សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ប្រជាពលរដ្ឋតែងតែធ្វើការបោសម្អាត និងរៀបចំតុបតែងលម្អផ្ទះ ក៏ដូចជាបណ្តាស្ថាប័នរដ្ឋ និងឯកជននានា ដើម្បីត្រៀមទទួលទេវតាឆ្នាំថ្មី ក៏ដូចជាទទួលយកនូវសិរីសួរស្ដី ដែលជាឱកាសមួយទាមទារឱ្យម្ចាស់អាជីវកម្មលក់គ្រឿងតែងលម្អត្រៀមខ្លួនក្នុងការលក់ និងផ្គត់ផ្គង់គ្រឿងសម្ភារនានាឱ្យបានរួចរាល់។
លោក ឡេង លាភផេង ជាម្ចាស់អាជីវកម្មលក់មួកស្លឹកត្នោត និងសម្ភារៈសម្រាប់តុបតែងលម្អបែបខ្មែរ ដែលបានផ្ទុះការគាំទ្រខ្លាំងទៅលើមួកស្លឹកត្នោតខ្មែរកាលពីឆ្នាំមុននោះ បានប្រាប់ AMS Economy ឱ្យដឹងថា ខាងលោក និងក្រុមការងារកំពុងញាប់ដៃញាប់ជើងក្នុងការប្រមូលទិញសម្ភារតែងលម្អមកស្តុកទុកដើម្បីលក់ ក៏ដូចជាបានសិក្សា និងកែលម្អកំហុសមួយចំនួនដែលធ្លាប់មានកាលពីឆ្នាំមុន ធ្វើយ៉ាងណាបំពេញតម្រូវការភ្ញៀវឱ្យបានល្អបំផុត។
លោកបញ្ជាក់ថា៖
«យើងបានត្រៀមខ្លួនរួចជាស្រេចសម្រាប់ឆ្នាំនេះ ជាពិសេសសម្រាប់មួកស្លឹកត្នោតដែលពេញនិយមជាងគេ ដោយយើងជ្រើសយកមួកណាដែលស្អាតៗ ចៀសវាងទាស់ចិត្តភ្ញៀវ ហើយយើងក៏ផ្លាស់ប្ដូរការវេចខ្ចប់ដោយដាក់ជាកេសវិញ ដើម្បីធានានូវគុណភាព ក៏ដូចជារូបរាងរបស់គ្រឿងតែងលម្អ ធ្វើយ៉ាងណាអាចរក្សាសោភ័ណភាពស្រស់ស្អាតពេលទៅដល់ដៃភ្ញៀវ»។
លោកបន្ថែមថា ៖
«ក្រៅពីមួកស្លឹកត្នោត អាជីវកម្ម «មួកស្លឹកត្នោតខ្មែរ» ក៏មានលក់សម្ភារៈតុបតែងលម្អបែបខ្មែរផ្សេងៗទៀត ដូចជា កញ្ចើ ល្អី ឈ្នាង អង្រុត ក្អម ស្បូវ គោមផ្កាយ ទ្រូ សង្រែក បំពង់ទឹកត្នោត ស្លាកសួស្ដីឆ្នាំថ្មី និងប្រភេទខ្សែទង់ចំរុះពណ៌ ហើយយើងក៏ព្យាយមរិះរកនូវសម្ភារតុបតែងបែបខ្មែរបន្ថែមទៀត ធ្វើយ៉ាងណាបំផុសបំផុលឱ្យប្រជាជនយើងទិញយកទៅតុបតែងឱ្យបានកាន់តែច្រើនថែមទៀត»។
ដោយឡែកឆ្នាំនេះ លោក លាភផេង បានសង្កេតថា នាប៉ុន្មានឆ្នាំចុងក្រោយនេះ ហាក់មានការនិយមគាំទ្រ និងទិញប្រភេទមួកស្លឹកត្នោតដែលមានរចនាជាទង់ជាតិខ្មែរនៅខាងលើ ហើយលោកក៏មានក្ដីរំពឹងទុកដែរថា នឹងមានការគាំទ្រខ្លាំងជាងឆ្នាំមុនទៅទៀត ជាពិសេសទាក់ទងនឹងគ្រឿងសម្ភារបែបខ្មែរទាំងនៅទីក្រុង និងតាមបណ្ដាខេត្ត។
គួរបញ្ជាក់ថា អាជីវកម្មលក់សម្ភារៈតាំងលម្អបែបខ្មែរ «មួកស្លឹកត្នោតខ្មែរ» បានចាប់ផ្ដើមបង្កើត និងដំណើរការនៅឆ្នាំ២០២៣ ដោយផ្ដោតលើគ្រឿងដេគ័របែបខ្មែរ ជាពិសេសគឺសម្រាប់រៀបចំសង្ក្រាន្ត ព្រោះលោកមានចំណូលចិត្តការតុបតែងបែបខ្មែរ ហើយអតិថិជនក៏អាចរកទិញសម្ភារៈតាំងលម្អបានច្រើនមុខ ច្រើនប្រភេទតាមរយៈបណ្តាញសង្គម (page មួកស្លឹកត្នោតខ្មែរ) របស់លោកផ្ទាល់ ដោយមិនចាំបាច់ដើររកច្រើនកន្លែង និងចំណាយពេលយូរ៕
Account
Security
Favourite Content