ពោត ជាដំណាំសេដ្ឋកិច្ចដ៏សំខាន់របស់កម្ពុជា ដែលមិនត្រឹមតែសម្រាប់ផ្គត់ផ្គង់តម្រូវការទីផ្សារក្នុងស្រុកនោះទេ ថែមទាំងជាកសិផលចម្បងសម្រាប់ការនាំចេញទៅកាន់ទីផ្សារប្រទេសជិតខាង ក៏ដូចជាទីផ្សារអន្តរជាតិផងដែរ។ អាស្រ័យដោយមើលឃើញពីសារសំខាន់ និងភាពចាំបាច់ទាំងនេះ អ្នកជំនាញកសិកម្មផ្នែកដាំដុះបានចងក្រងជាឯកសារជំនួញស្មារតីដល់ប្រជាកសិករដោយបានបង្ហាញពីបច្ចេកទេសក្នុងការដាំដុះ ការថែទាំ ដែលធ្វើយ៉ាងណាឱ្យកសិករកាន់តែអាចមានលទ្ធភាពទទួលបានទិន្នផលកាន់តែច្រើន។  

បើតាមឯកសារផ្សព្វផ្សាយរបស់ក្រសួងកសិកម្ម រុក្ខាប្រមាញ់ និងនេសាទ បានបង្ហាញថា ពោត ជាដំណាំដែលកសិករអាចដាំដុះ និងទទួលផលបានក្នុងរយៈពេលខ្លី។ តួយ៉ាង ដូចជា ពោតពូជស្រាលដែលត្រូវការរយៈពេល ៨០-១១០ថ្ងៃ និងពូជធ្ងន់ប្រមាណ ១១០-១៤០ថ្ងៃ ហើយអាចឱ្យផលប្រមាណ ៤-៩តោន ក្នុងមួយហិកតា។

នៅក្នុងកម្រងឯកសារដែលបានផ្សព្វផ្សាយបានបញ្ជាក់ថា ពោត ជាប្រភេទដំណាំមានដើមឈរត្រង់ កម្ពស់ពី ១.៥-២ ឬ ៣ម៉ែត្រ និងមានប្រព័ន្ធឫសដុះលូតលាស់ខ្លាំង ប៉ុន្តែគ្មានឫសកែវទេ ហើយដើម្បីដាំឱ្យទទួលបានផលល្អ អ្នកដាំត្រូវចេះជ្រើសរើសពូជឱ្យបានត្រឹមត្រូវ ដោយរើសយកពូជណាដែលជាពូជសុទ្ធល្អ មានប្រភព និងអាយុកាលត្រឹមត្រូវ ធន់នឹងកត្តាចង្រៃ និងអាកាសធាតុ មានផលដំណុះចាប់ពី ៨៥ភាគរយឡើងទៅ ជាពិសេសគឺជាប្រភេទពោតដែលមានទីផ្សារល្អផងដែរ។

ចំពោះការដាំដុះ កសិករត្រូវការរៀបចំដីដាំដុះ ដែលដំណាំពោត គេអាចដាំបានពីររបៀបគឺ ដាំដោយគ្រាប់ និងដាំដោយបណ្ដុះកូន​។ សម្រាប់ការដាំដោយបណ្ដុះកូន គេត្រូវត្រាំពូជក្នុងទឹកក្ដៅឧណ្ហៗ កម្ដៅ ៥០អង្សាសេរយៈពេល ២០នាទី រួចផ្អាប់ក្នុងក្រណាត់សើម ៤៨ម៉ោង ប្រឡាកគ្រាប់ពូជជាមួយថ្នាំផ្សិតទ្រីកូឌែម៉ា ដោយពូជពោត​ ១គីឡូក្រាម ប្រើទ្រីកូឌែម៉ា ២.៥ខាំ។ ដាំគ្រាប់ពោត ១គ្រាប់ក្នុងកន្ទោង ឬ ១ប្រឡោះថាស ដោយដាក់គ្រាប់ពូជផ្ដេកល្មមមិនសូវជ្រៅពេក ស្រោចទឹក ១ថ្ងៃម្ដងនៅពេលព្រឹក ហើយគ្របសំណាញ់ការពារកាត់បន្ថយកម្ដៅថ្ងៃក្ដៅខ្លាំង លុះកូនពោតអាយុ ៨-១៥ថ្ងៃគេអាចដកដាំបានហើយ។

ចំណែកឯការរៀបចំដី កសិករត្រូវភ្ជួរ និងរាស់ដី ២ដង ហាលដីឱ្យស្ងួតល្អ រយៈពេលពី ១០-១៥ថ្ងៃ ទើបលើករងដាំ ១ជួរ ឬ២ជួរ ដោយរងមានទទឹង ១ម៉ែត្រ និងបណ្ដាយតាមលទ្ធភាពដី កម្ពស់រង ២-៣តឹកនៅរដូវប្រាំង និង ៤តឹកនៅរដូវវស្សា។ ចំណែកការផ្គត់ផ្គង់ទឹក ក្នុងករណីប្រើប្រភពធម្មជាតិវាត្រូវការទឹកភ្លៀង ៥០០-៨០០ម.ម ឬអាចប្រើប្រព័ន្ធតំណក់ទឹកតាមដំណាក់កាលនៃការលូតលាស់របស់ដំណាំពោត។

ជាមួយគ្នានេះ ដើម្បីឱ្យពោតកាន់តែលូតលាស់បានល្អ កសិករក៏ត្រូវយល់ដឹងពីការប្រើប្រាស់ជីដើម្បីបំប៉នដំណាំ ដូចជាការប្រើជីលាមកសត្វស្ងួត ធ្យូងអង្កាម និងទ្រីកូឌែម៉ា ទ្រាប់បាតមុនដាំ។ បន្ទាប់ពីដាំបាន ២០-២៥ថ្ងៃក្រោយ គេអាចប្រើកំប៉ុសបូកាឈិ បរិមាណប្រមាណ កន្លះតោនក្នុងមួយហិកតា ក្រៅពីនេះ គេត្រូវប្រើទ្រីកូឌែម៉ា លាយជាមួយទឹកស្រោច ១សប្ដាហ៍ម្ដង ដោយទ្រីកូឌែម៉ា ២០ក្រាមលាយជាមួយទឹក ២០លីត្រ។

ទន្ទឹមគ្នានេះដែរ ដំណាំពោតក៏ត្រូវបានយាយីដោយកត្តាចង្រៃផ្សេងៗដូចជា ដង្កូវកាត់ស្លឹក ដង្កូវស៊ីរូងចោះផ្លែ ដែលគេអាចកម្ចាត់វាបានតាមរយៈការកាប់ និងដុតផ្នែកដែលបំផ្លាញចោល ឬកប់ក្នុងដីឱ្យឆ្ងាយពីចំការ ប្រើអន្ទាក់ស្អិតពណ៌លឿង ឬថ្នាំពុលធម្មជាតិ តែក្នុងករណីមានការបំផ្លាញខ្លាំងជម្រើសចុងក្រោយគឺគេអាចប្រើថ្នាំកសិកម្ម តែត្រូវធ្វើតាមការណែនាំឱ្យបានត្រឹមត្រូវ៕