សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សិប្បកម្មខ្នាតតូច និងមានលក្ខណៈជាគ្រួសារមួយ ស្ថិតនៅភូមិមេទឹក ស្រុកបាកាន ខេត្តពោធិ៍សាត់ បាន និងកំពុងធ្វើការកែច្នៃផ្លែល្ពៅឱ្យទៅជានំស្រួយ ស្ងួត មានរសជាតិឆ្ងាញ់ សម្រាប់ដាក់លក់នៅលើទីផ្សារ ក្រោយពីបានមើលឃើញថា តម្លៃផ្លែល្ពៅស្រស់កាន់តែធ្លាក់ថ្លៃ និងជន់នៅលើទីផ្សារ។
លោក ទាវ រត្ន័កាលីន ជាម្ចាស់សិប្បកម្មកែច្នៃនំស្រួយខាងលើបានរៀបរាប់ប្រាប់ Apsara Tonight ឱ្យដឹងថា៖ នាំស្រួយដែលផលិតពីផ្លែល្ពៅនេះមានម៉ាកយីហោ Rosseka Ratha Brand ហើយដើមហេតុដំបូងនៃការឈានដល់ការបង្កើតជាសិប្បកម្មផលិតនំល្ពៅស្រួយនេះឡើង គឺនៅពេលដែលមើលឃើញទិន្នផលផ្លែល្ពៅរបស់ក្រុមគ្រួសារ ក៏ដូចជាប្រជាកសិករក្នុងតំបន់ដែលដាំដុះបានមិនមានទីផ្សារ ហើយទទួលបានតម្លៃទាប ក៏មានកើតមានគំនិតចង់កែច្នៃធ្វើជានំ ខណៈដែលមានសិប្បកម្មមួយចំនួនបានកែច្នៃផ្លែល្ពៅនេះទៅជាសរសៃមីរួចទៅហើយ។
ម្ចាស់សិប្បកម្មរូបនេះបន្ថែមថា៖ ផលិតផលនំល្ពៅស្រួយនេះ គឺផលិតចេញពីល្ពៅខ្មែរធម្មជាតិ ១០០ភាគរយ គ្មានការប្រើប្រាស់សារធាតុគីមីសម្រាប់រក្សាទុកគុណភាពក្នុងរយៈពេលយូរនោះទេ ពោលគឺធ្វើឡើងនៅពេលដែលមានការបញ្ជាទិញពីបណ្តាហាងលក់ទំនិញ ម៉ាត ក៏ដូចជាអាជីវករដែលទិញយកទៅលក់បន្តតែប៉ុណ្ណោះ។
លោក ទាវ រត្ន័កាលីន បានបញ្ជាក់ផងដែរថា ចំពោះតម្លៃនំល្ពៅស្រួយលក់នៅលើទីផ្សារ មួយកញ្ចប់ ៤ពាន់រៀល ខណៈដែលតម្រូវការទីផ្សារនំល្ពៅស្រួយនាពេលបច្ចុប្បន្ននះ ហាក់មានការគាំទ្រច្រើនជាបណ្តើរៗ ក្រោយមានការផ្សព្វផ្សាយតាមរយៈតាមបណ្ដាញសង្គម និងការចូលរួមតាំងពិព័ណ៌ក្នុងកម្មវិធីជំរុញចលនាភូមិមួយផលិតផលមួយនៅតាមបណ្តាខេត្ត ក្រុងមួយចំនួន ជាពិសេសនៅរាជធានីភ្នំពេញកាលពីពេលកន្លងទៅ។
យ៉ាងណាមិញ ទម្រាំអាចឈានដល់កិច្ចដំណើរការបានដូចសព្វថ្ងៃ សិប្បកម្មមួយនេះបានជួបប្រទះនូវផលវិបាកជាច្រើន ប៉ុន្តែដោយសារមានឆន្ទៈ និងកម្លាំងចិត្តដែលចង់កសាងកេរ្តិ៍ឈ្មោះផលិតផលខ្មែរ ម្ចាស់សិប្បកម្មបានជំនះ និងព្យាយាមបន្តធ្វើរហូតទទួលបានការគាំទ្រ កសាងបាននូវឈ្មោះផលិតនំល្ពៅស្រួយ Rosseka Ratha Brand បានដូចពេលបច្ចុប្បន្ន។
ឯកឧត្តមបណ្ឌិត សួង ណយ អគ្គលេខាធិការរងគណៈកម្មាធិការជាតិជំរុញចលនាភូមិ១ផលិតផល១ នៃទីស្តីការគណៈរដ្ឋមន្ត្រី បានបង្ហាញពីកិច្ចគាំទ្រយ៉ាងពេញទំហឹងទៅលើរាល់សកម្មភាពកែច្នៃ និងបង្កើតចេញជាផលិតផលថ្មី ឬផលិតផលសម្រេចដែលជាការបង្កើនតម្លៃបន្ថែមទៅលើវត្ថុធាតុដើមដែលមានស្រាប់។ ជាក់ស្ដែងដូចជាទិន្នផលផ្លែល្ពៅដែលតែងមានភាពជន់ជោរនៅលើទីផ្សារ និងមានតម្លៃទាបនោះ បច្ចុប្បន្នឃើញមានសិប្បកម្មក្នុងស្រុកមួយចំនួនកំពុងធ្វើការកែច្នៃ ដែលក្រៅពីសិប្បកម្មនៅខេត្តពោធិ៍សាត់ធ្វើជានំស្រួយនោះ ក៏មានសិប្បកម្មនៅខេត្តបាត់ដំបង កែច្នៃជាសរសៃមី សិប្បកម្មនៅខេត្តកោះកុង ក៏កំពុងកែច្នៃផ្លែល្ពៅទៅជានំស្រួយផងដែរ។
ឯកឧត្តមបានមានប្រសាសន៍បញ្ជាក់ថា ការលក់ទិន្នផលដែលជាវត្ថុធាតុដើមភាគច្រើនតែងកើតមានភាពប្រឈម ជាពិសេសកក្តាតម្លៃធ្លាក់ចុះ។ ដូច្នេះនៅពេលដែលមានការកែច្នៃចេញទៅជាផលិតផលថ្មី តម្លៃក៏អាចទទួលបានថ្លៃជាងមុន អាចរក្សាទុកបានយូរជាងមុន ជាពិសេសអាចជួយបង្កើនសេដ្ឋកិច្ចមូលដ្ឋានថែមទៀតផង៕
Account
Security
Favourite Content