សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតត្រឹមឆ្នាំ២០២៤នេះ អាចនិយាយបានថា វិស័យអចលនទ្រព្យនៅកម្ពុជាមានរយៈពេល៤ឆ្នាំហើយ ដែលរងផលប៉ះទង្គិចពីវិបត្តិកូវីដ១៩ ពោលគឺតាំងពីក្នុងអំឡុងឆ្នាំ ២០២០ មកម្ល៉េះ ហើយរហូតមកដល់ឆ្នាំ ២០២៤នេះ វិស័យអចលនទ្រព្យនៅកម្ពុជាក៏នៅតែមិនទាន់អាចវិលត្រលប់ទៅរកស្ថានភាពដូចមុនកូវីដ១៩នៅឡើយ ខណៈដែលអ្នកជំនាញនិងអ្នកវិនិយោគមួយចំនួនបានបង្ហាញទស្សនថា វិស័យនេះនឹងពិបាក ឬមិនអាចនឹងវិលទៅរកស្ថានភាពដូចមុនកូវីដ១៩តែម្ដង ។
លោក ប៉ូ អ៊ាវគង់ អគ្គនាយកក្រុមហ៊ុន អចលនទ្រព្យ Advance បានមានប្រសាសន៍ថា ទោះបីវិស័យអចលនទ្រព្យនាពេលបច្ចុប្បនេះ បានរើបឡើងវិញបន្តិចក៏ពិតមែន ប៉ុន្តែបើប្រៀបធៀបនឹងស្ថានភាពដូចមុនវិបត្តិកូវីដ១៩ វិស័យនេះនឹងពិបាកវិលទៅរកស្ថានភាពដូចពេលនោះណាស់ ។
លោកបញ្ជាក់ថា ៖
«នៅមុនវិបត្តិកូវីដ១៩ អ្នកវិនិយោគលើវិស័យអចលនទ្រព្យមិនថាអ្នកនៅក្នុងប្រទេស ឬមកពីខាងក្រៅប្រទេសនោះទេ បាននាំគ្នាបណ្ដាក់ទុនវិនិយោគលើអចលនទ្រព្យយ៉ាងសន្ធឹកសន្ធាប់ ដោយកាលនោះ ពួកគេបាននាំគ្នាអភិវឌ្ឍតាមតំបន់នានាជាច្រើនក្នុងប្រទេសកម្ពុជា ទើបធ្វើឱ្យការផ្គត់ផ្គង់លើអចលនទ្រព្យលើសតម្រូវការ លុះដល់ពេលមានបញ្ហាក៏បានធ្វើឱ្យវិស័យត្រូវជួបប្រទះស្ថានភាពធ្ងន់ធ្ងរ ដូច្នេះហើយមិនថាក្នុងរយៈពេល១ឆ្នាំ ២ឆ្នាំ ឬហូតដល់ឆ្នាំ២០២៨ ក៏វិស័យនេះទំនងជាមិនអាចនឹងវិលទៅរកស្ថានភាពដូចនឹងស្ថានភាពមុនកូវីដ១៩ នោះឡើយ»។
លោកបន្ថែមថា វិនិយោគិនទាំងក្នុង និងក្រៅប្រទេស ចាប់ពីពេលនេះតទៅ ត្រូវចេះរៀនទទួលយកនូវអ្វីដែលថ្មី និងត្រូវទទួលស្គាល់នូវបទពិសោធន៍ ដែលធ្លាប់ឆ្លងកាត់នាពេលកន្លងមក មិនថាក្នុងវិបត្តិកូវីដ១៩ និងក្រោយវិបត្តិកូវីដ១៩ ។
ប្រតិបត្តិកររបនេះបានបន្តទៀតថា មុនវិបត្តិកូវីដ១៩ ក្នុងឆ្នាំ២០១៧ ឆ្នាំ២០១៨ និងឆ្នាំ ២០១៩ ការវិនិយោគលើអចលនទ្រព្យមានសន្ទុះខ្លាំងពេក ហើយកាលនោះ វិនិយោគិនចូលមកកម្ពុជាម្នាក់ៗរកតែអគារជួល ផ្ទះជួល ខណៈដែលគ្រានោះការផ្គត់ផ្គង់មិនសូវមាន ក៏ធ្វើឱ្យអ្នកវិនិយោគក្នុងស្រុកនាំគ្នាសម្រុកសាងសង់ដើម្បីផ្គត់ផ្គង់ ហើយនៅពេលសំណង់អគារសម្រាប់ផ្គត់ផ្គង់មិនទាន់សង់រួចរាល់ស្រួលផង ស្រាប់តែអតិថិជនដែលជាអ្នកមានតម្រូវការបានវិលត្រលប់ទៅវិញបណ្ដើរៗ ជាពិសេសនៅពេលមានការបិទល្បែងអនឡាញ និង នៅក្នុងអំឡុងវិបត្តិកូវីដ១៩តែម្ដង។
ដោយឡែក លោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានលើកឡើងកាលពីពេលថ្មីៗនេះថា វិស័យអចលនទ្រព្យ អាចនឹងវិលទៅរកស្ថានភាពប្រហាក់ប្រហែលនឹងស្ថានភាពមុនវិបត្តិកូវីដ១៩វិញ ក្នុងរយៈពេល ៤ ទៅ ៥ឆ្នាំខាងមុខទៀត ពោលគឺអាចនឹងនៅក្នុងឆ្នាំ២០២៨ ឬឆ្នាំ២០២៩ ។ លោកបន្តថា សម្រាប់ទីផ្សារអចលនទ្រព្យនាពេលបច្ចុប្បន្ននេះ មានសកម្មភាពភាគច្រើនតែលើការសាងសង់សំណង់លំនៅដ្ឋានលក្ខណៈដាច់ដោយឡែកតែប៉ុណ្ណោះ បើចំពោះលក្ខណៈជាបណ្តុំលំនៅដ្ឋាន ឬជាបុរី គឺមានភាពស្ងប់ស្ងាត់។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ កាលពីពេលកន្លងទៅធ្លាប់បានថ្លែងថា អ្នកអភិវឌ្ឍន៍អចលនទ្រព្យមួយចំនួន ជាពិសេសលើវិស័យលំនៅឋានបាននាំគ្នាសម្រុកអភិវឌ្ឍន៍ និងសាងសង់ ដោយមិនបានសិក្សា ឬមើលព័ត៌មានសេដ្ឋកិច្ចជាមុនសិន ថាតើសេដ្ឋកិច្ចពិភពលោកនឹងទៅជាយ៉ាងណា ហើយវាប៉ះពាល់ដល់វិស័យណាខ្លះនៅក្នុងប្រទេសកម្ពុជា ។ នៅពេលណាអ្នកវិនិយោគ បាននាំគ្នាអភិវឌ្ឍ វាក៏ធ្វើឱ្យការផ្គត់ផ្គង់មានច្រើនជាងតម្រូវការ ដែលធ្វើឱ្យសំណង់នៅសល់ច្រើន ៕
Account
Security
Favourite Content