សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បច្ចុប្បន្ននេះ ការទិញអចលនទ្រព្យ ជាពិសេសទិញដីធ្លីនៅតំបន់ណាមួយ អ្នកទិញតែងតែមានការព្រួយបារម្ភចំពោះបញ្ហាឯកសារលើអចលនទ្រព្យទាំងនោះ ដោយខ្លាចទិញហើយមិនអាចកាត់ឈ្មោះឬ មិនមានភាពស្របច្បាប់ ។ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក សន សៀប បានបង្ហើបពីក្បួនក្នុងការទិញអចលនទ្រព្យដែលប្រកបដោយសុវត្ថិភាព ។
លោក សន សៀប បានមានប្រសាសន៍ថា ដើម្បីទិញអចលនទ្រព្យប្រកបដោយសុវត្ថិភាព សម្រាប់អ្នកទិញគួរពិចារណាមុននឹងសម្រេចចិត្តទិញនៅទីតាំងណាមួយ ឬអនុវត្តក្នុងការទិញអចលនទ្រព្យ ដោយក្នុងនោះមានដូចជា ការត្រួតពិនិត្យទៅលើឯកសារពាក់ព័ន្ធនឹងអចលនទ្រព្យនោះ ។ ការពិនិត្យឯកសារនេះពិតជាមានសារសំខាន់ណាស់ ព្រោះបើសិនជាអ្នកទិញបានទិញអចលនទ្រព្យនោះហើយ តែមិនអាចផ្ទេរឈ្មោះបាន នោះនឹងធ្វើឱ្យមានភាពស្មុគ្រស្មាញ ។ អចលនទ្រព្យខ្លះមានប្លង់រឹងក៏ពិតមែន ប៉ុន្តែវាអាចមានជាប់បណ្ដឹង ដូចជាបណ្ដឹងសារទុក ដូច្នេះ វាមិនអាចផ្ទេរឈ្មោះបានទេ លុះត្រាតែដោះស្រាយបញ្ហាឱ្យរួចរាល់សិន ។
លោកបន្តថា ៖
«ដើម្បីឱ្យដឹងថាអចលនទ្រព្យនោះមានជាប់បណ្ដឹង ឬអចលនទ្រព្យនោះមិនមានបញ្ហា យើងអាចទៅរកអ្នកជំនាញដូចជាសុរិយោដី មេធាវី ឬក៏ភ្នាក់ងារអចលនទ្រព្យជាដើម ។ អាជ្ញាធរសុរិយោដី គឺជាអ្នកចុះបញ្ជី និងជាអ្នកកាន់បញ្ជីអចលនទ្រព្យដែលបានចុះបញ្ជី ដូច្នេះគាត់ដឹងរឿងពាក់ព័ន្ធនឹងអចលនទ្រព្យ ប្រវត្តិអចលនទ្រព្យនោះច្បាស់ ។ ក្រៅពីសុរិយោដី អាចទៅរកមេធាវី ដើម្បីជួយមើលឯកសារនៃអចលនទ្រព្យដែលបម្រុងនឹងទិញនោះ ព្រោះថាបើសិនជាយើងមិនធ្លាប់ទិញអចលនទ្រព្យនោះទេ ទោះបីជាប្លង់ក្លែងក្លាយ ក៏មើលមិនដឹងថា ដូច្នេះហើយមានតែពឹងអ្នកជំនាញទើបអាចដឹងថាប្លង់នោះពិត ឬក្លែងក្លាយ ជៀសវាងការទិញហើយមិនអាចផ្ទេរឈ្មោះបាន ឬលក់បន្តមិនបាន» ។
លោកបន្ថែមឱ្យដឹងថា ចំណុចសំខាន់គឺដំណាក់កាលនៃការធ្វើកិច្ចសន្យា ឬគេនិយមហៅថា កុងត្រា ។ ចំណុចនេះ មិនអាចធ្វើកិច្ចសន្យាតែពីរនាក់ស្ងាត់ៗរវាងអ្នកទិញ និងអ្នកលក់ដោយមិនមានមេធាវី ឬសាក្សីដឹងលឺនោះទេ ។
លោកបញ្ជាក់ថា ៖
«អ្នកទិញគួរតែចំណាយប្រាក់ដើម្បីជួលមេធាវីក្នុងការធ្វើកិច្ចសន្យាទិញលក់នោះឱ្យបានត្រឹមត្រូវ ហើយការទូទាត់ប្រាក់វិញ ក៏គួរតែទូទាត់តាមប្រព័ន្ធធនាគារ ព្រោះជាធម្យោបាយដែលមានសុវត្ថិភាពនៅពេលមានបញ្ហានៅណាមួយកើតឡោះង។ បើសិនជាថ្ងៃក្រោយមានការតវ៉ាពីម្ចាស់ដើមអចលនទ្រព្យ អ្នកទិញអាចមានភស្តុតាងជាក់លាក់ មានកិច្ចសន្យាដែលមានការទទួលស្គាល់ពីមេធាវីស្របច្បាប់ មានប្រតិបត្តិការទឹកប្រាក់ដែលបានទូទាត់គ្នាស្រាប់ និងបង្ហាញពីភាពត្រឹមត្រូវ»។
យ៉ាងណាក្ដី លោកថា បច្ចុប្បន្ននេះ មានវិធីសាស្ត្រមួយទៀត ដែលក្រសួងរៀបចំដែនដី នគរូបនីយកម្ម និងសំណង់ បានដាក់ឱ្យដំណើរការគឺសេវាសាធារណៈអនឡាញ ឬសេវាគាប់ចិត្ត ។ សេវានេះ នឹងជួយប្រជាពលរដ្ឋ វិនិយោគិន និងធុរជននានា អាចឆែកមើលប្រវត្តិដីធ្លី ផ្ទះសម្បែង ឬអចលនវត្ថុផ្សេងៗទៀតបានដោយងាយស្រួល និងអាចធ្វើបានគ្រប់ពេលវេលា ។
កាលពីប៉ុន្មានខែមុន សេវានេះ ត្រូវបានដាក់ឱ្យប្រើប្រាស់តែក្នុងបណ្ដារាជធានី/ខេត្តមួយចំនួនប៉ុណ្ណោះ ប៉ុន្តែបច្ចុប្បន្ននេះ ក្រសួងរៀបចំដែនដី នគរូបនីយកម្មនិងសំណង់ បានដាក់ឱ្យប្រើប្រាស់ស្ទើរគ្រប់ខេត្ត/ ក្រុង ទូទាំងប្រទេស ដែលជាការសម្រួលដល់ប្រជាពលរដ្ឋ វិនិយោគិន និងធុរជនក្នុងការពិនិត្យមើលឯកសារពាក់ព័ន្ធនឹងអចលនទ្រព្យនោះ ៕
Account
Security
Favourite Content