សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ អ្នកម៉ៅការសំណង់ មិនមែនមានតួនាទីតែខាងសាងសង់ ឬ គ្រប់គ្រងកម្មករសំណង់ក្នុងការដ្ឋានដែលខ្លួនបានម៉ៅការសាងសង់នោះទេ ប៉ុន្តែអ្នកម៉ៅការសំណង់ក៏មានតួនាទី និងភារកិច្ចចំនួនទៀតដើរតួនាទីជំនួសឱ្យម្ចាស់អគារ ។ នៅថ្ងៃនេះ បណ្ដាញព័ត៌មាន AMS នឹងលើកយកពីតួនាទី និងភារកិច្ចរបស់អ្នកម៉ៅការសំណង់មកលម្អិតជូន ។
បើតាមឯកឧត្តម ថេង ច័ន្ធសង្វារ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា អ្នកម៉ៅការសំណង់មានតួនាទី និងភារកិច្ចសំខាន់ ២យ៉ាង គឺទំនាក់ទំនងផ្ទៃក្នុង និងទំនាក់ទំនងខាងក្រៅ ។ ទី១. ទំនាក់ទំនងផ្ទៃក្នុង៖ អ្នកម៉ៅការសំណង់ត្រូវទទួលខុសត្រូវចំពោះសុវត្ថិភាព និងសុខភាពរបស់កម្មករ បុគ្គលិកនៅក្នុងការដ្ឋានដែលខ្លួនបានម៉ៅការសាងសង់ ។ ពាក់ព័ន្ធនឹងសុវត្ថិភាព អ្នកម៉ៅការត្រូវធានាចំពោះមុខលើគ្រោះថ្នាក់ភ្លាមៗដែលអាចកើតឡើងលើកម្មករ និងបុគ្គលិកក្រោមបង្គាប់របស់ខ្លួន ដូចជាមុតដៃមុតជើង ការធ្លាក់ពីលើទីខ្ពស់ ឬឧបករណ៍សំណង់ធ្លាក់ពីលើបណ្ដាលឱ្យរងរបួសដល់កម្មករ និងបុគ្គលិកជាដើម ។
ឯកឧត្តមបន្តថា ក្រៅពីការធានាលើសុវត្ថិភាព អ្នកម៉ៅការសំណង់ក៏ត្រូវតែធានាលើសុខភាពរបស់កម្មករ និងបុគ្គលិកក្នុងការដ្ឋានរបស់ខ្លួនដែរ ដោយត្រូវធានាថា សម្ភារៈ និងវត្ថុធាតុដើមសម្រាប់សាងសង់ នឹងមិនបង្កផលប៉ះពាល់ដល់សុខភាពរបស់កម្មករ ដូចជា មិនប្រើប្រាស់ថ្នាំពណ៌ ថ្នាំលាប ដែលអាចបង្កផលប៉ះពាល់ដល់សុខភាពក្នុងពេលសាងសង់ ហើយត្រូវណែនាំដល់កម្មករក្នុងការដ្ឋានការពារសុខភាពបើសិនជាក្នុងករណីមានប្រើប្រាស់វត្ថុធាតុដើមសំណង់ដែលនាំឱ្យប៉ះពាល់ដល់សុខភាព ។
ចំពោះទំនាក់ទំនងខាងក្រៅ ឯកឧត្តម ថេង ច័ន្ទសង្វារ បានមានប្រសាសន៍បន្តទៀតថា អ្នកម៉ៅការសំណង់ត្រូវតែធានាឱ្យបាននូវសណ្ដាប់ធ្នាប់សាធារណៈ ផ្នែកខាងក្រៅការដ្ឋានសំណង់ ដោយមិនអាចអនុញ្ញាតឱ្យដំណើរការដ្ឋានសំណង់មួយ ហើយប៉ះពាល់ដល់សណ្ដាប់ធ្នាប់សាធារណៈឡើយ ។ ក្នុងន័យ គឺសម្ដៅលើសន្តិសុខដល់សាធារណជន ដោយត្រូវធ្វើយ៉ាងណាកុំឱ្យមានការប៉ះពាល់ដល់បូរណភាពរូបកាយ និងផ្លូវចិត្តរបស់សាធារណជន ។
ឯកឧត្តមបន្ថែមថា ដំណើរការការដ្ឋានសំណង់ត្រូវធានាឱ្យបានថា មិនមានការធ្លាក់ដែក ឬសម្ភារៈសំណង់មកលើផ្លូវសាធារណៈដែលអាចបង្កគ្រោះថ្នាក់ដល់អ្នកដំណើរ ឬធ្លាក់កម្ទេចកម្ទីលើផ្ទះរបស់អ្នកជិតខាងដែលរំខានដល់ការរស់នៅរបស់ប្រជាពលរដ្ឋដែលមានលំនៅឋានក្បែរការដ្ឋានសំណង់នោះទេ ។ ការបង្កសំឡេងរំខានដល់អ្នកជិតខាងក៏ត្រូវតែគ្រប់គ្រងឱ្យបាន និងមិនត្រូវឱ្យដំណើរការការដ្ឋាននៅពេលយប់ដែលរំខានដល់ការសម្រាករបស់ពលរដ្ឋដែរ ។ អ្នកម៉ៅការសំណង់ក៏ត្រូវតែគ្រប់គ្រងឱ្យបាននូវបញ្ហាអនាម័យនៅជុំវិញការដ្ឋាន ដោយមិនត្រូវឱ្យមានសំរាមកម្ទេចកម្ទីកាកសំណល់ចេញពីការដ្ឋានហៀរចេញមកក្រៅ ។
ឯកឧត្តមបានបញ្ជាក់ថា អ្នកម៉ៅការសំណង់ទាំងអស់ត្រូវបំពេញកាតព្វកិច្ច ៣ ធំៗ ទី១. ត្រូវអនុវត្តការងារទៅតាមប្រភេទ និងកម្រិតនៃអាជ្ញាបណ្ណ ឬក៏លិខិតអនុញ្ញាតដែលបានទទួលពីអាជ្ញាធរមានសមត្ថកិច្ច ។ ឧទាហរណ៍ថា អាជ្ញាបណ្ណដែលអ្នកម៉ៅការសំណង់ទទួលបានត្រឹមតែជាសំណង់ទាបៗ ដូច្នេះ មិនអាចធ្វើ ឬគ្រប់គ្រងការដ្ឋានសំណង់ខ្ពស់ៗបានឡើយ បើសិនជានៅតែបន្តធ្វើនោះ មានន័យថាអ្នកម៉ៅការសំណង់ប្រព្រឹត្តខុសច្បាប់។ កាតព្វកិច្ចទី២ របស់អ្នកម៉ៅការសំណង់ គឺត្រូវអនុវត្តន៍ទៅតាមគំរូប្លង់ដែលធម្មតាមានភ្ជាប់ជាមួយនឹងលិខិតអនុញ្ញាត ។ ទី៣ អ្នកម៉ៅការសំណង់ទាំងអស់ត្រូវតែអនុវត្តទៅតាមបទដ្ឋាន និងបទបញ្ញត្តិបច្ចេកទេសសំណង់ ។ ក្នុងន័យនេះ អ្នកម៉ៅការសំណង់ត្រូវធ្វើយ៉ាងណាធានាថា រាល់ការសាងសង់ រាល់ការសាងសង់ រាល់ការបំពាក់ រាល់ការងារទាំងអស់ដែលដំណើរការក្នុងការដ្ឋានសំណង់ត្រូវធ្វើទៅតាមបច្ចេកវិទ្យា ដោយធានាថា គុណភាពសំណង់រឹងមាំ និងប្រើប្រាស់បានយូរអង្វែង ៕
Account
Security
Favourite Content