សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បាន និងកំពុងរៀបចំដំណើរការឈានទៅរកការគ្រប់គ្រងសំណង់ ការដ្ឋាន គ្រឿងបង្គុំសំណង់ និងលិខិតបទដ្ឋានពាក់ព័ន្ធក្នុងវិស័យសំណង់ តាមរយៈការប្រើប្រាស់ប្រព័ន្ធព័ត៌មានបច្ចេកវិទ្យា ។
បើតាមការបញ្ជាក់របស់ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក្នុងសិក្ខាសាលាបណ្ដុះបណ្ដាលស្ដីពីការប្រើប្រាស់កម្មវិធីគ្រប់គ្រងទិន្នន័យសំណង់តាមប្រព័ន្ធព័ត៌មានវិទ្យា ដល់មន្ត្រីជំនាញនៃមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានី ខេត្ត ដែលបានធ្វើឡើងនៅទីស្ដីការក្រសួងនាព្រឹកថ្ងៃទី២៤ ខែកក្កដា ឆ្នាំ២០២៥ បានឱ្យដឹងថា ការគ្រប់គ្រងទិន្នន័យដោយប្រព័ន្ធព័ត៌មានវិទ្យានេះ គឺជាយុទ្ធសាស្ត្រមួយដែលនឹងធ្វើឱ្យការគ្រប់គ្រងទិន្នន័យក្នុងវិស័យសំណង់កាន់តែមានភាពជាក់លាក់ និងកសាងបាននូវទិន្នន័យរួមមួយសម្រាប់គ្រប់ភាគីពាក់ព័ន្ធអាចប្រើប្រាស់បានជាគុណប្រយោជន៍ ។
ឯកឧត្តមបានបន្ថែមថា ៖
«នេះគឺជាការបើកសមរភូមិថ្មីមួយទៀតចំពោះកិច្ចការរៀបចំរបៀបរបបការងារថ្មី និងការផ្លាស់ប្ដូរផ្នត់គំនិតថ្មីក្នុងការអនុវត្តការងារស្ដីពីការប្រើប្រាស់កម្មវិធីគ្រប់គ្រងទិន្នន័យសំណង់តាមប្រព័ន្ធព័ត៌មានវិទ្យា»។
ជាមួយគ្នានេះ ឯកឧត្តមឧបនាយករដ្ឋមន្ត្រីបានលើកឡើងអំពីយុទ្ធសាស្ត្របញ្ចកោណដំណាក់កាលទី១ ដែលសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីបានយកធ្វើជាចន្លុះបំភ្លឺផ្លូវ សម្រាប់រៀបចំប្រទេសជាតិអោយមានសណ្តាប់ធ្នាប់របៀបរៀបរយ ហើយអ្វីដែលក្រសួងបានធ្វើនេះក៏ដើម្បីឆ្លើយតបទៅនឹងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលផងដែរ។ ប្រព័ន្ធគ្រប់គ្រងទិន្នន័យសំណង់, លិខិតអនុញ្ញាតសាងសង់, លិខិតបើកបិទការដ្ឋាន,វិញ្ញាបនបត្រប្រើប្រាស់សំណង់ គឺអាចស្នើសុំមកដោយផ្ទាល់នៅក្រសួងរៀបចំដែនដី នគរូបនីយកម្ម និងសំណង់ ឬអាចស្នើសុំតាមរយៈប្រព័ន្ធអេឡិចត្រូនិកបាន។ ឯកឧត្តមបានណែនាំដល់ថ្នាក់ដឹកនាំក្រសួងត្រូវពិនិត្យមើលប្រព័ន្ធគ្រប់គ្រងការដ្ឋានសំណង់ និងប្រព័ន្ធគ្រប់គ្រងកម្មករវិស័យសំណង់ ដោយត្រូវមានទិន្នន័យច្បាស់លាស់អំពីចំនួនកម្មករ ក៏ដូចជាជំនាញរបស់កម្មករនីមួយៗផងដែរ ។
ឯកឧត្តមឧបនាយករដ្ឋមន្ត្រី សាយ សំអាល់ បានជំរុញដល់ថ្នាក់ដឹកនាំក្រសួងត្រូវរួមគ្នាទទួលខុសត្រូវចំពោះបញ្ហាសន្តិសុខ និងប្រទេសជាតិ ដោយត្រូវពិនិត្យរាល់ការសាងសង់សំណង់នានាឱ្យបានសមស្របតាមទីតាំងនីមួយៗធ្វើយ៉ាងណាកុំឱ្យប៉ះពាល់ដល់សន្តិសុខជាតិ។ ទន្ទឹមនេះ ឯកឧត្តមក៏បានផ្ដល់ការណែនាំឱ្យគិតគូរអំពីឧស្សាហកម្មផលិតគ្រឿងសំណង់សំរាប់ប្រើប្រាស់ក្នុងស្រុក និងលក់ចេញទៅបរទេសដើម្បីបង្កើតប្រភពចំណូលសម្រាប់ជាតិ និងជួយដល់ប្រជាពលរដ្ឋអោយមានការងារធ្វើក្នុងវិស័យនេះផងដែរ។
សូមជម្រាបជូនថា ការគ្រប់គ្រងទិន្នន័យបានជាក់លាក់ និងជារួមនេះ នឹងធ្វើឱ្យក្រសួងអាចរៀបចំគោលនយោបាយបានត្រឹមត្រូវ និងឆ្លើយតបទៅនឹងស្ថានភាពជាក់ស្តែងនៃសង្គមសេដ្ឋកិច្ចរបស់កម្ពុជា ដើម្បីដោះស្រាយបញ្ហាសំណង់ ដែលកំពុងជួបប្រទះ ហើយនឹងឈានទៅផ្តល់សេវាគាប់ចិត្តជូនប្រជាជន៕
Account
Security
Favourite Content