សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បាន និងកំពុងយកចិត្តទុកដាក់ ជំរុញការដោះស្រាយបញ្ហាអគារចាស់ទ្រុឌទ្រោមនៅក្នុងរាជធានីភ្នំពេញ ដោយក្នុងនោះអគារចាស់ទ្រុឌទ្រោមមួយស្ថិតតាមបណ្ដោយផ្លូវព្រះមុនីវង្ស កែងនឹងផ្លូវកម្ពុជាក្រោម ( អគារអង្គរជ័យ ) ក៏ក្រសួងបានដោះស្រាយយ៉ាងប្រញ៉ាប់ប្រញាល់ដោយរហូតមកដល់ពេលនេះដោះស្រាយបានប្រមាណ ៩០ភាគរយហើយ នៅសល់ តែ៣គ្រួសារប៉ុណ្ណោះដែលកំពុងបន្តរស់នៅក្នុងអគារទ្រុឌទ្រោមនេះ ក្នុងនោះ ២គ្រួសារកំពុងបន្តអាជីវកម្មក្នុងអគារនេះ និង១ទៀតកំពុងបន្តជួលបន្ទប់ឱ្យអ្នកលក់បបរស ។
បើតាមឯកឧត្តម ខៀវ បូរិន អនុរដ្ឋលេខាធិការក្រសួងដែនដី នគរូបនីយកម្ម និងសំណង់ បានបញ្ជាក់ថា បច្ចុប្បន្ននេះ ក្រសួងបានបង្កើតក្រុមការងារជាច្រើនក្រុមតូចៗ ចុះតាមបណ្តាអគារចាស់ៗ ចំនួន ១៩ នៅក្នុងរាជធានីភ្នំពេញដើម្បីពិនិត្យ និងសិក្សា ដើម្បីពន្លឿនការដោះស្រាយ ។
ការពន្លឿនការដោះស្រាយនូវបញ្ហាអគារចាស់ទ្រុឌទ្រោមនេះ ក៏ស្របប្រទេសជិតខាងជាពិសេសថៃ និងមីយ៉ាន់ម៉ា បានជួបគ្រោះរញ្ជួយដី និងបានធ្វើឱ្យបាក់រលំ ស្រុតអគារជាច្រើន បង្ករឱ្យមានមនុស្សរងរបួស និងស្លាប់សរុបរាប់ពាន់នាក់។
ចំពោះបញ្ហានេះ ឯកឧត្តម ខៀវ បូរិន បានបញ្ជាក់ថា ៖
«តាមការព្យាករណ៍ ការរញ្ជួយដីនឹងបន្តរហូតដល់ថ្ងៃទី ១២ ខែមេសា ឆ្នាំ២០២៥ ថែមទាំងទឹកភ្លៀងដែលហូរដក់តាមជាន់នីមួយៗ បន្ថែមទម្ងន់លើអគារចំណាស់ទៀត ធ្វើឱ្យកាន់តែងាយដួលរលំបាក់។ ដូច្នេះ ដើម្បីការពារសុវត្ថិភាពបងប្អូនប្រជាពលរដ្ឋ ដែលកំពុងរស់នៅអគារចាស់ទ្រុឌទ្រោមក្នុងរាជធានីភ្នំពេញ សូមអំពាវនាវដល់បងប្អូនដែលរស់ក្នុងអគារទាំងនោះ មកទទួលយកដំណោះស្រាយ ដែលក្រុមការងារបានគណនាតាមតម្លៃទីផ្សារជាក់ស្តែង ដើម្បីចាកចេញទៅរស់នៅទ្រនុំថ្មីមានសុវត្ថិភាព»។
ទន្ទឹមនេះឯកឧត្តមក៏សូមផ្តាំផ្ញើជាសារជូនដល់អ្នកដែលទៅជាវវ៉ែនតា ក៏ដូចជាអ្នកទៅទទួលទានបបរស នៅក្នុងអគារអង្គរជ័យ សូមឱ្យប្រុងប្រយ័ត្នចំពោះហានិភ័យ ដែលអាចកើតឡើងភ្លាមៗ មិនមានផ្តល់សញ្ញា ដែលអាចប៉ះពាល់ដល់អាយុជីវិតបងប្អូន ។
គួរបញ្ជាក់ថា អគារអង្គរជ័យដែលស្ថិតនៅកណ្ដាលរាជធានីភ្នំពេញ ត្រូវបានសាងសង់ឡើងតាំងពីឆ្នាំ១៩៥០ ដែលគិតមកដល់ពេលនេះ មានអាយុកាលជាង៧០ឆ្នាំហើយ មានពលរដ្ឋរស់នៅចំនួន៦៦គ្រួសារ ហើយភាគច្រើនបានយល់ទទួលយកនូវការដោះស្រាយរបស់រាជរដ្ឋាភិបាលដើម្បីចាកចេញទៅរកទីទ្រនុំដែលមានសុវត្ថិភាពជាងនេះ ។
តាមរយៈបទពិសោធន៍គ្រោះរញ្ជួយដីនៅប្រទេសមីយ៉ាន់ម៉ា និងប្រទេសថៃ ក៏ជាមេរៀនមួយសម្រាប់កម្ពុជា និងប្រទេសផ្សេងទៀត ត្រូវគិតគូរចំពោះពលរដ្ឋរស់នៅក្នុងអគារចាស់ៗ ខណៈបណ្ដាប្រទេសជិតខាងកម្ពុជាដូចជាប្រទេសថៃ កន្លងមកមិនធ្លាប់ជួបហេតុការណ៍អាក្រក់បែបនេះឡើយ ។
បើតាមឯកឧត្តម ទូស សាភឿន សាស្ត្រាចារ្យផ្នែកស្ថាបត្យកម្មកម្ពុជា បានលើកឡើងថា ប្រទេសកម្ពុជានឹងមិនមានរញ្ជួយដីដូចនឹងប្រទេសថៃ និងមីយ៉ាន់ម៉ានោះទេ ប៉ុន្តែអាចរំញ័របន្តិចបន្តួច គឺវាជៀសមិនផុត ដែលអាចប៉ះពាល់ដល់អគារចាស់ទ្រុឌទ្រោមខ្លាំងខ្លះៗ តែវាគ្រាន់តែជារលកនៃសម្ពាធខាងក្រៅ មិនអាចបង្កជាវិនាសកម្មអ្វីធំដុំបានឡើយ ព្រោះដែនដីខ្មែរមានស្រទាបការពារដ៏រឹងមាំកើតចេញពីបន្ទុះភ្នំភ្លើងនៅខាងក្រោមដី ៕
Account
Security
Favourite Content