បរទេស៖ យោងតាមប្រភពពី Forbes បានលើកឡើងថា បច្ចុប្បន្ននេះ នៅជុំវិញពិភពលោកមានមហាសេដ្ឋី ឬ Billionaires ប្រមាណ ២ ៧៨១ នាក់ក្នុងចំណោមប្រជាជនសរុបជាង ៨ ពាន់លាននាក់។ ខាងក្រោមនេះគឺជាទីក្រុងកំពូលទាំង ១០ ដែលមានមហាសេដ្ឋីច្រើនជាងគេនៅលើពិភពលោក។

១. ទីក្រុងញូវយ៉ក, សហរដ្ឋអាម៉េរិក៖មហាសេដ្ឋី ១១០ នាក់, ទ្រព្យសម្បត្តិសរុប ៦៩៤ ពាន់លានដុល្លារ

ទីក្រុង​ញូវយ៉ក គឺជាទីក្រុង​ដែល​មាន​មហាសេដ្ឋី​ច្រើន​ជាង​គេ​នៅ​លើ​ពិភពលោក ដោយបានស្វាគមន៍អ្នកចំណូលថ្មីដែលជាមហាសេដ្ឋីចំនួន ៩ នាក់ នាំឱ្យចំនួនសរុបមហាសេដ្ឋីកើនដល់ ១១០ នាក់។ Michael Bloomberg គឺជាមហាសេដ្ឋីដែលមានទ្រព្យសម្បត្តិច្រើនជាងគេ ១០៦ ពាន់លានដុល្លារនៅក្នុងទីក្រុងញូវយ៉ក។

២.​ ទីក្រុងម៉ូស្គូ, ប្រទេសរុស្ស៊ី៖ មានមហាសេដ្ឋី ៧៤ នាក់, ទ្រព្យសម្បត្តិសរុប ៣៧៨ ពាន់លានដុល្លារ

ទីក្រុងមូស្គូ និងហុងកុងមានមហាសេដ្ឋី ៧៤ នាក់ដូចគ្នា។ កាលពីឆ្នាំមុន មហសេដ្ឋីនៅទីក្រុងមូស្គូបានកើនឡើងបន្ថែម ១២ នាក់​ ដែលជំរុញឲ្យចំនួនសរុបកើនដល់​ ៧៤ នាក់។ Vagit Alekperov គឺជាមហាសេដ្ឋីដែលមានទ្រព្យសម្បត្តិច្រើនជាងគេ ២៨,៦ ពាន់លានដុល្លារនៅក្នុងទីក្រុងមូស្គូ និងជាអ្នកមានទី ៣ នៅទូទាំងរុស្ស៊ី។

៣. ទីក្រុងហុងកុង, តំបន់រដ្ឋបាលពិសេសរបស់ចិន៖ មហាសេដ្ឋី ៧៤ នាក់,​ ទ្រព្យសម្បត្តិសរុប ៣២៦ ពាន់លានដុល្លារ

ទាំង​ទីក្រុង​ហុងកុង​ និង​ទីក្រុង​មូស្គូមានចំនួន​មហាសេដ្ឋី​ដូច​គ្នា ៧៤ នាក់។ Li Kasing គឺជាមហាសេដ្ឋីដែលមានទ្រព្យសម្បត្តិច្រើនជាងគេ ៣៧,៣ ពាន់លានដុល្លារនៅក្នុងទីក្រុងហុងកុង។

៤. ទីក្រុងបុមបៃ, ប្រទេសឥណ្ឌា៖មានមហាសេដ្ឋី ៦៩នាក់, ទ្រព្យសម្បត្តិសរុប ៣៧៩ ពាន់លានដុល្លារ

ទីក្រុងបុមបៃ គឺជាទីក្រុងជឿនលឿនរបស់ឥណ្ឌា និងមានមហាសេដ្ឋីចំនួន ៦៩ ដែលមានទ្រព្យសម្បត្តិសរុបលើសពី ៣៧០ ពាន់លានដុល្លារ។  Mukesh Ambani គឺជាមហាសេដ្ឋីដែលមានទ្រព្យសម្បត្តិច្រើនជាងគេ ១១៦ ពាន់លានដុល្លារនៅក្នុងទីក្រុងបុមបៃ។

៥. ទីក្រុងប៉េកាំង, ប្រទេសចិន៖មហាសេដ្ឋី ៦៣ នាក់,​ ទ្រព្យសម្បត្តិសរុប ២១១ ពាន់លានដុល្លារ

ចាប់តាំងពីឆ្នាំ ២០២១​ មក ទីក្រុងប៉េកាំងបានបាត់បង់មហាសេដ្ឋីចំនួន ៣២ នាក់ ខណៈដែលទ្រព្យសម្បត្តិសុទ្ធរបស់ពួកគេបានធ្លាក់ចុះ ១៤ ភាគរយ ដោយសារសេដ្ឋកិច្ចរបស់ប្រទេសជួបការលំបាក។ Zhang Yiming គឺជាមហាសេដ្ឋីដែលមានទ្រព្យសម្បត្តិច្រើនជាងគេ ៤៣,៤ ពាន់លានដុល្លារនៅក្នុងទីក្រុងប៉េកាំង។ ទោះបីជាមានបញ្ហាសេដ្ឋកិច្ចក៏ដោយ ប៉ុន្តែទីក្រុងប៉េកាំងបានទទួលមហាសេដ្ឋីចំណូលថ្មីពីរនាក់រួមមាន Dai Wenyuan (១,៦ ពាន់លានដុល្លារ) ស្ថាបនិកនិងជានាយកប្រតិបត្តិនៃក្រុមហ៊ុនកម្មវិធី AI 4Paradigm និង Zheng Fan (១,៥ ពាន់លានដុល្លារ) នាយកក្រុមហ៊ុនផលិតរថយន្តអគ្គិសនី Li Auto។

៦. ទីក្រុងឡុងដ៍, ចក្រភពអង់គ្លេស៖ មានមហាសេដ្ឋី ៦២ នាក់, ទ្រព្យសម្បត្តិសរុប ៣២៦ ពាន់លានដុល្លារ

កាលពីឆ្នាំ ២០២២ ទីក្រុងឡុងដ៍បានជាប់ចំណាត់ថ្នាក់លេខ ៤ ប៉ុន្តែបានធ្លាក់មកចំណាត់ថ្នាក់លេខ ៦។ ទីក្រុងឡុងដ៍មានភាពល្បីល្បាញដោយសាររាជវង្សានុវង្ស និងប៉មអេលីហ្សាបែតដ៏ប្រណិត ប៉ុន្តែទីក្រុងនេះក៏ជាផ្ទះរបស់មហាសេដ្ឋីមួយចំនួននៅលើពិភពលោកផងដែរ។ Len Blavatnik គឺជាមហាសេដ្ឋីដែលមានទ្រព្យសម្បត្តិច្រើនជាងគេ ៣២,១ ពាន់លានដុល្លារនៅក្នុងទីក្រុងឡុងដ៍។

៧. ទីក្រុងសៀងហៃ, ប្រទេសចិន៖ មហាសេដ្ឋីសរុប ៥៤ នាក់, ទ្រព្យសម្បត្តិសរុប ១៦៧ ពាន់លានដុល្លារ

នៅឆ្នាំនេះ ទីក្រុងសៀងហៃបានបាត់បង់មហាសេដ្ឋីច្រើនជាងគេក្នុងចំណោមទីក្រុងមានមហាសេដ្ឋីកំពូលទាំងដប់ ដោយបានធ្លាក់ចុះពី ៦៥ នាក់មកត្រឹម ៥៤ នាក់។ Colin Huang គឺជាស្ថាបនិកនៃក្រុមហ៊ុនអេឡិចត្រូនិកយក្ស PPD Holdings និងជាមហាសេដ្ឋីដែលមានទ្រព្យសម្បត្តិច្រើនជាងគេ ៣៨,៩ ពាន់លានដុល្លារនៅក្នុងទីក្រុងសៀងហៃ។

៨. ទីក្រុង Los Angeles, សហរដ្ឋអាម៉េរិក៖ មានមហាសេដ្ឋីសរុប ៥៣ នាក់, ទ្រព្យសម្បត្តិសរុប ២២២ ពាន់លានដុល្លារ

ទីក្រុង Los Angeles គឺជាទីក្រុងដែលថ្លៃបំផុតនៅក្នុងរដ្ឋកាលីហ្វរញ៉ា និងសំបូរទៅដោយបុគ្គលល្បីដូចជា LeBron James, Kim Kardashian, និងតារាចម្រៀង Rihanna។ John Tu គឺជាមហាសេដ្ឋីដែលមានទ្រព្យសម្បត្តិច្រើនជាងគេ ១៣,៦ ពាន់លានដុល្លារនៅក្នុងទីក្រុង Los Angeles។

៩.សិង្ហបុរី៖មានមហាសេដ្ឋីសរុប ៥២ នាក់, ទ្រព្យសម្បត្តិសរុប ១៥៦ ពាន់លានដុល្លារ

ក្រៅ​ពី​ក្លាយ​ជា​គោលដៅ​ទេសចរណ៍​ដ៏​ពេញ​និយម​បំផុត​មួយ សិង្ហបុរី​ក៏​បាន​ក្លាយ​ជា​មជ្ឈមណ្ឌល​ពិភពលោក​ដ៏​លេចធ្លោ​មួយ​សម្រាប់​បុគ្គល​មាន​ទ្រព្យសម្បត្តិ​ផង​ដែរ។ សិង្ហបុរី គឺជាប្រទេសអាស៊ីអាគ្នេយ៍តែមួយគត់ដែលជាប់ចំណាត់ថ្នាក់នៅក្នុងបញ្ជឺទីក្រុងកំពូលទាំង ១០ ដែលមានមហាសេដ្ឋីច្រើនជាងគេនៅលើពិភពលោក។ Eduardo Saverin គឺជាមហាសេដ្ឋីដែលមានទ្រព្យសម្បត្តិច្រើនជាងគេ ២៨ ពាន់លានដុល្លារនៅសិង្ហបុរី។

១០. ទីក្រុងសាន់ហ្វ្រាន់ស៊ីស្កូ, សហរដ្ឋអាម៉េរិក៖ មានមហាសេដ្ឋីសរុប ៥០ នាក់, ទ្រព្យសម្បត្តិសរុប ១៨៥ ពាន់លានដុល្លារ

ទីក្រុងសាន់ហ្វ្រាន់ស៊ីស្កូមានភាពល្បីល្បាញជាយូរមកហើយថាជាទីក្រុងដែលមានតម្លៃរស់នៅថ្លៃបំផុតមួយនៅក្នុងសហរដ្ឋអាម៉េរិករួមមាន តម្លៃលំនៅដ្ឋាន គ្រឿងឧបភោគបរិភោគ និងឧបករណ៍ប្រើប្រាស់។ Dustin Moskovitz គឺជាមហាសេដ្ឋីដែលមានទ្រព្យសម្បត្តិច្រើនជាងគេ ១៨,៣ ពាន់លានដុល្លារនៅទីក្រុងសាន់ហ្វ្រាន់ស៊ីស្កូ៕