សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រុមហ៊ុនអភិវឌ្ឍន៍អាកាសយានដ្ឋានអន្តរជាតិតេជោ (OCIC) គ្រោងនឹងចំណាយថវិកាប្រមាណ១០០លានដុល្លារអាម៉េរិក សាងសង់ផ្លូវទឹកប្រវែង១០គីឡូម៉ែត្រ ដើម្បីតភ្ជាប់ពីទន្លេបាសាក់ និងព្រែកជីកហ្វូណន់ចូលមកកាន់អាកាសយានដ្ឋាន ដើម្បីសម្រួលដល់ការធ្វើដំណើររបស់អ្នកដំណើរ ក៏ដូចជាអ្នកទេសចរទៅកាន់អាកាសយានដ្ឋានអន្តរជាតិកាន់តែងាយស្រួល និងស្របតាមផែនការអភិវឌ្ឍន៍តំបន់នេះឱ្យក្លាយជាមជ្ឈមណ្ឌលភស្តុភារកម្ម ។
នៅក្នុងពិធីសម្ពោធអាកាសយានដ្ឋានអន្តរជាតិតេជោ នៅព្រឹកថ្ងៃទី ២០ ខែតុលា ឆ្នាំ២០២៥ លោកអ្នកឧកញ៉ាបណ្ឌិត ពុង ឃាវសែ ប្រធានក្រុមប្រឹក្សាភិបាលក្រុមហ៊ុន OCIC ដែលជាក្រុមហ៊ុនអភិវឌ្ឍន៍ព្រលានយន្តហោះអន្តរជាតិតេជោ បានមានប្រសាសន៍ថា ក្រុមហ៊ុនគ្រោងនឹងសាងសង់ផ្លូវទឹកមួយខ្សែប្រវែង ១០គីឡូម៉ែត្រ តភ្ជាប់ពីបឹងជើងលោកប៉ែកខាងត្បូងអាកាសយានដ្ឋានអន្តរជាតិ ទៅកាន់ទន្លេបាសាក់ និងព្រែកជីកហ្វូណនតេជោ ហើយតភ្ជាប់បន្តទៅដល់ក្រុងកែប ដែលជាច្រកសមុទ្ររបស់កម្ពុជា ដើម្បីឱ្យតំបន់អាកាសយានដ្ឋានអន្តរជាតិតេជោក្លាយទៅជាមជ្ឈមណ្ឌលដឹកជញ្ជូនតាមផ្លូវអាកាស ផ្លូវគោក និងផ្លូវទឹក ។ គម្រោងនេះគ្រោងនឹងចំណាយថវិកាប្រមាណ១០០លានដុល្លារអាម៉េរិក ។
លោកអ្នកឧកញ៉ាបន្តថា ក្រៅពីនេះ ក្រុមហ៊ុន OCIC ក៏បានចាប់ផ្ដើមសាងសង់ទីក្រុងរណបនៅក្បែរអាកាសយានដ្ឋានអន្តរជាតិតេជោ ដោយចាប់ផ្ដើមសាងសង់លំនៅឋានតម្លៃសមរម្យសម្រាប់បុគ្គលិករាប់ពាន់នាក់ដែលបម្រើការនៅក្នុងអាកាសយានដ្ឋាន និងសាងសង់មជ្ឈមណ្ឌលពាណិជ្ជកម្មនៅក្នុងទីក្រុងរណបអាកាសយានដ្ឋាននេះ ។
លោកអ្នកឧកញ៉ាបន្ថែមថា ៖
«ទីក្រុងរណបអាកាសយានដ្ឋានអន្តរជាតិនេះ មានផែនការរួមសម្រាប់អភិវឌ្ឍន៍លំនៅឋាន មជ្ឈមណ្ឌលពាណិជ្ជកម្មអន្តរជាតិ រោងចក្រ និងឃ្លាំង ជាពិសេសនោះគឺការអភិវឌ្ឍតំបន់សេដ្ឋកិច្ចពិសេស ដើម្បីជំរុញដល់ការនាំចេញ តាមរយៈអាកាសយានដ្ឋានអន្តរជាតិតេជោ ( TIA ) ។ ក្រុមហ៊ុន OCIC ក៏បានសាងសង់ឧទ្យានវប្បធម៌ TIA ដែលហៅថា ឧទ្យានវប្បធម៌សម្ដេចតេជោ ដើម្បីផ្សព្វផ្សាយដល់ទេសចរក្នុង និងក្រៅប្រទេសឱ្យយល់ដឹងពីវប្បធម៌ខ្មែរផងដែរ» ។
នៅក្នុងឱកាសនោះដែរ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា តំបន់ជុំវិញនៃអាកាសយានដ្ឋាននេះនឹងក្លាយជាមជ្ឈមណ្ឌលភស្តុភារកម្មដ៏មានសក្ដានុពលក្នុងពេលឆាប់ៗនេះ ដោយទំនិញនានាអាចចេញតាមច្រកអាកាសយានដ្ឋានអន្តរជាតិក៏បាន តាមច្រកផ្លូវគោកក៏បាន ហើយតាមផ្លូវទឹកក៏បាន ខណៈដែលក្រុមហ៊ុននឹងសាងសង់ផ្លូវទឹកមួយខ្សែពីអាកាសយានដ្ឋានទៅទន្លេបាសាក់ រួចបន្តទៅព្រែកជីកហ្វូណនតេជោ ។
អ្នកស្រាវជ្រាវការអភិវឌ្ឍសង្គម សេដ្ឋកិច្ចកម្ពុជា លោកបណ្ឌិត ជ័យ តិច បានលើកឡើងថា គម្រោងតភ្ជាប់ផ្លូវទឹកទៅអាកាសយានដ្ឋានអន្តរជាតិថ្មីនេះ នឹងជួយជំរុញកំណើនសេដ្ឋកិច្ចនៅតំបន់ជាយក្រុង ជាពិសេសខេត្តកណ្តាល និងខេត្តតាកែវ តាមរយៈការបង្កើតការងារថ្មី និងទាក់ទាញការវិនិយោគបន្ថែមទៀត។
លោកបន្ថែមថា ៖
«គម្រោងថ្មីនេះ មិនត្រឹមតែជួយកាត់បន្ថយថ្លៃដឹកជញ្ជូន និងសម្រួលដល់ការនាំចេញ-នាំចូលប៉ុណ្ណោះទេ ប៉ុន្តែថែមទាំងនឹងក្លាយជាកម្លាំងចលករថ្មីមួយដែលជំរុញកំណើនសេដ្ឋកិច្ចជាតិ និងពង្រឹងតួនាទីភូមិសាស្ត្រនយោបាយរបស់កម្ពុជាក្នុងតំបន់ផងដែរ»។
អ្នកជំនាញនៃវិស័យអចលនទ្រព្យជាច្រើនបានបង្ហាញពីសុទិដ្ឋិនិយមចំពោះតំបន់នៅជុំវិញព្រលានយន្តហោះអន្តរជាតិតេជោដោយរំពឹងថា តំបន់នេះ នឹងកាន់តែមានសក្ដានុពលខ្ពស់ជាមួយនឹងការអភិវឌ្ឍលើឧស្សាហកម្ម រោងចក្រ សហគ្រាស និងលំនៅឋាន ខណៈហេដ្ឋារចនាសម្ព័ន្ធជាច្រើនត្រូវបានរដ្ឋសាងសង់រួចជាស្រេចទៅហើយ ។
លោក ប៉ូ អ៊ាវគង់ អគ្គនាយកក្រុមហ៊ុន Advance បានលើកឡើងថា តំបន់នៅជុំវិញព្រលានយន្តហោះថ្មីជាតំបន់ដែលផ្ដោតលើឧស្សាហកម្ម ហើយការរីករាលដាលនៃវិស័យនេះ ក៏នឹងកាន់តែខិតទៅប៉ែកខាងត្បូងរហូតដល់ទន្លេបាទី ព្រោះនៅតំបន់ជុំវិញព្រលានយន្តហោះមិនអាចសាងសង់អគារខ្ពស់ៗបានទេ ដូច្នេះមានតែសាងសង់ផ្នែកឧស្សាហកម្មនេះហើយ ។
លោកបន្តថា តំបន់ប៉ែកខាងត្បូង និងខាងលិចរាជធានីភ្នំពេញ ជាតំបន់ដែលមានការតភ្ជាប់ទៅកាន់តំបន់ផ្សេងៗទៀតយ៉ាងងាយស្រួល ព្រោះតំបន់នេះ មានផ្លូវក្រវាត់ក្រុងទី៣ ដែលអាចដឹកជញ្ជូនទំនិញទៅកាន់កំពង់ផែទឹកជ្រៅ ហើយក៏ងាយស្រួលដឹកទៅកាន់ព្រំដែនគោកផងដែរ៕
Account
Security
Favourite Content