សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្រសួងទេសចរណ៍ និងក្រុមហ៊ុន អប្សរា មេឌា ស៊ឺវីស (AMS) ដែលជាបណ្តាញផ្សព្វផ្សាយសារព័ត៌មានដ៏ធំមួយនៅកម្ពុជា បានឯកភាពសហការគ្នាជួយជំរុញវិស័យទេសចរណ៍កម្ពុជាឱ្យកាន់តែរីកលូតលាស់ ក្នុងគោលដៅទាក់ទាញទេសចរជាតិ និងអន្តរជាតិឱ្យបានកាន់តែច្រើន។ កិច្ចសហការនេះត្រូវបានឯកភាពក្នុងឱកាស ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ អនុញ្ញាតឱ្យគណៈប្រតិភូក្រុមហ៊ុន អប្សរា មេឌា ស៊ឺវីស (AMS) ចូលជួបពិភាក្សាការងារស្តីពីការជំរុញវិស័យទេសចរណ៍កាលពីល្ងាចថ្ងៃទី០៩ ខែមេសា ឆ្នាំ២០២៥ នៅទីស្តីការក្រសួង។
លោក លឹម ឃុនស្រ៊ុន អគ្គនាយកក្រុមហ៊ុន អប្សរា មេឌា ស៊ឺវីស (AMS) បានជម្រាបឯកឧត្តមរដ្ឋមន្ត្រីថា ៖ AMS ជាបណ្តាញសារព័ត៌មានដ៏ធំមួយនៅកម្ពុជា តាមរយៈការផ្សព្វផ្សាយនូវមាតិកាដែលមានគុណភាពខ្ពស់ដល់ទស្សនិកជនគោលដៅ និងសាធារណជនទូទៅនៅទូទាំងប្រទេសកម្ពុជា ហើយក៏ជាវេទិកាផ្សព្វផ្សាយប្រកបដោយភាពច្នៃប្រឌិតឈានមុខគេ ជាមួយនឹងការប្រើប្រាស់ធនធានប្រកបដោយគុណភាព ប្រសិទ្ធភាព និងក្រមសីលធម៌ មានវិជ្ជាជីវៈ។
លោកអគ្គនាយកបានបញ្ជាក់ថា ៖
«ចក្ខុវិស័យរបស់ AMS គឺដើម្បីក្លាយជាអ្នកបង្កើតមាតិកាដ៏មានសក្តានុពល គួរឱ្យចាប់អារម្មណ៍ និងមានប្រយោជន៍សម្រាប់មនុស្សជាតិ និងសង្គមជាតិ។ AMS ផ្តោតជាចម្បងលើការបង្កើតមាតិកាថ្មីៗក្នុងទម្រង់ជាវីដេអូ អត្ថបទ និងកម្មវិធី ដែលមានប្រយោជន៍ដោយផ្ទាល់ និងដោយប្រយោលសម្រាប់សង្គម ជាពិសេសផ្នែក សេដ្ឋកិច្ច នយោបាយ ហិរញ្ញវត្ថុ អប់រំ កីឡា កម្សាន្ត អារិយធម៌ ប្រវត្តិសាស្ត្រ ដោយមានស្ថានីយ៍ទូរទស្សន៍ អប្សរា១១ , ទូរទស្សន៍ឌីជីថល, គេហទំព័រចម្រុះ, វិទ្យុ ព្រមទាំងការផលិតកម្មវិធីជាច្រើនទៀតតាមបណ្តាញទំនាក់ទំនងសង្គម។ AMS ត្រៀមខ្លួនជានិច្ចដើម្បីសហការជាមួយក្រសួងទេសចរណ៍ ដើម្បីផ្សព្វផ្សាយ និងជំរុញវិស័យទេសចរណ៍កម្ពុជាទៅកាន់ឆាកអន្តរជាតិឱ្យកាន់តែទូលាយ»។
ឯកឧត្ត ហួត ហាក់ រដ្ឋមន្ត្រីក្រសួងទេសចរណ៍ បានជម្រាបប្រតិភូ AMS អំពីប្រវត្តិ សារៈសំខាន់ គោលនយោបាយ កិច្ចខិតខំប្រឹងប្រែង និងសមិទ្ធផលនៃវិស័យទេសចរណ៍ដែលសម្រេចបាន។ វិស័យទេសចរណ៍សំខាន់ណាស់ ហើយរាជរដ្ឋាភិបាលបានចាត់ទុកជាវិស័យអាទិភាព ជាឆ្អឹងខ្នង និងជាចន្ទល់សេដ្ឋកិច្ចជាតិ។
ឯកឧត្តមបានលើកឡើងថា៖
«ជំនួបគ្នានេះពិតជាមានសារៈសំខាន់ ហើយ AMS នឹងក្លាយជាដៃគូដ៏សំខាន់របស់ក្រសួងទេសចរណ៍។ បច្ចុប្បន្ននេះ ក្រសួងទេសចរណ៍បានសហការជាមួយបណ្តាញសារព័ត៌មានផ្សេងៗជាច្រើនទៀត ក៏ដូចជា អ្នកផលិតមាតិតាតាមបណ្តាញសង្គម ដើម្បីជំរុញ និងលើកកម្ពស់វិស័យទេសចរណ៍ឱ្យកាន់តែទូលំទូលាយ»។
ឯកឧត្តមក៏បានសម្តែងនូវសេចក្តីរីករាយដែលបានសហការជាមួយស្ថាប័នដ៏ធំ និងល្បី ក្នុងការផ្សព្វផ្សាយទេសចរណ៍។ នាពេលខាងមុខ ក្រសួងទេសចរណ៍ និងAMS នឹងឈានទៅដល់ការចុះអនុស្សរណៈយោគយល់គ្នា(MOU) ដើម្បីពង្រីកវិសាលភាពសហប្រតិបត្តិការលើការជំរុញវិស័យទេសចរណ៍នេះ ៕
Account
Security
Favourite Content