សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ចំនួនរោងចក្រ សហគ្រាសនៅទូទាំងប្រទេសកម្ពុជា គិតត្រឹមពាក់កណ្ដាលឆ្នាំ២០២៤នេះ បានកើនឡើងដល់ជាង៤ម៉ឺន ក្នុងនោះក៏មានរោងចក្រ សហគ្រាសប្រមាណជាង៣ពាន់បានបើកថ្មីនៅក្នុងឆ្នាំ២០២៤នេះ ។ ការកើនឡើងនៃចំនួនរោងចក្រ សហគ្រាស ក្នុងវិស័យឧស្សាហកម្មទាំងនេះបានធ្វើឱ្យមានចលនាទិញ-លក់ ដីធ្លីដែលស្ថិតក្នុងតំបន់នៃគម្រោង ជាមួយនឹងការជំរុញកំណើនតម្លៃផងដែរ។
អ្នកជំនាញនៃវិស័យអចលនទ្រព្យបានមើលឃើញថា ស្របពេលទីផ្សារអចលនទ្រព្យផ្នែកផ្សេងទៀតដូចជាលំនៅឋាន ខុនដូ អាផាតមិន បានថមថយ តែសកម្មភាពនៃការវិនិយោគលើឧស្សាហកម្មរោងចក្រសហគ្រាសនៅតែបន្តដំណើរឆ្ពោះទៅមុខ ដោយមានការវិនិយោគថ្មីៗជាបន្តបន្ទាប់ ។ ការវិនិយោគលើឧស្សាហកម្មរោងចក្រ សហគ្រាសនេះធ្វើឱ្យតម្រូវការទិញលក់ដីធ្លីនៅតំបន់ដែលមានគម្រោងបង្កើតរោងចក្រទាំងនោះក៏មានខ្ពស់ ដូច្នេះធ្វើឱ្យវិស័យដីធ្លីមាននៅតំបន់ដែលពាក់ព័ន្ធអាចរក្សាបានចរន្តទីផ្សារ។
លោក ឌិត ចណ្ណា អគ្គនាយកក្រុមហ៊ុនអចលនទ្រព្យ Lucky Realty បានលើកឡើងថា ការវិនិយោគលើរោងចក្រ សហគ្រាសនានា បានធ្វើឱ្យមានតម្រូវការប្រើប្រាស់ដីធ្លី ដែលមិនត្រឹមតែដីសម្រាប់សង់រោងចក្រនោះទេ តែក៏មានដីសម្រាប់សង់ឃ្លាំងស្តុកទំនិញ តម្រូវការដីសម្រាប់សាងសង់ផ្ទះរបស់កម្មករដែលនៅជិតរោងចក្រនោះជាដើម ។
បើតាមការកត់សម្គាល់ តំបន់ដែលមិនសូវមានការចាប់អារម្មណ៍លើការទិញលក់ដីធ្លី ប៉ុន្តែនៅពេលមានរោងចក្រ សហគ្រាសចូលទៅដល់គឺធ្វើឱ្យតម្លៃដីធ្លី និងតម្រូវការដីនៅក្បែរនោះក៏មានហាងឆេងមួយរំពេច។ ជាក់ស្ដែងតំបន់មួយចំនួនក្នុងខេត្តកំពង់ស្ពឺ ដែលពីមុនជាដីកសិកម្ម និងរកចំណូលពីដីនោះបានតិចតួច តែពេលមានរោងចក្រ សហគ្រាសចូលទៅធ្វើឱ្យដីនោះក្លាយជាដីដែលមានតម្លៃអាចលក់ ឬជួល កែប្រែពីដីកសិកម្ម ក្លាយជាតំបន់ឧស្សាហកម្មអ៊ូអរ ។
បើតាមប្រសាសន៍មន្ត្រីជាន់ខ្ពស់ក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា ការវិនិយោគលើរោងចក្រ សហគ្រាសនេះដែរ បានផ្ដល់នូវឱកាសការដល់ប្រជាពលរដ្ឋរាប់លាននាក់ ទាំងផ្ទាល់ និងប្រយោល ជាក់ស្ដែង គិតត្រឹមឆមាសទី១ ឆ្នាំ២០២៤នេះ កម្មករ និយោជិតកំពុងបម្រើការងារនៅក្នុងរោងចក្រវិស័យវាយនភណ្ឌកាត់ដេរ ផលិតស្បែកជើង និងផលិតផលធ្វើដំណើរការ និងកាបូប មានចំនួនប្រមាណជាង៩១ម៉ឺននាក់ និងទទួលបានប្រាក់ចំណូលប្រមាណ ៣ពាន់លានដុល្លារអាមេរិក ។ ចំណែករោងចក្រឧស្សាហកម្ម មិនមែនកាត់ដេរក៏បានផ្ដល់ឱកាសការងារប្រមាណជិត ៩០ម៉ឺននាក់ផងដែរ ដោយផ្ដល់ជាចំណូលប្រចាំឆ្នាំប្រមាណ ២,៦ពាន់លានដុល្លារអាមេរិក ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ក៏បានបង្ហាញផងដែរថា ការវិនិយោគថ្មីៗ និងការពង្រីកផលិតកម្មគម្រោងវិនិយោគ ភាគច្រើនផ្ដោតទៅលើគម្រោងវិនិយោគរោងចក្រឧស្សាហកម្ម ទាំងរោងចក្រកាត់ដេរសម្លៀកបំពាក់ និងស្បែកជើង និងរោងចក្រឧស្សាហកម្ម មិនមែនកាត់ដេរ ក្នុងនោះរាជធានីភ្នំពេញ ខេត្តស្វាយរៀង ខេត្តកំពង់ស្ពឺ ខេត្តព្រះសីហនុ កណ្ដាល និងខេត្តតាកែវ ទទួលបានគម្រោងវិនិយោគលើឧស្សាហកម្មច្រើនជាងគេ ៕
Account
Security
Favourite Content