សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ព្រឹត្តិការណ៍ «Gumball 3000 Rally» នៅកម្ពុជា គ្រោងនឹងរៀបចំឡើងនៅរាជធានីភ្នំពេញ និងខេត្តសៀមរាប ចាប់ពីថ្ងៃទី១៥-១៧ ខែកញ្ញា ឆ្នាំ២០២៤។
នៅថ្ងៃទី១៥ ខែកញ្ញា ឆ្នាំ២០២៤ ខាងមុខនេះ ក្បួនរថយន្ត Gumball 3000 ប្រមាណជាង១០០គ្រឿងនឹងធ្វើដំណើរឆ្លងកាត់ព្រំដែនប្រទេសវៀតណាមតាមច្រកបាវិតចូលមកប្រទេសកម្ពុជា។ អ្នកបើករថយន្តទំនើបៗ សុទ្ធសឹងជាបុគ្គលល្បីៗដូចជា សេដ្ឋី សែរាជវង្ស អតីតកីឡាករ កីឡាករ តារាហូលីវូដ តារាចម្រៀង តារារ៉េប អ្នកបង្កើតមាតិកាលើបណ្ដាញសង្គម និងបុគ្គលល្បីៗជាច្រើនទៀតជុំវិញពិភពលោក ។
ក្បួនរថយន្តនេះ នឹងឆ្លងកាត់ប្រទេសកម្ពុជារយៈពេល ២យប់ ៣ថ្ងៃ ឆ្លងកាត់រាជធានីភ្នំពេញ និងសៀមរាបអង្គរ ពោលគឺចាប់ពីថ្ងៃទី១៥ ដល់ថ្ងៃទី១៧ ខែកញ្ញា ដែលក្រសួងទេសចរណ៍បានទទួលភារកិច្ចដឹកនាំព្រឹត្តិការណ៍ «Gumball 3000 Rally Cambodia» ដែលមានកម្មវិធីដូចជា ៖ ការប្រគំតន្ត្រីដ៏ធំនៅរាជធានីភ្នំពេញ នាថ្ងៃទី១៥ ខែកញ្ញា ឆ្នាំ២០២៤ ដោយមានការចូលរួមពីសិល្បករខ្មែរល្បីៗ រួមជាមួយតារាល្បីៗលំដាប់ពិភពលោករបស់ Gumball 3000 , ព្រឹត្តិការណ៍គៀរករថវិកាសប្បុរសធម៌សម្រាប់បរិច្ចាគជូនមន្ទីរពេទ្យកុមារអង្គរខេត្តសៀមរាប និងព្រឹត្តិការណ៍កំណត់ត្រាពិភពលោក (Guinness World Records) នៅតំបន់រមណីយដ្ឋានប្រវត្តិសាស្ត្រអង្គរ ដែលមានរថយន្តទំនើបចតច្រើនជាងគេបំផុតលើពិភពលោក នៅថ្ងៃទី១៧ ខែកញ្ញា ឆ្នាំ២០២៤។
នៅក្នុងកិច្ចប្រជុំគណៈកម្មការដើម្បីតាមដាន និងត្រួតពិនិត្យវឌ្ឍនភាពនៃការរៀបចំព្រឹត្តិការណ៍ «Gumball 3000 Rally» នៅកម្ពុជា នាពេលថ្មីៗនេះ ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ បានថ្លែងថា៖
«នេះជាព្រឹត្តិការណ៍ដ៏សំខាន់ថ្នាក់ជាតិ ដើម្បីលើកស្ទួយវិស័យទេសចរណ៍ តែកម្មវិធីនេះមិនមានចំណាយថវិកាថ្នាក់ជាតិនោះទេ គឺក្រុមហ៊ុនជីបម៉ុងគ្រុប និងកម្មវិធី Gumball 3000 ព្រមទាំងដៃគូសហការ ជាអ្នកចំណាយ»។
ឯកឧត្តមរដ្ឋមន្ត្រី បានលើកឡើងថា៖ តាមរយៈព្រឹត្តិការណ៍នេះនឹងនាំមកនូវអត្ថប្រយោជន៍ដ៏ច្រើនសម្រាប់ប្រទេសកម្ពុជា ជាពិសេស ពាក់ព័ន្ធនឹងការចូលរួមផ្សព្វផ្សាយកាន់តែទូលំទូលាយនូវវិស័យទេសចរណ៍ ក៏ដូចជា ជាសារមួយពាំនាំទៅកាន់ពិភពលោកឱ្យកាន់តែស្គាល់ និងយល់ដឹងពីវប្បធម៌ អរិយធម៌ទេសចរណ៍ សេដ្ឋកិច្ច និងបង្ហាញកម្ពុជា ជាប្រទេសមួយដែលពោពេញទៅដោយសក្ដានុពលដ៏សម្បូរបែប។
ឯកឧត្តម សុខ សូកេន បានបញ្ជាក់ថា៖
« Gumball 3000 ជាការលើកតម្កើងកិត្យានុភាពកម្ពុជាលើឆាកអន្តរជាតិ ជាពិសេសលើកស្ទួយវិស័យទេសចរណ៍កម្ពុជា ។ ព្រឹត្តិការណ៍នេះកើតឡើងស្របពេលឆ្នាំទស្សនាសៀមរាប២០២៤ ឆ្នាំផ្លាស់ប្តូររវាងប្រជាជនកម្ពុជា ចិន និងឆ្នាំទេសចរណ៍កម្ពុជា-ឥណ្ឌា។ ដូច្នេះ យើងទាំងអស់គ្នាត្រូវរួមគ្នាធានាឱ្យកម្មវិធីនេះប្រព្រឹត្តទៅដោយជោគជ័យ និងដោយរលូនតាមរយៈការរក្សាបាននូវសន្តិសុខ សណ្តាប់ធ្នាប់ និងសុវត្ថិភាព»។
ឯកឧត្តមរដ្ឋមន្ត្រីទេសចរណ៍ បានលើកឡើងទៀតថា ៖ វាជាមោទនភាពដែលកម្ពុជាបានត្រូវជ្រើសរើសជាព្រឹត្តិការណ៍ 2024 Gumball 3000 Rally នេះហើយវាមានលក្ខណៈពិសេស ដោយសារជាខួប២៥ឆ្នាំនៃកម្មវិធី Gumball 3000 ។នេះជាឱកាសដែលកម្ពុជាបង្ហាញអ្វីជាភាពទាក់ទាញរបស់កម្ពុជាលើឆាកអន្តជាតិ បង្ហាញគោលដៅទេសចរណ៍ និងជាឱកាសល្អសម្រាប់កម្ពុជាផ្តល់នូវបដិសណ្ឋារកិច្ចល្អ និងកក់ក្តៅដើម្បីបន្សល់នៅការចងចាំជាប្រវត្តិសាស្ត្រ។
សូមបញ្ជាក់ថា ព្រឹត្តិការណ៍ 2024 Gumball 3000 Rally នេះ នឹងធ្វើដំណើរឆ្លងកាត់ចំនួន ៥ប្រទេសនៅក្នុងតំបន់អាស៊ីអាគ្នេយ៍ មាន វៀតណាម កម្ពុជា ថៃ ម៉ាឡេស៊ី និងសិង្ហបុរី ខណៈបន្ទាប់ពីចេញពីកម្ពុជាតាមច្រកប៉ោយប៉ែតឆ្ពោះទៅប្រទេសថៃ។
គួររំលឹកថា៖ កាលពីចុងសប្តាហ៍មុន គណៈកម្មការរៀបចំព្រឹត្តិការណ៍ Gumball 3000 ដែលមានសមាសភាពមកពីក្រសួងទេសចរណ៍ ក្រសួងមហាផ្ទៃ ក្រសួងវប្បធម៌ សាលារាជធានី និងក្រសួងស្ថាប័នពាក់ព័ន្ធជាច្រើនទៀតបានជួបប្រជុំពិភាក្សា ដើម្បីធ្វើយ៉ាងណាឱ្យកម្មវិធីប្រព្រឹត្តិទៅដោយរលូននិងជោគជ័យ ធានាបាននូវសន្តិសុខនិង សណ្តាប់ធ្នាប់៕
Account
Security
Favourite Content