សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ដីធ្លីនៅក្នុងរាជធានីភ្នំពេញ មិនមែនសុទ្ធតែមានតម្លៃថ្លៃគ្រប់កន្លែងនោះទេ ក្នុងនោះក៏មានតំបន់ និងទីតាំងខ្លះមានតម្លៃទាប ដែលអាចឱ្យវិនិយោគិនពិចារណាទិញទុក ដើម្បីអភិវឌ្ឍ ឬ លក់ យកចំណេញនៅថ្ងៃក្រោយ ជាពិសេសតំបន់ដែលស្ថិតនៅតាមបណ្តាជាយក្រុង។ ថ្ងៃនេះ បណ្តាញផ្សព្វផ្សាយព័ត៌មាន AMS Economy នឹងលើកយកដីដែលស្ថិតនៅតំបន់មួយចំនួនមានតម្លៃទាបជាងគេក្នុងរាជធានីភ្នំពេញ មកបង្ហាញជូនសម្រាប់ទុកពិចារណាមុនការសម្រេចបណ្ដាក់ទុនវិនិយោគ ។
តាមរបាយការណ៍របស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បានបង្ហាញពីតម្លៃដីធ្លីនៅទូទាំងរាជធានីភ្នំពេញ សម្រាប់ឆមាសទី១ឆ្នាំ២០២៥ ដោយក្នុងនោះឃើញថា តំបន់មួយចំនួនស្ថិតក្នុងខណ្ឌព្រែកព្នៅ ជាមធ្យមមានតម្លៃដីធ្លីទាបជាងគេក្នុងចំណោមបណ្ដាខណ្ឌទាំង១៤ ។ ខាងក្រោមនេះ ជារបាយការណ៍លម្អិតពីតម្លៃដីធ្លីនៅតាមសង្កាត់នីមួយៗក្នុងខណ្ឌមួយនេះ ។
នៅក្នុងខណ្ឌព្រែកព្នៅ សង្កាត់ដែលមានតម្លៃដីទាបជាងគេ គឺសង្កាត់ពន្សាំង ដោយដីនៅជាប់ផ្លូវតូចអាចមានតម្លៃចន្លោះពី ១០ដុល្លារ ទៅ ១៤០ដុល្លារអាម៉េរិកក្នុងមួយម៉ែត្រការ៉េ ហើយសម្រាប់ដីដែលស្ថិតនៅតាមបណ្ដោយផ្លូវធំៗអាចមានតម្លៃចន្លោះពី ២០ដុល្លារអាម៉េរិក ដល់ ២៤០ដុល្លារអាម៉េរិកក្នុងមួយម៉ែត្រការរ៉េ ។ ដោយឡែក សម្រាប់សង្កាត់ដែលមានតម្លៃដីខ្ពស់ជាងគេក្នុងខណ្ឌព្រែកព្នៅ គឺនៅសង្កាត់ព្រែកព្នៅ ដោយនៅតាមបណ្ដោយផ្លូវធំៗអាចមានតម្លៃចន្លោះពី ២៥០ដុល្លារ ដល់ ១១០០ដុល្លារអាម៉េរិកក្នុងមួយម៉ែត្រការ៉េ ហើយទីតាំងដីដែលស្ថិតនៅតាមបណ្ដោយផ្លូវតូចៗ អាចមានតម្លៃចន្លោះពី ៩០ ទៅ ៣៣០ដុល្លារអាម៉េរិកក្នុងមួយម៉ែត្រការ៉េ ។
សម្រាប់សង្កាត់ផ្សេងក្នុងខណ្ឌមួយនេះ ដូចជា សង្កាត់គោករការ ដីដែលជាប់នឹងផ្លូវធំអាចមានតម្លៃចន្លោះពី២៦០ដុល្លារអាម៉េរិក ដល់ ៩៤០ដុល្លារអាម៉េរិក និងជាប់ផ្លូវតូចអាចមានតម្លៃចន្លោះពី ១២០ដុល្លារ ដល់ ៣១០ដុល្លារអាម៉េរិកក្នុងមួយម៉ែត្រការ៉េ ។ សង្កាត់សំរោង តម្លៃអាចរកបាននៅចន្លោះពី ៩០ដល្លារទៅ ២៨០ដុល្លារអាម៉េរិកក្នុងមួយម៉ែត្រការ៉េ សម្រាប់ទីតាំងដែលជាប់ផ្លូវធំៗ និងចន្លោះពី២០ដុល្លារ ដល់ ៨០ដុល្លារក្នុងមួយម៉ែត្រការ៉េសម្រាប់ទីតាំងដែលជាប់ផ្លូវតូចៗ ឬដីនៅខាងក្នុង។
សម្រាប់សង្កាត់ពញាពន់ តម្លៃដីធ្លីក៏មិនថ្លៃប៉ុន្មានដែរ អាចស្ថិតនៅក្នុងចន្លោះពី ៣០ដុល្លារ ដល់ ១៧០ដុល្លារអាម៉េរិកក្នុងមួយម៉ែត្រការ៉េ សម្រាប់ទីតាំងនៅជាប់ផ្លូវធំៗ និងចន្លោះពី ២០ដុល្លារ ដល់ ៦០ដុល្លារអាម៉េរិកក្នុងមួយម៉ែត្រការ៉េ ។
សូមជម្រាបថា ទីតាំងដីធ្លីនៅក្នុងខណ្ឌព្រែកព្នៅនេះ មានទំហំធំៗ និងនៅទំនេរច្រើន ព្រោះតំបន់មួយចំនួនទើបត្រូវបានកាត់បញ្ចូលមកក្រោមការគ្រប់គ្រងរដ្ឋបាលរាជធានីភ្នំពេញ ខណៈពីមុនស្ថិតនៅក្រោមការគ្រប់គ្រងរបស់រដ្ឋបាលខេត្តកណ្ដាល ដូច្នេះ តម្លៃដីធ្លីនៅមានតម្លៃទាប ហើយការប្រើប្រាស់ដីធ្លីក៏មិនទាន់ច្រើនដូចនៅតំបន់ក្រុងដែរ ។
បើតាមអ្នកជំនាញនៃវិស័យអចលនទ្រព្យបានបញ្ជាក់ថា ដីនៅតំបន់ជាយក្រុង ឬតំបន់ដែលឆ្ងាយពីក្រុង តម្លៃភាគច្រើននៅទាបនៅឡើយ ដែលជាឱកាសល្អសម្រាប់អ្នកវិនិយោគក្នុងវិស័យដីធ្លី ឬសម្រាប់អញនកអភិវឌ្ឍន៍ទិញទុកសម្រាប់សាងសង់ជាបណ្តុំលំនៅដ្ឋានលក់យកចំណេញ ឬសាងសង់ជាឃ្លាំងសម្រាប់ជួលនៅពេលអនាគត។
លោក ឌឹត ចណ្ណា អគ្គនាយកក្រុមហ៊ុន អចលនទ្រព្យ ឡាក់គី ធ្លាប់បានមានប្រសាសន៍ថា តម្រូវការប្រើប្រាស់ដីធ្លីក្នុងរយៈពេលប៉ុន្មានឆ្នាំចុងក្រោយនេះ គឺជាប្រភេទដីឧស្សាហកម្ម សម្រាប់សាងសង់រោងចក្រ ឬជាឃ្លាំង ដូច្នេះ ដីធ្លីនៅតំបន់នៅជាយកុ្រងមានការទិញ-លក់ច្រើន ដោយសារមានតម្រូវការប្រើប្រាស់ ប៉ុន្តែ សម្រាប់តំបន់កណ្ដាលក្រុងបើលក់ក្នុងតម្លៃទីផ្សារ គឺមិនមានការទិញ-លក់នោះទេ លើកលែងតែ ម្ចាស់អចលនវត្ថុ ឬម្ចាស់ដី មានតម្រូវការថវិកាបន្ទាន់ និងលក់ក្រោមតម្លៃទីផ្សារ ទើបមានតម្រូវការពីអ្នកវិនិយោគ ៕
Account
Security
Favourite Content