សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប ៖ កាលពីពេលថ្មីៗនេះ ក្រុមហ៊ុនរបស់ចិនមួយបានបង្ហាញពីបំណងវិនិយោគលើការបង្កើតតំបន់សេដ្ឋកិច្ចពិសេសនៅក្បែរអាកាសយានដ្ឋានអន្តរជាតិសៀមរាបអង្គរ។ ការចាប់អារម្មណ៍ដាក់គម្រោងវិនិយោគនៅកម្ពុជារបស់ក្រុមហ៊ុនចិននេះ កើតឡើងក្រោយជំនួបរវាង ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ជាមួយនឹងតំណាងក្រុមហ៊ុន Angkor International Airport Investment (Cambodia ) Co.,Ltd និងតំណាងក្រុមហ៊ុន China Energy Engineering Group Yunnan Electric Power Institute។
ជាលទ្ធផល គម្រោងវិនិយោគតំបន់សេដ្ឋកិច្ចពិសេសនៅជិតអាកាសយានដ្ឋានអន្តរជាតិដ៏ថ្មីសន្លាងមួយនេះ គ្រោងនឹងផ្ដោតលើសកម្មភាពបឋមចំនួន៣ គឺ ទី១. ការវិនិយោគថាមពលកកើតឡើងវិញដើរដោយពន្លឺព្រះអាទិត្យ, ទី២ ការវិនិយោគក្នុងវិស័យទេសចរណ៍ និងទី៣ គឺការវិនិយោគក្នុងវិស័យកសិកម្ម។
លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានបង្ហាញការយល់ឃើញថា គម្រោងខាងលើនេះនឹងផ្ដល់ជាផលវិជ្ជមានច្រើនសម្រាប់ខេត្តសៀមរាបផ្ទាល់។
ផលវិជ្ជមានទាំងនោះក៏ដោយសារតែការទម្លាក់សាច់ប្រាក់ចូលក្នុងគម្រោងនេះនឹងធ្វើឱ្យចរន្តសេដ្ឋកិច្ចសង្គមមានសកម្មភាពមួយផ្នែកធំ ហើយក្រោយគម្រោងនេះបានដាក់ឱ្យដំណើរការ វិស័យពាក់ព័ន្ធធំៗទាំង៣ ក៏នឹងទទួលបានផលប្រយោជន៍ផងដែរ។
ទាក់ទិននឹងចំណុចនេះ លោកបណ្ឌិត ហុង វណ្ណៈ បានបញ្ជាក់ថា ៖
«វិស័យធំៗទាំង៣ស្ថិតនៅក្នុងគម្រោងនេះ គឺ វិស័យថាមពលកកើតឡើងវិញ វិស័យទេសចរណ៍ និងវិស័យកសិកម្ម នឹងអាចទទួលបានផលច្រើន ជាពិសេសនឹងបង្កើតការងារដល់ប្រជាពលរដ្ឋដែលកំពុងធ្វើការក្នុងវិស័យទាំង៣ផងដែរ។»
មិនត្រឹមតែប៉ុណ្ណោះ គម្រោងខាងលើនេះក៏អាច ជំរុញឱ្យវិស័យអចលនទ្រព្យនៅខេត្តសៀមរាបរើបឡើងវិញផងដែរ ជាពិសេសតំបន់ដែលនៅជិតនឹងគម្រោងវិនិយោគនេះតែម្ដង។នេះបើតាមការបញ្ជាក់បន្ថែមរបស់លោកបណ្ឌិត។
ទន្ទឹមជាមួយគ្នានេះ លោកក៏បានបង្ហាញការព្រួយបារម្ភចំពោះការថយចុះនៃការផ្គត់ផ្គង់អគ្គិសនីរបស់រដ្ឋនៅក្នុងព្រលានយន្ដហោះអន្តរជាតិសៀមរាប ក្រោយពេលដែលគម្រោងថាមពលកកើតឡើងវិញបានដំណើរការជាផ្លូវការ។
យ៉ាងណាក៏ដោយ លោកបណ្ឌិត ហុង វណ្ណៈ នៅតែមានក្ដីរំពឹងខ្ពស់ថា គម្រោងវិនិយោគទៅលើវិស័យពីរផ្សេងទៀតគឺ ទេសចរណ៍ និងកសិកម្ម នឹងនៅតែអាចហុចផលយ៉ាងគាប់ប្រសើរដល់ប្រជាពលរដ្ឋក្នុងខេត្តសៀមរាបផ្ទាល់ ព្រមទាំងអាចទាក់ទាញប្រជាពលរដ្ឋពីខេត្តផ្សេងឱ្យទៅរស់នៅ ក៏ដូចជាប្រកបរបរនៅទីនោះផងដែរ។
គួរបញ្ជាក់ថា ចាប់តាំងពីការបើកដំណើរការរហូតមកទល់ពេលនេះ អាកាសយានដ្ឋានសៀមរាបអង្គរ បានទទួលអ្នកដំណើរការប្រមាណជិត១លាននាក់ហើយ និងរំពឹងថារហូតដល់ខែតុលារនឹងមានអ្នកដំណើរប្រមាណជាង ១លាន ៣០ម៉ឺននាក់ ហើយអាចកើនដល់ ១លាន ៥០ម៉ឺននាក់នៅដំណាច់ឆ្នាំ២០២៤នេះ។
ក្នុងពេលកន្លងទៅ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក៏ធ្លាប់បានជំរុញឱ្យមានការវិនិយោគតំបន់សេដ្ឋកិច្ចពិសេសនៅក្បែរអាកាសយានដ្ឋានអន្តរជាតិសៀមរាបអង្គរក្នុងគោលបំណងគាំទ្រដល់អាជីវកម្មអាកាសយានដ្ឋានផង និងផ្ដល់ឱកាសការងារដល់ប្រជាពលរដ្ឋក្នុងតំបន់ថ្មី ក្រុងរុនតាឯកផងដែរ៕
Account
Security
Favourite Content