ភ្នំពេញ ៖ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា ភាពចាំបាច់នៃការចាប់យកស្តង់ដារ និងគុណភាព ដើម្បីពង្រីកលទ្ធភាពចូលទៅកាន់ទីផ្សារគឺជាប្រការដ៏សំខាន់បំផុត ជាពិសេសអាចឈានទៅរកការប្រកួតប្រជែង។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានមានប្រសាសន៍កាលពីពេលថ្មីៗនេះថា ជានិន្នាការសាកល គឺតម្រូវឱ្យស្ថាប័នទាំងក្នុងវិស័យសាធារណៈ និងឯកជន សម្របខ្លួនដើម្បីបង្កើនភាពប្រកួតប្រជែង និងភាពធន់របស់ខ្លួន ដែលប្រាកដថាបន្តនវានុវត្តជាប់ជានិច្ច ព្រោះការធ្វើអាជីវកម្មដូចកាលពីអតីកាលមិនមែនជាជម្រើសទៀតនោះទេ។

បន្ថែមពីនេះ ឯកឧត្តមក៏បានរំលេចអំពីកំណែទម្រង់ដែលក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលកំពុងអនុវត្ត រួមទាំងការប្រែក្លាយមន្ទីរពិសោធន៍ជាតិវិទ្យាសាស្ត្រ បច្ចេកវិទ្យា និងនវានុវត្តន៍ ទៅជាគ្រឹះស្ថានសាធារណៈរដ្ឋបាល ក្នុងគោលដៅបម្រើវិស័យឯកជនឱ្យបានកាន់តែប្រសើរ។

ឯកឧត្តមរដ្ឋមន្ត្រីបានថា ៖

«បើអ្នកចង់រស់រាន និងរីកចម្រើនទាំងនៅក្នុងទីផ្សារជាតិ ទាំងក្នុងតំបន់ និងពិភពលោក អ្នកត្រូវឈានចូលក្នុងប្រព័ន្ធ និងរៀបចំអាជីវកម្មរបស់អ្នកឱ្យមានលក្ខណៈផ្លូវការ មានស្ដង់ដារជាដាច់ខាត»។

គួររំលឹកដែរថា ប្រមុខរាជរដ្ឋាភិបាលកម្ពុជា ដែលមានសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី បានសម្រេចប្រែក្លាយមន្ទីរពិសោធន៍ជាតិវិទ្យាសាស្ត្រ បច្ចេកវិទ្យា និងនវានុវត្តន៍ ទៅជាគ្រឹះស្ថានសាធារណៈរដ្ឋបាល តាមរយៈអនុក្រឹត្យ លេខ ១៤១ អនក្រ.បក ចុះថ្ងៃទី២០ ខែមិថុនា ឆ្នាំ២០២៤។ គ្រឹះស្ថាន​សាធារណៈរដ្ឋបាល ដែលមានឈ្មោះថា «មន្ទីរពិសោធន៍​ជាតិវិទ្យាសាស្រ្ត បច្ចេកវិទ្យា និងនវានុវត្តន៍ (STINL) នេះ ស្ថិតក្រោម​ចំណុះក្រសួង​ឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងក្រសួងសេដ្ឋកិច្ច និងហិរញ្ញវត្ថុ។

មន្ទីរពិសោធន៍ជាតិនេះ ​ជានីតិបុគ្គល​នៃនីតិសាធារណៈ និងមានថវិកា​ស្វយ័ត​ដែលត្រូវឆ្លុះ​បញ្ចាំង​ជាឧបសម្ព័ន្ធ​នៃថវិកា​របស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍។ ទីតាំងគឺ​ស្ថិតនៅអគារ​លេខ ១១៥៧ ផ្លូវជាតិលេខ២ សង្កាត់ចាក់អង្រែលើ ខណ្ឌមានជ័យ។ ភារកិច្ចរបស់មន្ទីរពិសោធន៍ជាតិ​ រួមមានដូចជា ធ្វើតេស្ត ឬវិភាគ ផ្នែករូប គីមីសាស្រ្ត មីក្រូជីវសាស្រ្ត មេកានិក អគ្គិសនី អេឡិចត្រូនិក ដើម្បីកំណត់​គុណភាព និងលក្ខណៈវិនិច្ឆ័យរបស់ផលិតផល តាមការស្នើសុំ និងភាពចាំបាច់ និងបម្រើ​ឱ្យការអភិវឌ្ឍវិទ្យាសាស្រ្ត បច្ចេកវិទ្យា និងនវានុវត្តន៍ ៕