះ បច្ចុប្បន្ន ក្រុមហ៊ុន LSV Industry បាន និងកំពុងកែច្នៃ ផលិតបាននូវផលិតផលមួយចំនួនដូចជា សាប៊ូដុសស្បែកមុខដែលផលិតចេញពីស្ពៃក្រញាញ់ ក្រោមយីហោ Empress , សាប៊ូទឹកដុសខ្លួន សាប៊ូកក់សក់ និងសាប៊ូលាងមុខ ដែលផលិតចេញពីកសិផលធម្មជាតិ មានគុណភាព និងទទួលបានការគាំទ្រខ្លាំងពីសំណាក់អតិថិជន។ មិនត្រឹមតែប៉ុណ្ណោះ ថ្មីៗនេះ ក្រុមហ៊ុន ក៏បានដាក់ចេញនូវផលិតផលថ្មីមួយទៀត គឺទឹកលាងចានក្រោមយីហោ រីន ដែលមានពីរជម្រើសគឺ ទឹកលាងចានម្នាស់ និងទឹកលាងចានស្លឹកគ្រៃ។
នៅក្នុងឱកាសនេះផងដែរ អ្នកស្រី នុត សម្ផស្ស បានបញ្ជាក់ពីគោលជំហររបស់ខ្លួនថា នឹងនៅតែបន្តស្វែងរកវិធីសាស្ត្រក្នុងការកែច្នៃកសិផលក្នុងស្រុកដែលដាំដុះដោយប្រជាកសិករខ្មែរ ផលិតជាផលិតផលថ្មីៗសម្រាប់ប្រើប្រាស់ជាប្រយោជន៍ប្រចាំថ្ងៃបន្តទៀត ដើម្បីអាចចូលរួមផ្គត់ផ្គង់តម្រូវការទីផ្សារក្នុងស្រុក និងឈានដល់ការនាំចេញ ជាពិសេសអាចជួយរកទីផ្សារកសិផលដល់កសិករឱ្យមានភាពទូលាយ ៕
Account
Security
Favourite Content