សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពព័ត៌មានពី BBC បានរាយការណ៍ថា សហរដ្ឋអាមេរិក ដែលជាប្រទេសមានសេដ្ឋកិច្ចធំបំផុតរបស់ពិភពលោកកំពុងបង្ហាញពីសញ្ញាធ្លាក់ចុះ ដោយសារទិន្នន័យនៃអត្រាគ្មានការងារធ្វើកាន់តែមានកំណើន ជាពិសេសសម្រាប់ខែកក្កដាគែមានលទ្ធផលអាក្រក់ជាងការរំពឹងទុក។
នៅក្នុងរយៈពេលប៉ុន្មានថ្ងៃកន្លងមកនេះ ទីផ្សារភាគហ៊ុនសកល ទាំងនៅសហរដ្ឋអាមេរិក អឺរ៉ុប និងនៅអាស៊ី បានធ្លាក់ចុះ ខណៈដែលមានភាពភ័យខ្លាចអំពីការធ្លាក់ចុះខ្លាំងនៃសេដ្ឋកិច្ចអាមេរិក។
អ្នកជំនាញផ្នែកសេដ្ឋកិច្ចបាននិយាយថា មូលហេតុចម្បងនៃការភ័យខ្លាចនេះ គឺដោយសារទិន្នន័យនៃចំនួនអ្នកគ្មានការងារធ្វើនៅក្នុងសហរដ្ឋអាមេរិកសម្រាប់ខែកក្កដាមានការកើនឡើង ដែលសញ្ញាអវិជ្ជមានជាងការរំពឹងទុក។ កាលពីខែកក្កដា និយោជកអាមេរិកបានបង្កើតការងារចំនួន ១១៤ ០០០ កន្លែង ដែលទាបជាងការរំពឹងទុកចំនួន ១៧៥ ០០០ កន្លែង។ មិនត្រឹមតែប៉ុណ្ណោះ អត្រាអ្នកអត់ការងារធ្វើបានកើនឡើងដល់ ៤,៣ ភាគរយដែលជាកម្រិតខ្ពស់ក្នុងរយៈពេល ៣ ឆ្នាំ។
ផ្អែកលើទ្រឹស្តី “Sahm rule” របស់សេដ្ឋវិទូអាមេរិក អ្នកស្រី Claudia Sahm បានឲ្យដឹងថា ប្រសិនបើអត្រាអ្នកអត់ការងារធ្វើជាមធ្យមក្នុងរយៈពេល ៣ ខែលើសពី ០,៥ ភាគរយ មានន័យថា ប្រទេសនេះកំពុងស្ថិតនៅក្នុងដំណាក់កាលដំបូងនៃវិបត្តិសេដ្ឋកិច្ច។ ក្នុងករណីនេះ អត្រាគ្មានការងារធ្វើនៅសហរដ្ឋអាមេរិកបានកើនឡើងក្នុងខែកក្កដា ដោយគិតជាមធ្យមក្នុងរយៈពេល ៣ ខែ គឺស្មើនឹង ៤,១ ភាគរយ បើធៀបនឹងកម្រិតទាបបំផុតកាលពីឆ្នាំមុនដែលមានអត្រា ៣,៥ ភាគរយ។ បញ្ហានេះកំពុងបន្ថែមសម្ពាធលើក្តីបារម្ភថា ធនាគារកណ្តាលសហរដ្ឋអាមេរិកបានបោះឆ្នោតមិនកាត់បន្ថយអត្រាការប្រាក់កាលពីសប្តាហ៍មុន។
អ្វីដែលគួរឱ្យកត់សម្គាល់នោះត្រង់ថា ខណៈពេលធនាគារកណ្តាលនៃបណ្តាប្រទេសមួយចំនួនដែលមានសេដ្ឋកិច្ចល្អប្រសើរ រួមមានដូចជា ធនាគារកណ្តាលអង់គ្លេស និងធនាគារកណ្តាលអឺរ៉ុបបានកាត់បន្ថយអត្រាការប្រាក់នោះ ប៉ុន្តែធនាគារកណ្តាលអាម៉េរិកបែរជានៅបន្តរក្សាអត្រាការប្រាក់ខ្ពស់នៅដដែល បើទោះជាប្រធានធនាគារកណ្តាលអាម៉េរិក លោក Jerome Powell ធ្លាប់បានផ្តល់សញ្ញាថាអត្រាការប្រាក់អាចនឹងត្រូវកាត់បន្ថយនៅក្នុងខែកញ្ញាក៏ដោយ។
ពាក់ព័ន្ធទៅនឹងការថយចុះនៃឱកាសទទួលបានការងារធ្វើ ឬចំនួនអ្នកគ្មានការងារធ្វើកើនឡើងនេះ ក៏មានចំណែកចូលរួមពីបណ្តាក្រុមហ៊ុនបច្ចេកវិទ្យាផងដែរ ដោយសារនិន្នាការជុំវិញបញ្ញាសិប្បនិម្មិត (AI) មានឥទ្ធិពលលើភាគហ៊ុនរបស់ពួកគេ។ ជាក់ស្ដែង កាលពីសប្តាហ៍មុននេះ ក្រុមហ៊ុនផលិតបន្ទះឈីប Intel បានប្រកាសថា ខ្លួននឹងកាត់បន្ថយការងារចំនួន ១៥ ០០០ កន្លែង ខណៈដែលគូប្រជែងរបស់ខ្លួន Nvidia ប្រហែលជាត្រូវពន្យារពេលបញ្ចេញវត្តមានបន្ទះឈីប AI ថ្មីរបស់ខ្លួន។ បន្ថែមពីលើនេះ ភាគហ៊ុនរបស់ Nasdaq ដែលមានឥទ្ធិពលលើសន្ទស្សន៍បច្ចេកវិទ្យារបស់អាមេរិកបានធ្លាក់ចុះ ១០ ភាគរយកាលពីថ្ងៃសុក្រសប្ដាហ៍កន្លងទៅបន្ទាប់ពីបានកើនឡើងដល់កម្រិតខ្ពស់កាលពីប៉ុន្មានសប្តាហ៍មុន។ កត្តានេះបានបង្កើនភាពភ័យខ្លាចនៅក្នុងទីផ្សារភាគហ៊ុន ជាពិសេស ប្រសិនបើភាគហ៊ុនបន្តធ្លាក់ចុះ ធនាគារកណ្តាលអាចនឹងបើកកិច្ចប្រជុំបន្ទាប់របស់ខ្លួនមុនខែកញ្ញា ជាមួយនឹងការកាត់បន្ថយអត្រាការប្រាក់។
យោងតាមលោក Neil Shearing ប្រធានសេដ្ឋវិទូ Capital Economics បានលើកឡើងថា ប្រសិនបើមានការរំខានទីផ្សារដែលកាន់តែធ្ងន់ធ្ងរ វាទំនងជាអាចចាប់ផ្តើមប៉ះពាល់ដល់ស្ថាប័នសំខាន់ៗជាប្រព័ន្ធ និងស្ថិរភាពហិរញ្ញវត្ថុទាំងមូល។ យ៉ាងណាមិញ លោកស្រី Claudia Sahm បានលើកឡើងថា ពេលនេះសេដ្ឋកិច្ចអាម៉េរិកនៅមិនទាន់ស្ថិតក្នុងវិបត្តិធ្ងន់ធ្ងរនោះទេ ប៉ុន្តែវាក៏កំពុងតំរង់ទៅទិសដៅឆ្ពោះទៅបន្តិចម្ដងៗហើយ ដែលវាជាកក្តាសំខាន់បង្ខំឱ្យមានការកាត់បន្ថយអត្រាការប្រាក់ដោយមិនអាចជៀសរួចទេ៕
Account
Security
Favourite Content