សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងផ្លូវនាវាចរណ៍ពីទន្លេបាសាក់ទៅសមុទ្រកែបត្រូវបានរាជរដ្ឋាភិបាលដាក់ប្រសិទ្ធនាមថាជាគម្រោងព្រែកជីកហ្វូណនតេជោ ហើយគម្រោងនេះក៏ត្រូវបានរាជរដ្ឋាភិបាលបានអនុម័តក្នុងសម័យប្រជុំគណៈរដ្ឋមន្ត្រីកាលពីថ្ងៃចុងសប្ដាហ៍កន្លងទៅនេះផងដែរ។ គម្រោងនេះនឹងផ្ដល់អត្ថប្រយោជន៍ដ៏មហាសាលដល់ប្រទេសកម្ពុជា ជាពិសេសវិស័យដឹកជញ្ជូន វិស័យអចលនទ្រព្យ និងការវិនិយោគនៅក្នុងខេត្តកែប ខណៈដែលគម្រោងមួយនេះគ្រោងនឹងចំណាយទឹកប្រាក់រហូតដល់ ១,៧ពាន់លានដុល្លារអាមេរិក និងត្រូវប្រើពេលវេលា៤ឆ្នាំដើម្បីសាងសង់បញ្ចប់គម្រោង ។
យោងតាមឯកឧត្តម ផៃ ស៊ីផាន ប្រធានអង្គភាពអ្នកនាំពាក្យរាជរដ្ឋាភិបាលកម្ពុជាបានឱ្យដឹងថា គម្រោងនេះនឹងជួយកាត់បន្ថយរយៈពេល និងចម្ងាយនៃការដឹកជញ្ជូននាពេលបច្ចុប្បន្ន ដែលត្រូវឆ្លងកាត់តាមកំពង់ផែកៃមែបរបស់វៀតណាមប្រមាណ ៦៩គីឡូម៉ែត្រ ពីកំពង់ផែស្វយ័តក្រុងភ្នំពេញ ទៅកំពង់ផែក្រុងព្រះសីហនុ និងប្រមាណ ១៣៥គីឡូម៉ែត្រ ពីកំពង់ផែស្វយ័តក្រុងភ្នំពេញ ទៅកំពង់ផែខេត្តកំពត។
គម្រោងនេះ នឹងផ្ដល់ផលចំណេញលើតម្លៃដឹកជញ្ជូនប្រមាណ ១៧០លានដុល្លារអាមេរិក សម្រាប់ទំនិញប្រភេទកុងតឺន័រ ២០ហ្វីត ស្មើនឹង (១TEUs) និងចំណេញប្រមាណ ២២៣លានដុល្លារអាមេរិក សម្រាប់ទំនិញប្រភេទកុងតឺន័រ ៤០ហ្វីត (២TEUs) ដែលតម្លៃនេះ គឺទាបជាងតម្លៃដឹកជញ្ជូននាពេលបច្ចុប្បន្នប្រមាណ ១៦%។
គម្រោងព្រែកជីកហ្វូណនតេជោ នឹងផ្ដល់អត្ថប្រយោជន៍ជាច្រើនផ្សេងទៀតរួមមានដូចជា៖ ការបង្កើតតំបន់ពាណិជ្ជកម្ម និងមជ្ឈមណ្ឌលភស្ដុភារកម្ម ការអភិវឌ្ឍផែរណបថ្មីៗជាច្រើន ការពង្រីកតំបន់អភិវឌ្ឍន៍កសិកម្ម ធារាសាស្ត្រ វារីវប្បកម្ម និងចិញ្ចឹមសត្វ ការជួយគាំទ្រដល់ការអភិវឌ្ឍប៉ូលសេដ្ឋកិច្ចទី៤ របស់កម្ពុជា ការបង្កើតការងារបន្ថែមនៅកំពង់ផែស្វយ័តក្រុងព្រះសីហនុ កំពង់ផែស្វយ័តក្រុងភ្នំពេញ និងកំពង់ផែផ្សេងទៀត ការជំរុញការអភិវឌ្ឍទីក្រុង និងនគរូបនីយកម្ម និងការជំរុញការរីកចម្រើនផ្នែកអចលនទ្រព្យ ។
ភ្នាក់ងារអចលនវត្ថុជាច្រើននៅក្នុងខេត្តកែបបានលើកឡើងថា រហូតមកដល់ពេលនេះ សម្រាប់អ្នកមានធន់ធានជាច្រើននាក់បានទិញដីទុករួចជាសម្រេច ដោយខ្លះទិញសម្រាប់លក់បន្តយកចំណេញ និងខ្លះទៀតទិញដើម្បីទុកអភិវឌ្ឍន៍គម្រោងដោយខ្លួនឯង រាប់ទាំងដីនៅក្បែរឆ្នេរសមុទ្រកែប និងដីនៅជើងភ្នំ ក្នុងខេត្តកែបផងដែរ។
គួររំលឹកដែរថា កាលពីពេលថ្មីៗនេះ មានគម្រោងអភិវឌ្ឍន៍ក្រុងរណប និងតំបន់ទេសចរណ៍ពិសិដ្ឋចំនួន២ទីតាំងនៅខេត្តកែប ត្រូវបានរាជរដ្ឋាភិបាលកម្ពុជាអនុញ្ញាតឱ្យចាប់ផ្ដើមដំណើរការអភិវឌ្ឍ ដោយគម្រោងបង្កើតក្រុងរណបនេះ គឺសមស្របទៅនឹងការអភិវឌ្ឍគម្រោងព្រែកជីកហ្វូណនតេជោផងដែរ ៕
Account
Security
Favourite Content