សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ផ្លូវចំនួន២ខ្សែនៅក្នុងខេត្តព្រះសីហនុ រួមមានផ្លូវលេខ ១៤៦B និងផ្លូវលេខ ១៤៨ បាន និងកំពុងដើរតួនាទីយ៉ាងសំខាន់ក្នុងការជំរុញកំណើនសកម្មភាពសេដ្ឋកិច្ច ពាណិជ្ជកម្ម ទេសចរណ៍ ក៏ដូចជាលើកកម្ពស់ការតភ្ជាប់ខេត្តភាគនិរតីនេះឱ្យកាន់តែមានភាពប្រទាក់ក្រឡាគ្នា និងកាន់តែងាយស្រួលក្នុងការដឹកជញ្ជូនទំនិញគ្រប់ប្រភេទ។
ផ្លូវនេះបានតភ្ជាប់ពីតំបន់ឧស្សាហកម្ម តំបន់សេដ្ឋកិច្ចពិសេស ដែលជាកន្លែងផលិតមុខទំនិញផ្សេងៗទៅកាន់កំពង់ផែសំខាន់ៗចំនួនពីរ រួមមានកំពង់ផែស្ទឹងហាវ និងកំពង់ផែស្វយ័តក្រុងព្រះសីហនុ ដូចនេះផ្លូវទាំង២ខ្សែនេះ អាចនិយាយបានថា បានតភ្ជាប់ពីកន្លែងផលិតទៅកាន់កំពង់ផែទឹកជ្រៅ ហើយបន្តដឹកទំនិញចេញទៅកាន់ទីផ្សារលើពិភពលោក ។
បើតាមក្រសួងសាធារណការ និងដឹកជញ្ជូនបានឱ្យដឹងថា គម្រោងតភ្ជាប់ផ្លូវទាំងពីរខ្សែនេះមានប្រវែងសរុបប្រមាណ ៤៣,០២គីឡូម៉ែត្រ ដែលក្នុងនោះ ផ្លូវលេខ១៤៦B ឬវិថីសុវត្ថិភាពសម្តេចព្រះសង្ឃរាជ ទេព វង្ស មានប្រវែងប្រមាណ ២០,៦៧គីឡូម៉ែត្រ គិតចាប់ពីចំណុចបំបែកផ្លូវជាតិលេខ៤ ត្រង់គីឡូម៉ែត្រលេខ ១៧៨+១៦៥ ស្ថិតនៅភូមិវាលធំ ឃុំវាលរេញ ស្រុកព្រៃនប់ រហូតដល់ភូមិ១ ឃុំអូរត្រេះ ស្រុកស្ទឹងហាវ ដែលត្រូវបានស្ថាបនាដោយក្រាលបេតុងកៅស៊ូ AC កម្រាស់ ៩សង់ទីម៉ែត្រ និងមានទទឹងតួផ្លូវ ១១ម៉ែត្រ។ ចំណែកឯ ផ្លូវខេត្តលេខ១៤៨ ឬតីរវិថីសម្តេចតេជោ ហ៊ុន សែន មានប្រវែងប្រមាណ ២២,៣៤គីឡូម៉ែត្រ បន្តពីស្រុកស្ទឹងហាវ រហូតដល់ចំណុចប្រសព្វផ្លូវជាតិលេខ៤ ត្រង់គីឡូម៉ែត្រលេខ ២២៥+៥៥០ កំពង់ផែស្វយ័តក្រុងព្រះសីហនុ ដែលត្រូវបានស្ថាបនាដោយក្រាលបេតុងសសៃដែក កម្រាស់ ២៦សង់ទីម៉ែត្រ និងមានទទឹងតួផ្លូវ ១១ម៉ែត្រ។
ក្រសួងសាធារណការ និងដឹកជញ្ជូន បានបញ្ជាក់ថា ក្នុងគម្រោងតភ្ជាប់ផ្លូវទាំងពីរខ្សែនេះក៏មានការសាងសង់សំណង់សិល្បការ្យផ្សេងៗ ដូចជា សាងសង់ស្ពានថ្មីចំនួន ០១កន្លែង និងពង្រីកស្ពានចាស់ចំនួន ១៧កន្លែង ព្រមទាំងដាក់លូគ្រប់ប្រភេទចំនួន ១៦១កន្លែងផងដែរ ។
រាជរដ្ឋាភិបាលបានកំណត់យកខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង និងបានទាក់ទាញវិនិយោគិនមកបណ្ដាក់ទុនវិនិយោគនៅក្នុងខេត្តព្រះសីហនុកាន់តែច្រើន ។ ជាមួយគ្នានេះដែរ រាជរដ្ឋាភិបាលក៏បានដាក់ចេញនូវកម្មវិធីពិសេសជំរុញការវិនិយោគខេត្តព្រះសីហនុ ដែលកម្មវិធីនេះបានលើកទឹកចិត្តដល់វិនិយោគិនដែលចូលមកបណ្ដាក់ទុនវិនិយោគនៅក្នុងខេត្តព្រះសីហនុ ដូចជាទទួលបានការលើកទឹកចិត្តផ្នែកពន្ធផ្សេងៗពីរដ្ឋជាដើម ។
ក្រៅពីផ្លូវខេត្តចំនួន២ខ្សែនៅតំបន់មាត់សមុទ្រនៃខេត្តព្រះសីហនុនេះដែរ រាជរដ្ឋាភិបាលបានចំណាយថវិកាជាច្រើនសាងសង់ផ្លូវរាប់សិបខ្សែទៀតនៅក្នុងខេត្តព្រះសីហនុ ដើម្បីសម្រួលដល់ការធ្វើដំណើរភ្ញៀវទេសចរជាតិ និងអន្តរជាតិទៅលេង និងសម្រាកកម្សាន្ត ក៏ដូចជាទាក់ទាញការវិនិយោគបន្ថែមមកកាន់ខេត្តមួយនេះ ។
លោក វណ្ណ ធី ភ្នាក់ងារអចលនវត្ថុមួយរូបប្រចាំខេត្តព្រះសីហនុបានឱ្យដឹងថា ក្នុងរយៈពេលប៉ុន្មានឆ្នាំចុងក្រោយនេះ ជាពិសេសក្រោយពេលផ្លុវជាច្រើនខ្សែក្នុងខេត្តព្រះសីហនុបានសាងសង់រួច និងការដាក់ចេញនូវកម្មវិធីពិសេសជំរុញការវិនិយោគខេត្តព្រះសីហនុ ឃើញថាមានវិនិយោគិនចាប់ផ្ដើមចូលមកកាន់ខេត្តព្រះសីហនុ និងស្វែងរកការវិនិយោគជាបន្តបន្ទាប់ ជាពិសេស ទាន់មានឱកាសទទួលបានការអនុគ្រោះ និងលើកទឹកចិត្តពីរាជរដ្ឋាភិបាល ។
លោកបន្តថា ក្នុងចំណោមគម្រោងវិនិយោគដែលមាននៅក្នុងខេត្តព្រះសីហនុ ឃើញថា គម្រោងឧស្សាហកម្ម ដូចជា រោងចក្រ តំបន់សេដ្ឋកិច្ចពិសេស បានទាក់ទាញវិនិយោគិនមកបណ្ដាក់ទុនវិនិយោគច្រើនជាងគេដែលមានទីតាំងស្ថិតនៅក្រៅក្រុងព្រះសីហនុ ខណៈគម្រោងអគារខ្ពស់ៗ អគារពាណិជ្ជកម្ម សណ្ឋាគារ ភាគច្រើននៅក្នុងក្រុង៕
Account
Security
Favourite Content