ភ្នំពេញ ៖ តាមរយៈការដាក់ចេញនូវកម្មវិធីពិសេសជំរុញការវិនិយោគនៅខេត្តព្រះសីហនុពីសំណាក់រាជរដ្ឋាភិបាលកាលពីដើមឆ្នាំ២០២៤ គេសង្កេតឃើញថា មានគម្រោងវិនិយោគទាំងថ្មី និងចាស់​ជា​ច្រើន​ត្រូវបានមានដំណើរការឡើងវិញ រាប់ទាំងគម្រោងវិនិយោគលើសំណង់អគារដែលជាប់គាំង។ ជាស្ដែង នៅដើមឆ្នាំ២០២៥នេះ គម្រោងវិនិយោគចំនួន ៤២ ទៀត ក្រោមទុនវិនិយោគសរុបចំនួន ៥៦៤ លានដុល្លារអាមេរិក ត្រូវ​ទទួល​បានការលើកទឹកចិត្តពិសេសពីរាជរដ្ឋាភិបាលនៅខេត្តព្រះសីហនុ ។

នេះបើតាមសេចក្ដីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ ក្រោយកិច្ចប្រជុំលើកទី១សម្រាប់ឆ្នាំ ២០២៥ ក្រោមអធិបតីភាពឯកឧត្តមហ៊ាន សាហ៊ីប ទីប្រឹក្សាសម្ដេចធិបតីហ៊ុន ម៉ាណែត នាយក​រដ្ឋ​មន្ត្រី​នៃ​ព្រះ​រា​ជាណាចក្រកម្ពុជានាព្រឹកថ្ងៃទី ២៣ ខែ មករា ឆ្នាំ ២០២៥ នៅទីស្តីការក្រសួងសេដ្ឋកិច្ច និង ហិរញ្ញវត្ថុ ។

ក្នុងសេចក្ដីប្រកាសព័ត៌មានដដែលឱ្យដឹងថា អង្គប្រជុំបាន​សម្រេចជាគោល​ការណ៍ផ្តល់​ការ​លើក​ទឹក​ចិត្ត​ពិសេ​សដល់គម្រោងចំនួន ៤២ គម្រោង ក្នុងនោះ គម្រោងពាក់ព័ន្ធនឹងអគារជាប់គាំងចំនួន ១៥, គម្រោងថ្មីចំនួន ១២​, ការពង្រីកគម្រោងចំនួន ៣, និងគម្រោងពុំពាក់ព័ន្ធនឹងអគារជាប់គាំង ១២ គម្រោង ដែល​មាន​ទុ​ន​វិនិយោ​​​គសរុប ៥៦៥ លានដុល្លារអាមេរិក និងប៉ាន់ស្មានអាចបង្កើតការងារប្រមាណ ៧ ៣០៨ កន្លែង មានជា​អា​​ទិ៍​ គម្រោងភណ្ឌាគារគយមានដែនកំណត់, គម្រោងផ្ទះលំហែនៅកោះរ៉ុងសន្លឹម គម្រោងរម​នី​យដ្ឋា​ន អេកូ កសិទេសចរណ៍, គម្រោងសួនឧស្សាហកម្ម, គម្រោងសណ្ឋាគារ, និង គម្រោងអគារពហុមុខងារ ។

ឯ​កឧត្តមបណ្ឌិតសភាចារ្យ ហ៊ាន សាហ៊ីប មានប្រសាសន៍ថា រាជរដ្ឋាភិបាលបានយល់ព្រមឱ្យបន្តអនុវត្ត កម្មវិធីពិសេសជំរុញការវិនិយោគក្នុងខេត្តព្រះសីហនុឆ្នាំ ២០២៤ រហូតដល់ដំណាច់ឆ្នាំ២០២៥ ដោ​យរ​ក្សា​វិធានការទាំងឡាយដែលមានស្រាប់ ដើម្បីជំរុញការអភិវឌ្ឍខេត្តព្រះសីហនុ និង ឆ្លើយ​ត​បនឹ​ង​គោល​បំ​​ណង​រ​បស់រាជរដ្ឋាភិបាល។

​ឯ​កឧត្តមបណ្ឌិតសភាចារ្យ មានប្រសាសន៍បន្ថែមថា សម្រាប់ទិសដៅការងារក្នុងឆ្នាំ ២០២៥, ក្រុមកា​រ​ងា​រត្រូ​វ​​បន្តបំពេញភារកិច្ចស្នូលចំនួន ៣ ឱ្យទទួលបានលទ្ធផលល្អប្រសើរ រួមមាន៖ ១) ​ប​ន្ត​ពិនិ​ត្យ​ផ្ត​ល់​កា​រ​លើក​ទឹ​ក​ចិ​ត្តពិ​សេ​ស​ ការប្រឹក្សាយោបល់ និង បដិសណ្ឋារកិច្ច និង ធ្វើការផ្សព្វផ្សាយ ដើម្បីទាក់ទាញ និង ជំរុ​ញកា​រ​វិនិ​យោគ ក្នុងក្របខណ្ឌនៃយន្តការច្រកចេញចូលតែមួយ, ២) បន្តពិនិត្យ និង ​ជំ​រុញ​កា​រ​អនុ​វត្ត​គម្រោង​វិ​​និយោ​គ​ ​និង ធុរកិច្ច រួមទាំងការផ្តល់ការលើកទឹកចិត្តជាក់ស្តែង ដល់គ​ម្រោ​ង​ដែល​ទ​ទួ​ល​​បាន​កា​រ​លើ​ក​ទឹ​​ក​ចិ​ត្តរួ​ច​ហើ​យ ពិ​សេ​សការដោះស្រាយគម្រោងពាក់ព័ន្ធនឹងអគារជាប់គាំង និង ដំណើរការអនុវត្តគម្រោង ក្នុងក្រប​ខ័ណ្ឌ​នៃ​កា​រ​ផ្ត​ល់សេវាថែទាំវិនិយោគ និង ការសម្របសម្រួល និង ៣) បន្តពង្រឹងសមត្ថភាព និង ការរៀបចំធ​នធា​​ន​មន្ត្រី ដោយប្រកាន់ខ្ជាប់ការគ្រប់គ្រងមន្ត្រីដែលទទួលខុសត្រូវ និង មានគុណវុឌ្ឍិ ក្នុងការ​គ្រប់​គ្រង​ដឹក​នាំអ​នុវត្ត​កា​រងារជាប្រចាំ ដើម្បីធានាប្រសិទ្ធភាព និង ភាពម្ចាស់ការ ព្រមទាំ​ងទា​ក់​ទា​ញកា​រវិ​​និ​យោ​គ​ស​ក្តានុ​​ពល​សំខា​ន់​ៗ​ ​។

ឯកឧត្តមបណ្ឌិតសភាចារ្យ ប្រធានក្រុមការងារ បានបញ្ជាក់ជូនក្រុមការងារថា ភាពជោគ​ជ័​យ​នៃ​កា​រ​អនុ​វ​ត្ត​កម្មវិធីពិសេសក្នុងឆ្នាំ ២០២៤ ហើយដែលទទួលការកោតសរសើរពីប្រមុខរាជរដ្ឋាភិបាល កើត​ឡើ​ង​ពី​កិច្ច​ខិ​ត​ខំ​ប្រឹងប្រែង, ការចូលរួម, ការគាំទ្រ, ការប្តេជ្ញា និង ឆន្ទៈខ្ពស់របស់សមាជិកក្រុមការងារ ក្រ​សួ​ង​ស្ថា​ប័​ន​ពា​ក់​ព័ន្ធ​ ​និង រដ្ឋបាលខេត្តព្រះសីហនុ ក្នុងការរួមចំណែកលើកកម្ពស់បរិយាកាសធុរកិច្ចក្នុងខេត្តព្រះសីហនុ ឱ្យ​កាន់​​​តែ​ល្អ​ប្រសើរ និង អាចអនុញ្ញាតឱ្យគោលការណ៍លើកទឹកចិត្តអនុវត្តបានភ្លាម ប្រកបដោយតម្លាភាព និងប្រសិទ្ធភាព ។ ជារួម, រដ្ឋបាលខេត្តព្រះសីហនុ និង ក្រសួងស្ថាប័នពាក់ព័ន្ធ បានរួមគ្នាជាធ្លុងមួយ ក្រោ​ម​ការ​ដឹក​នាំ និង ដំបូលតែមួយរបស់ សម្តេចធិបតីនាយករដ្ឋមន្រ្តី ក្នុងការបំពេញភារកិច្ច ដោយមានកិច្ចសហការ និង ការទទួលខុសត្រូវខ្ពស់ ស្របតាមអភិក្រម «ជវភាពនៃប្រព័ន្ធតួអង្គតែមួយ» ពិសេស​ការ​ធ្វើដំ​ណើរ​ឆ្ពោះ​ទៅ​រកភាពជាម្ចាស់ និង ការបំពេញមុខងារជារដ្ឋបាលពិសេស ក្នុងការ​គ្រប់​គ្រង​រដ្ឋបាល​តំប​ន់សេ​ដ្ឋ​កិ​ច្ច​គំ​រូពហុបំណង ៕