ភ្នំពេញ ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យានិងនវានុវត្តន៍ នៅក្នុងសប្តាហ៍នេះបានប្រកាសដាក់ឱ្យដំណើការកម្មវិធីបណ្ដុះបណ្ដាលស្តីពី «ជំនាញបង្កើនផលិតភាពសហគ្រាស» ក្នុងគោលដៅបង្កើនភាពប្រកួតប្រជែងផលិតភាព និងសមត្ថភាពអនុលោមរបស់សហគ្រាសធុនតូច និងមធ្យម នៅកម្ពុជា។ កម្មវិធីនេះមានការគាំទ្រផ្នែក​បច្ចេកទេស និង​ហិរញ្ញវត្ថុពីអង្គការសហប្រជាជាតិ ដើម្បីអភិវឌ្ឍន៍ឧស្សាហកម្ម (UNIDO)នៅកម្ពុជា។

ការដាក់ឱ្យដំណើរការកម្មវិធីនេះជាផ្នែកមួយនៃគម្រោង «ការងារ និងមុខរបរសមរម្យសម្រាប់យុវជន» ដំណាក់កាលទី៣ (DEY III) ដែលជាកម្មវិធីរួមរបស់អង្គការសហប្រជាជាតិ អនុវត្តដោយអង្គការ ILO, UNIDO, UNESCO, និង UNICEF ក្រោមជំនួយពីទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការ (SDC)។

តាមរយៈគម្រោងនេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ រួមជាមួយអង្គការ UNIDO នឹងសហការអនុវត្តសកម្មភាពជាច្រើន ដើម្បីពង្រឹងសមត្ថភាពសហគ្រាស និងសមាគមធុរកិច្ច ឱ្យបង្កើនផលិតភាព និងសមត្ថភាពប្រកួតប្រជែងលើទីផ្សារ រួមចំណែកជំរុញកំណើនសេដ្ឋកិច្ចជាតិ និងផ្ដល់ការងារសមរម្យដល់យុវជន។

ឯកឧត្តម ហេង សុខគង់ រដ្ឋលេខាធិការក្រសួង​ឧស្សហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ បានលើកឡើងថា៖

«គម្រោងនេះដើរតួនាទីយ៉ាងសំខាន់ក្នុងការជំរុញ និងពង្រឹងសមត្ថភាពកម្មករ-បុគ្គលិក រោងចក្រ សហគ្រាស និងសិប្បកម្ម ជាពិសេស ផ្តោតទៅលើវិស័យកសិ-ឧស្សាហកម្ម»។

ឯកឧត្តមរដ្ឋលេខាធិការ បានបន្តថា៖ ក្រសួងបាន និងកំពុងយកចិត្តទុកដាក់លើការលើកកម្ពស់សហគ្រិនភាព និងការអភិវឌ្ឍសហគ្រាសធុនតូច និងមធ្យម ដឹកនាំសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ ក្នុងការបង្កើតការងារសមរម្យ និងតម្រង់ទិស រួមជាមួយការកែសម្រួលក្របខ័ណ្ឌគតិយុត្តិ និងបទបញ្ញត្តិពាក់ព័ន្ធដើម្បីរួមចំណែកត្រៀមក្នុងដំណើរចាកចេញពីឋានៈជាប្រទេសមានការអភិវឌ្ឍតិចតួចនៅចុងឆ្នាំ២០២៩ដោយជោគជ័យ។

តាមលទ្ធផល​នៃការវាយតម្លៃរហ័សអំពីតម្រូវការធ្វើឡើងរបស់អង្គការ UNIDO សហគ្រាសធុនតូច និងមធ្យមនៅកម្ពុជា កំពុង​ប្រឈម​នឹងឧបសគ្គមួយចំនួន​ដូច​ជា ​កង្វះលទ្ធភាពទទួល​​ហិរញ្ញប្បទាន ​ប្រាក់​កម្ចី និងទុន​បង្វិល កង្វះចំណេះដឹងបច្ចេក​ទេសដូចជាទាក់ទងនឹងសុវត្ថិភាពម្ហូបអាហារ និងប្រសិទ្ធភាពធនធាន លទ្ធភាពតភ្ជាប់ និង​ជ្រៀតចូលទីផ្សារតិចតួច និងកង្វះបុគ្គលិ​កជំនាញ សមត្ថភាពគ្រប់គ្រងដំណើរការអាជីវកម្ម និងវត្ថុធាតុដើម​ដែល​មាន​គុណភាពជាដើម។

លោក សុខ ណារិន តំណាងប្រចាំប្រទេសអង្គការ UNIDO បានបញ្ជាក់អំពីសារៈសំខាន់នៃការកសាងសមត្ថភាព សហគ្រាសធុនតូច និងមធ្យម​។

លោកបានលើកឡើងថា៖

«គំនិតផ្តួច​ផ្តើម​នេះនឹងផ្លាស់ប្តូរ SMEs ធ្វើឱ្យពួកគេមានសមត្ថភាពប្រកួតប្រជែងខ្លាំងជាងមុន និងមានការរីកចម្រើនខ្ពស់»។

លោកបានបន្តទៀតថា តាមរយៈកម្មវិធីនេះ វានឹងជួយ​បង្កើតការងារ បំផុសគំនិតដល់អ្នកដទៃ និងពង្រឹង​ខ្សែច្រវាក់ផ្គត់ផ្គង់ ដែលនាំឱ្យសេដ្ឋកិច្ចក្នុងស្រុកមានភាពធន់ រឹងមាំ។ ជាមួយគ្នានេះ តាមរយៈការផ្តល់ដល់ SMEs នូវចំណេះដឹង​សំខាន់ៗទាំង​នេះ គំនិត​ផ្តួច​ផ្តើម​នេះមានគោលដៅចូលរួមក្នុងការធ្វើទំនើបកម្មឧស្សាហកម្មនិងការអភិវឌ្ឍសេដ្ឋកិច្ច​ប្រកប​ដោយ​បរិយាប័ន្ននៅកម្ពុជា៕