បរទេស៖ យោងតាមប្រភពព័ត៌មានពី BBC បានរាយការណ៍ថា តម្លៃប្រេងបានធ្លាក់ចុះបន្ទាប់ពីប្រធានាធិបតីសហរដ្ឋអាម៉េរិក Donald Trump ស្នើសុំឲ្យក្រុមប្រទេសផលិតប្រេង OPEC និងអារ៉ាប៊ីសាអូឌីតកាត់បន្ថយតម្លៃប្រេង។

ទន្ទឹមនឹងនេះ តម្លៃប្រេងឆៅម៉ាក Brent ធ្លាក់ចុះមកនៅត្រឹម ៧៧,៩៥ ដុល្លារក្នុងមួយបារ៉ែល បើធៀបនឹងសប្តាហ័មុនមានតម្លៃ ៨២,០៣ ដុល្លារក្នុងមួយបារ៉ែល។ តម្លៃប្រេងឆៅម៉ាក West Texas Intermediate (WTI) ធ្លាក់ចុះមកនៅត្រឹម ៧៤,៣១ ដុល្លារក្នុងមួយបារ៉ែល បើធៀបនឹងសប្តាហ័មុនមានតម្លៃ ៨០,០៤ ដុល្លារក្នុងមួយបារ៉ែល។ នៅក្នុងសុន្ទរកថារបស់វេទិកាសេដ្ឋកិច្ចពិភពលោក (Weforum) នៅទីក្រុង Davos កាលពីថ្ងៃព្រហស្បតិ៍ សហរដ្ឋអាម៉េរិក Donald Trump លើកឡើងថា គាត់មានការភ្ញាក់ផ្អើលដែលអង្គការ OPEC មិនបន្ថយតម្លៃប្រេងតាំងពីមុនពេលបោះឆ្នោត ហើយតម្លៃនៅតែខ្ពស់ក្នុងពេលឥឡូវនេះដែលធ្វើឲ្យសង្គ្រាមបន្តទៅបាន។ Trump បន្ថែម​ថា ​តម្លៃ​ប្រេង​ខ្ពស់​កំពុង​ជួយ​ទ្រទ្រង់​មូលនិធិ​របស់ទីក្រុងម៉ូស្គូនៅក្នុង​ជម្លោះ។ ប្រសិនបើពួកគេអាចកាត់បន្ថយតម្លៃប្រេងបាននោះ សង្គ្រាម​អាចនឹងបញ្ចប់។

ការ​អត្ថាធិប្បាយ​របស់​ Trump ​លើ​តម្លៃ​ប្រេង​បាន​កើត​ឡើង ​បន្ទាប់​ពី​លោក​បាន​និយាយ​ជាមួយ​ព្រះអង្គម្ចាស់​អារ៉ាប៊ីសាអូឌីត Mohammed bin Salman កាលពី​ថ្ងៃ​ពុធ។ យោងតាមប្រព័ន្ធផ្សព្វផ្សាយរដ្ឋអារ៉ាប៊ីសាអូឌីត បានឲ្យដឹងថា ព្រះអង្គម្ចាស់ Bin Salman សន្យាថានឹងវិនិយោគចំនួន ៦០០ ពាន់លានដុល្លារអាម៉េរិកនៅសហរដ្ឋអាមេរិកក្នុងរយៈពេល ៤ ឆ្នាំខាងមុខ ប៉ុន្តែតួលេខនេះមិនត្រូវបានលើកឡើងនៅក្នុងសេចក្តីថ្លែងការណ៍របស់សេតវិមាននោះទេ។ ទោះបីជាមានការពិភាក្សាយ៉ាងស្និទ្ធស្នាលក៏ដោយ ប៉ុន្តែ Trump បន្តស្នើសុំឱ្យព្រះអង្គម្ចាស់វិនិយោគប្រហែល ១ ទ្រីលានដុល្លារអាម៉េរិក។

លោក David Oxley សេដ្ឋវិទូផ្នែកអាកាសធាតុ និងទំនិញនៅក្រុមហ៊ុន Capital Economics ការអត្ថាធិប្បាយទាំងនេះគឺស្របតាមបំណងប្រាថ្នារបស់ Trump ចង់ឲ្យតម្លៃប្រេងសាំងធ្លាក់ចុះទាប និងជាចេតនារបស់គាត់ក្នុងការប្រើប្រាស់ថាមពល ដើម្បីដាក់សម្ពាធលើរុស្ស៊ីឥ្យបញ្ចប់សង្រ្គាមនៅអ៊ុយក្រែន។ ទោះបីជា Trump បានស្នើឱ្យអារ៉ាប៊ីសាអូឌីតបង្កើនទិន្នផលប្រេង និងកាត់បន្ថយតម្លៃប្រេងទូទាំងពិភពលោកក៏ពិតមែន ប៉ុន្តែមិនមានភាពប្រាកដប្រជាថា អារ៉ាប៊ីសាអូឌីតនឹងអនុវត្តតាមនោះទេ។

ទន្ទឹមនឹងនេះ គេយល់ឃើញថា Trump ប្រើប្រាស់វេទិកាសេដ្ឋកិច្ចពិភពលោក (Weforum) ដើម្បីអំពាវនាវឱ្យក្រុមហ៊ុនជុំវិញពិភពលោកផលិតផលិតផលរបស់ពួកគេនៅក្នុងសហរដ្ឋអាមេរិក បើមិនដូច្នោះទេ ពួកគេអាចប្រឈមមុខនឹងការយកពន្ធលើទំនិញដែលចូលទៅក្នុងទីផ្សារអាមេរិក។ មិនត្រឹមតែប៉ុណ្ណោះ Trump អះអាងថា លោកនឹងទាមទារឱ្យមានការទម្លាក់អត្រាការប្រាក់ភ្លាមៗ ដោយសារអត្រាការប្រាក់ខ្ពស់ក្នុងពេលបច្ចុប្បន្នបណ្តាលមកពីឱនភាពខ្ពស់ និងមហន្តរាយសេដ្ឋកិច្ចក្រោមការកាន់កាប់របស់ប្រធានាធិបតីមុន Joe Biden ។ Trump បន្ថែមថា គាត់នឹងចាប់ផ្តើមប្រឈមមុខនឹងភាពវឹកវរសេដ្ឋកិច្ចដែលបណ្តាលមកពីគោលនយោបាយបរាជ័យនៃរដ្ឋបាលមុន។ ក្នុងរយៈពេល ៤ ឆ្នាំកន្លងមកនេះ រដ្ឋាភិបាលសហរដ្ឋអាម៉េរិកចំណាយប្រាក់ចំនួន ៨ ទ្រីលានដុល្លារក្នុងការចំណាយខ្ជះខ្ជាយ ដែលធ្វើឲ្យវិស័យថាមពលមានភាពតឹងតែង ខូចដល់បទប្បញ្ញត្តិ និងពន្ធលាក់កំបាំងដែលមិនធ្លាប់មានពីមុនមក។

លើសពីនេះ Trump ក៏បានលើកឡើងអំពីថាមពលធ្យូងថ្មផងដែរ ដើម្បីផ្តល់ថាមពលដល់មជ្ឈមណ្ឌលទិន្នន័យដែលត្រូវការសម្រាប់បញ្ញាសិប្បនិម្មិត។ គាត់បន្ថែមថា អាម៉េរិកត្រូវការថាមពលទ្វេដងពីទំហំពេលបច្ចុប្បន្ននេះ ដើម្បីអោយ AI មានទំហំធំដូចដែលគាត់ចង់បាន ហើយគាត់នឹងប្រើក្រឹត្យបន្ទាន់ដើម្បីពន្លឿនការសាងសង់រោងចក្រថាមពលថ្មី៕