ភ្នំពេញ៖ ឯកឧត្តម ងិន ឆាយ ប្រតិភូររាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានកសិកម្ម បានបញ្ជាក់ឱ្យដឹងថា ការខូចខាតដំណាំស្រូវ​ដោយសារសត្វល្អិតចង្រៃអាចគ្រប់គ្រងបាន ដោយក្នុងនោះ ការបំផ្លាញដំណាំស្រូវរបស់កសិករដោយសត្វល្អិតចង្រៃ ដូចជា​ ​ដង្កូវ​ហ្វូង​ ​បាន​បំផ្លាញ​ស្រូវ​នៅតាមបណ្តា​ខេត្ត​ចំនួន១៨ និងមានទំហំប្រមាណ​ជាង​២​ម៉ឺន​ហិកតា ហើយសត្វរុយស ដង្កូវមូរដើម មានចំនួន ៥ខេត្ត ដែលផលប៉ះពាល់ដំណាំស្រូវជាង៥ម៉ឺនហិកតា ប៉ុន្តែការខូចខាតមានទំហំតូចនៅឡើយ ។

ឯកឧត្តម ងិ​ន​ ​ឆាយ​ ​ ​បាន​បញ្ជាក់​ថា​ ការ​រាតត្បាត​របស់​ពពួក​សត្វ​ចង្រៃ​ទាំងនោះ​ស្ថិតក្នុងដំណាក់កាលអាច​គ្រប់គ្រង​បាន​ ​មិនទាន់​ធ្លាក់​ក្នុង​សភាព​ធ្ងន់ធ្ងរ​គួរ​ឱ្យ​ព្រួយបារម្ភ​ទេ​។​  ​សម្រាប់​សត្វល្អិត​ចង្រៃ​រុយ​ស​វិញ​បាន​ផ្ទុះ​កើតឡើង​ប្រមាណ​៣​ស​ប្តាហ៍​មុននេះ​ ​ហើយ​មកដល់ពេលនេះ​មាន​​ខេត្ត​ចំនួន៥ ដែលរងផលប៉ះពាល់ ក្នុង​នេះ​ដូចជា​ខេត្ត​ ​តាកែវ​ ​ព្រៃវែង​ ​ស្វាយរៀង​ ​ខេត្ត​ត្បូងឃ្មុំ​ ​និង​​ខេត្ត​កណ្តាល​ ​ដែល​មាន​ចំនួន​តិចតួច​​។​

​ឯកឧត្តម ​ ងិ​ន​ ​ឆាយ​ ​បានបញ្ជាក់បន្ថែម​ថា៖

«​ ​ក្នុងរយៈពេល​៣​ស​ប្តាហ៍​មកនេះ​ ​ក្រោយ​ការ​វាយលុក​របស់​សត្វ​រុយ​ស​បំផ្លាញ​ស្រូវ​កសិករ​កន្លងមក​ឃើញ​ថា​ ​សភាពការណ៍​បាន​ធូរស្រាល​ ​ហើយក៏​ស្ថិតនៅ​ក្នុង​ស្ថានភាព​មួយ​យើង​អាច​គ្រប់​គ្រង​បាន។ ​យើង​ដឹង​ហើយ​ថា​រុយ​ស​ ​វា​នឹង​បំផ្លាញ​ស្រូវ​គ្រប់​ដំណាក់កាល​។​ ​បើ​រុយ​ស​វា​បំផ្លាញ​ស្រូវ​ដំណាក់កាល​ផើម​ ​ឬ​វា​បំផ្លាញ​ស្រូវ​ដំណាក់កាល​ចេញ​កួរ​វា​នឹង​ធ្វើ​ឱ្យ​ផល​ប៉ះពាល់​ខ្លាំង​ ។​ ផ្ទុយ​មកវិញ ​បើ​វា​បំផ្លាញ​ក្នុង​ដំណាក់កាល​បែកគុម្ព​ ​វិញ​វា​នឹង​មិន​បង្ក​ការ​ប៉ះពាល់​ធ្ងន់ធ្ងរ​ទេ​ដោយ​ស្រូវ​វា​អាច​លូតលាស់ឡើងវិញ​បាន​»។

ឯកឧត្តមប្រតិភូររាជរដ្ឋាភិបាល បានលើកឡើងថា ការបន្តចុះពិនិត្យនេះ ធ្វើឡើងក្នុងគោលបំណង ដើម្បីសិក្សាវាយតម្លៃលើការរាតត្បាត និងបំផ្លាញដំណាំស្រូវពីរុយស ដង្កូវមូរស្លឹក និងណែនាំដល់ប្រជាកសិករអំពីវិធានការទប់ស្កាត់ កម្ចាត់សមាសភាពចង្រៃទាំងនោះ និងនាំយកដ្រូនបាញ់ថ្នាំកសិកម្មកម្ចាត់រុយស និងដង្កូវមូរស្លឹកជូនប្រជាពលរដ្ឋដែលស្រូវដែលរងការបំផ្លាញពីពពួកសមាសភាពចង្រៃទាំងនោះ និងផ្ដល់បច្ចេកទេសប្រើប្រាស់ថ្នាំសម្លាប់សត្វល្អិតឱ្យត្រឹមត្រូវស្របតាមស្តង់ដាបច្ចេកទេស ដែលអាចកម្ចាត់សមាសភាពចង្រៃជូនប្រជាពលរដ្ឋប្រកបដោយប្រសិទ្ធភាព និងប្រសិទ្ធផលខ្ពស់។

ឯកឧត្តម បន្ថែមថា ប្រសិនបើប្រជាកសិករជួបប្រទះនឹងរុយស និងដង្កូវមូរស្លឹកកំពុងបំផ្លាញដំណាំស្រូវ ត្រូវរាយការណ៍ ឬទាក់ទងទៅអាជ្ញាធរមូលដ្ឋានដែលនៅជិតបំផុត ឬផ្តល់ព័ត៌មានទៅមន្ត្រីកសិកម្មនៅតាមឃុំ-ស្រុក-ខេត្ត ដើម្បីជួយផ្តល់ការណែនាំផ្នែកបច្ចេកទេស ឬវិធីសាស្ត្រនៃការជ្រើសរើសថ្នាំកសិកម្មសម្រាប់បាញ់កម្ចាត់រុយស និងដង្កូវមូរដើមនោះឱ្យទាន់ពេលវេលា៕