សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងគោលបំណងសម្រួលដល់ការធ្វើដំណើរ និងការដឹកជញ្ជូនទំនិញរបស់ប្រជាពលរដ្ឋក៏ដូចជាភ្ញៀវទេសចរ រាជរដ្ឋាភិបាលកម្ពុជាបានបញ្ចេញថវិការាប់ពាន់លានដុល្លារដើម្បីសាងសង់ហេដ្ឋារចនាសម្ព័ន្ធផ្លូវស្ពានថ្នល់ជាដើម ហើយនៅឆ្នាំ២០២៤នេះស្ពានវែងជាងគេនៅក្នុងប្រទេសកម្ពុជាគ្រោងនឹងសាងសង់ឡើងនៅក្នុងខេត្តកំពង់ឆ្នាំង ដែលមានប្រវែងរហូតដល់ជាង៣គីឡូម៉ែត្រ ។
ឯកឧត្តម ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូនបានមានប្រសាសន៍ថា បន្ទាប់ពីក្រសួងបរិស្ថានបានសិក្សាចប់សព្វគ្រប់ពីផលប៉ះពាល់លើគម្រោងសាងសង់ផ្លូវលេខ 50C ហើយបានបង្ហាញថាវាមិនបានប៉ះពាល់ដល់បរិស្ថាន និងមច្ឆាជាតិនោះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីក៏បានព្រមព្រៀង និងយល់ព្រមឱ្យរកថវិកាសម្រាប់សាងសង់ផ្លូវមួយខ្សែពីខេត្តកំពង់ធំមកកាន់ខេត្តកំពង់ឆ្នាំង ដែលមានប្រវែងជាង៥០គីឡូម៉ែត្រ ហើយក្នុងនោះក៏មានស្ពានវែងជាងគេនៅកម្ពុជាលើផ្លូវមួយខ្សែនេះផងដែរ។
ឯកឧត្តមបន្តថា ៖
“រាជរដ្ឋាភិបាលកំពុងស្វែងរកថវិកា ជាពិសេសថវិកាពីមិត្តចិនរបស់យើង ដើម្បីសាងសង់ផ្លូវ និងស្ពាននេះនៅឆ្នាំ២០២៤ ដែលថវិកាចំណាយគ្រោងប្រមាណ ២៥០លានដុល្លារអាមេរិកក្នុងនោះផ្លូវគ្រោងចំណាយថវិកា ១៥០លានដុល្លារអាមេរិក និងស្ពានគ្រោងចំណាយថវិកាប្រមាណ ១០០លានដុល្លារអាមេរិក ។ គម្រោងនេះ ត្រូវបានសម្ដេចតេជោ ចាររួចហើយ ហើយនៅក្នុងគម្រោងផ្លូវនោះ មានស្ពានមួយដែលមានប្រវែង ៣ ៣០០ម៉ែត្រ និងត្រូវបានចាត់ទុកថាជាស្ពានវែងជាងគេមួយនៅក្នុងប្រទេសកម្ពុជា”
ឯកឧត្តមបន្ថែមថា គម្រោងផ្លូវនេះនឹងជួយសម្រួលដល់ការធ្វើដំណើររបស់ប្រជាពលរដ្ឋនៅក្នុងខេត្តសៀមរាប ព្រះវិហារ កំពង់ធំ និងកំពង់ឆ្នាំង ហើយក៏ជាផ្លូវដ៏សំខាន់ក្នុងការដឹកជញ្ជូនទំនិញមកកាន់កំពង់ផែពហុបំណងដែលកំពុងសាងសង់នៅក្នុងខេត្តកំពង់ឆ្នាំងផងដែរ។
ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានមានប្រសសាន៍ថា នៅពេលផ្លូវតភ្ជាប់ពីខេត្តកំពង់ធំមកកាន់ខេត្តកំពង់ឆ្នាំងសាងសង់រួច នឹងធ្វើឱ្យការដឹកជញ្ជូនទំនិញចេញពីកំពង់ឆ្នាំងទៅកាន់តំបន់ផ្សេងៗទៀតនឹងមានភាពងាយស្រួល។ ម្យ៉ាងវិញទៀត នៅពេលកំពង់ផែពហុបំណងនៅក្នុងខេត្តកំពង់ឆ្នាំងសាងសាង់រួច វានឹងធ្វើឱ្យការដឹកជញ្ជូនតាមផ្លូវទឹកកាន់តែមានភាពងាយស្រួល ហើយនឹងធ្វើឱ្យដឹកជញ្ជូនកាន់តែមានតម្លៃទាប ដែលធ្វើឱ្យកសិកផលរបស់កសិករអាចលក់ទទួលបានចំណូលច្រើន ពីព្រោះពេលនេះយើងរំពឹងថាឈ្មួញកាន់តែច្រើននឹងចូលមករកទិញកសិផលដើម្បីនាំចេញក៏ដូចជាការផ្គត់ផ្គង់ក្នុងស្រុកផងដែរ។ គួរបញ្ជាក់ផងដែរថា ក្នុងឆ្នាំ២០២៣នេះ រាជរដ្ឋាភិបាលកម្ពុជាបានគ្រោងនឹងសាងសង់គម្រោងហេដ្ឋារចនាសម្ព័ន្ធជាច្រើន ដូចជា គម្រោងផ្លូវល្បឿនលឿនភ្នំពេញ- បាវិត គ្រោងនឹងបើកការដ្ឋាននៅពាក់កណ្ដាលឆ្នាំ២០២៣នេះ គម្រោងស្ពានតភ្ជាប់ភ្នំពេញ-អរិយក្សត្រ និងកំពុងសិក្សាពីគម្រោងមួយចំនួនទៀត ខណៈគម្រោងដែលបានសិក្សាចប់ក៏រាជរដ្ឋាភិបាលកំពុងស្វះស្វែងរកថវិកាសាងសង់ផងដែរ៕
Account
Security
Favourite Content