សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
តាកែវ ៖ ក្រសួងរៀបចំដែនដី នគរូបនីយកម្ម និងសំណង់ និងរដ្ឋបាលខេត្តតាកែវ មានគម្រោងក្នុងការប្រែក្លាយបឹងតាកែវ ឱ្យទៅជាសួនសាធារណៈដ៏ធំមួយក្នុងក្រុងដូនកែវ ខេត្តតាកែវ ដើម្បីផ្ដល់នូវកន្លែងលំហែកម្សាន្តដល់សាធារណជន និងជាការគិតគូរដល់សុខភាព ក៏ដូចជាការបង្កើននូវគុណតម្លៃជីវិតសម្រាប់អ្នកក្រុងដូនកែវ និងអ្នកខេត្តតាកែវទាំងមូលផងដែរ ។
ថ្លែងក្នុងកិច្ចប្រជុំពិភាក្សាលើការរៀបចំលំហសាធារណៈបឹងតាកែវ កាលពីថ្ងៃទី០១ ខែកក្កដា ឆ្នាំ២០២៥ កន្លងទៅនេះ ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា ក្រសួងរៀបចំដែនដី និងរដ្ឋបាលខេត្តតាកែវ បាន និងកំពុងផ្តួចផ្តើមអនុវត្តផែនការមេ និងប្លង់គោលរបស់ខេត្តតាកែវ ដោយយកបឹងតាកែវជាចំណុចចាប់ផ្តើមក្នុងការរៀបចំក្រុង ដែលបឹងនេះផ្សារភ្ជាប់អរិយធម៌ វប្បធម៌ និងប្រវត្តិសាស្រ្តរបស់កម្ពុជាតាំងពីកើតនគរ ហើយការប្រែក្លាយបឹងតាកែវឱ្យទៅជាសួនសាធារណ:ដ៏ធំមួយក្នុងក្រុងដូនកែវ នឹងផ្តល់នូវកន្លែងលំហែកម្សាន្តដល់សាធារណជន និងជាការគិតគូរដល់សុខភាព និងបង្កើននូវគុណតម្លៃជីវិតសម្រាប់អ្នកក្រុងដូនកែវ និងអ្នកខេត្តតាកែវ។
ឯកឧត្តមឧបនាយករដ្ឋមន្ត្រី បានបន្តថា ការជួបជុំគ្នានាពេលនេះគឺដើម្បីជជែកពិភាក្សាប្រមូលធាតុចូល និងស្វែងរកការឯកភាពគ្នាបន្ថែមទៀតក្នុងការងាររៀបចំលំហសាធារណៈបឹងតាកែវឱ្យបានល្អប្រសើរ និងរក្សាបាននូវគុណតម្លៃជាវប្បធម៌ សង្គម សុខភាព និងគុណភាពជីវិតសម្រាប់ប្រជាពលរដ្ឋ។
ដោយឡែក បន្ទាប់ពីបញ្ចប់ការងារវាស់វែងដីធ្លីក្នុងខេត្តតាកែវរួចនោះ ជំហានបន្ទាប់គឺឯកឧត្តមឧបនាយករដ្ឋមន្ត្រី នឹងរៀបចំផែនការមេជូនរដ្ឋបាលខេត្តតាកែវក្នុងគោលដៅចង់ឱ្យខេត្តតាកែវក្លាយជាខេត្តមួយដែលមានការអភិវឌ្ឍន៍ ក៏ដូចជាការរៀបចំក្រុងបានល្អ ដូច្នេះ ឯកឧត្តមបានស្នើដល់អគ្គនាយកដ្ឋានសុរិយោដី និងអគ្គនាយកដ្ឋានរៀបចំដែនដី ធ្វើកិច្ចសហការជាមួយអាជ្ញាធរមូលដ្ឋានក្នុងការរៀបចំផែនការមេដើម្បីប្រែក្លាយខេត្តតាកែវដែលមានទំហំសេដ្ឋកិច្ចធំហើយនោះ ឱ្យកាន់តែមានលក្ខណៈល្អប្រសើរថែមទៀត។
ជាមួយនេះ ឯកឧត្តម សាយ សំអាល់ ក៏បានជំរុញដល់មន្ត្រីជំនាញ និងអាជ្ញាធរដែនដី ត្រូវពន្យល់ណែនាំដល់ប្រជាពលរដ្ឋក្នុងក្រុងដូនកែវនេះឱ្យបានយល់ពីគោលបំណងនៃគម្រោងដែលយើងទាំងអស់គ្នាគ្រោងនឹងធ្វើនេះគឺមានគុណតម្លៃយ៉ាងខ្លាំងសម្រាប់ជីវិតប្រជាពលរដ្ឋ និងសម្រាប់សង្គមរបស់អ្នកក្រុងដូនកែវ។
ឯកឧត្តមឧបនាយករដ្ឋមន្ត្រី បានបញ្ជាក់ថា ដោយសារតែ តាកែវ ជាខេត្តដែលមានទំហំសេដ្ឋកិច្ចធំ ឯកឧត្តម នឹងរៀបចំកសាងសួនច្បារសាធារណៈដ៏ធំមួយនៅកណ្ដាលក្រុងដូនកែវ ដោយយកធនធានដែលមានស្រាប់គឺបឹងតាកែវមកប្រើប្រាស់ និងកែច្នៃទៅជាលំហសាធារណៈសម្រាប់សារធារណជនមកលំហែកម្សាន្ត។ ក្នុងនោះកិច្ចការដំបូងដែលត្រូវធ្វើ គឺអគ្គនាយកដ្ឋានសុរិយោដី និងមន្ទីររៀបចំដែនដីនគរូបនីយកម្ម សំណង់ និងសុរិយោដី ខេត្តតាកែវ ត្រូវចុះបញ្ជីបឹងតាកែវនេះឱ្យបានច្បាស់លាស់ និងត្រូវស្នើសុំយោបល់ពីក្រសួងធនធានទឹក និងឧតុនិយម ហើយអគ្គនាយកដ្ឋានរៀបចំដែនដី, គណៈស្ថាបត្យករ ព្រមទាំងអាជ្ញាធរមូលដ្ឋាន និងកងកម្លាំងមានសមត្ថកិច្ចត្រូវចូលរួមក្នុងការអនុវត្តកិច្ចការនេះទាំងអស់គ្នា នោះទើបគម្រោងក្នុងការរៀបចំសួនច្បារសាធារណៈបឹងតាកែវអាចសម្រេចបានជោគជ័យ ជាប្រយោជន៍សម្រាប់អ្នកក្រុងដូនកែវក៏ ដូចជាឆ្លើយតបទៅនឹងគោលបំណងរបស់ប្រមុខរាជរដ្ឋាភិបាលកម្ពុជា គឺសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងការរៀបចំឱ្យមានលំហសាធារណៈដើម្បីបង្កើនគុណភាពជីវិតរបស់ប្រជាពលរដ្ឋ និងកសាងនូវភូមិឋានក្សេមក្សាន្តសម្រាប់ប្រជាពលរដ្ឋផងដែរ៕
Account
Security
Favourite Content