សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ចាប់តាំងពីបង្កើតរាជរដ្ឋាភិបាលថ្មី អាណត្តិទី៧នៃរដ្ឋសភា ក្រសួងរៀបចំដែនដី នគរូបនីយកម្ម និងសំណង់ បានទទួលសំណើសុំអន្តរាគមន៍ពាក់ព័ន្ធទៅនឹងគម្រោងអភិវឌ្ឍន៍អចលនទ្រព្យដែលមានបញ្ហា និងវិវាទដីធ្លី ដែលបានបន្សល់ទុកតាំងពីអាណត្តិមុនៗ ។ ជាលទ្ធផល ក្នុងរយៈពេលប្រមាណ១៦ខែកន្លងទៅនេះ ក្រសួងរៀបចំដែនដី បានដោះស្រាយសំណុំរឿងនេះបានជាច្រើនករណី និងនៅបន្តដោះស្រាយបញ្ហាដែលនៅសេសសល់ ដើម្បីឈានទៅរកការបញ្ចប់ទំនាស់ និងវិវាទទាំងស្រុងនាពេលឆាប់ៗខាងមុខនេះ។
យោងតាមរបាយការណ៍បូកសរុបរបស់ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ក្នុងឆ្នាំ២០២៤ ក្រសួងបានទទួលសំណើសុំអន្តរាគមន៍ដោះស្រាយបញ្ហាលក់-ទិញ សំណង់លំនៅឋានក្នុងគម្រោងបុរី បណ្តុំផ្ទះល្វែង ស្តង់លក់ក្នុងផ្សារ គម្រោងដីឡូត៍ ចំណែកឯកជនក្នុងគម្រោងខុនដូ សរុបចំនួន ៥២ទីតាំង ស្មើនឹង១០៦គម្រោង ហើយបានដោះស្រាយរួចរាល់ចំនួន៥៣គម្រោង និងនៅសេសសល់ចំនួន៥៣គម្រោងទៀត បាន និងកំពុងបន្តនីតិវិធីដោះស្រាយក្រៅប្រព័ន្ធតុលាការ ។
តាមរបាយការណ៍ដដែលបានបង្ហាញឱ្យឃើញថា គម្រោងអភិវឌ្ឍន៍លំនៅឋានជាបុរីបានដាក់ស្នើសុំអន្តរាគមន៍ច្រើនជាងគេ ដែលមានរហូតដល់៨១គម្រោង ហើយក្រសួងក៏បានដោះស្រាយអស់ចំនួន៤៤គម្រោង នៅសល់ចំនួន ៣៧គម្រោងទៀតកំពុងបន្តដោះស្រាយ ។ ចំណែកអភិវឌ្ឍន៍ដីឡូត៍ក៏ឃើញថាមានចំនួនច្រើនដែរ រហូតដល់២០គម្រោង ហើយក្រសួងរៀបចំដែនដី នគរូបនីយកម្ម និងសំណង់ បានដោះស្រាយអស់ចំនួន៧គម្រោង និងកំពុងបន្តដោះស្រាយចំនួន១៣គម្រោងទៀតនៅឆ្នាំ២០២៥ខាងមុខនេះ ។ ចំណែកគម្រោងអភិវឌ្ឍន៍ផ្សារមានចំនួន២គម្រោង ហើយក្រសួងបានដោះស្រាយរួចរាល់ទាំង២គម្រោងតែម្ដង ។ ដោយឡែកគម្រោងខុនដូ ដែលបានស្នើសុំអន្តរាគមន៍ឱ្យក្រសួងជួយដោះស្រាយមានចំនួន៣គម្រោង នៅមិនទាន់ដោះស្រាយបាននៅឡើយ ។
ជាមួយគ្នានេះ បើក្រលេកទៅមើលវិវាទដីធ្លីដែលក្រុមការងារក្រសួងរៀបចំដែនដី នគរូបនីយកម្ម និងសំណង់ បានទួលបណ្ដឹង និងដោះស្រាយ ២ ០១២ករណី ដោយក្នុងនោះក្រសួងបានដោះស្រាយរួចរាល់ចំនួន ១ ៩៨១ករណី និងនៅសេសសល់ប៉ុន្មានកំពុងដោះស្រាយបន្តដើម្បីឈានទៅបញ្ចប់ទាំងស្រុងនាពេលខាងមុខនេះ។
គួរកត់សម្គាល់ថា ក្នុងឆ្នាំ ២០២៤នេះ យន្តការដោះស្រាយវិវាទដីធ្លី ទាំងយន្តការគណៈកម្មការសុរិយោដី យន្តការដោះស្រាយវិវាទដីធ្លីដោយក្រុមការងារក្រសួង និងអាជ្ញាធរជាតិដោះស្រាយទំនាស់ដីធ្លី ទទួលបានបណ្ដឹងសរុបចំនួន ៩២៧ករណី ដោះស្រាយបញ្ចប់នីតិវិធីបានសរុបចំនួន ២ ១២១ករណី (រាប់ទាំងករណីដែលសេសសល់ពីអាណត្តិមុនៗ) ។
ជាក់ស្ដែងថ្មីៗនេះ ក្រសួងរៀបចំដែនដី នគរូបនីយកម្ម និងសំណង់ ទើបសម្រេចបាននូវការដោះស្រាយបញ្ហាប្រឈមសម្រាប់គម្រោងអភិវឌ្ឍន៍របស់បុរី ឡេង ណាវ៉ាត្រា ផ្លូវជាតិលេខ6A ក្នុងជំហានបន្ទាប់ ដោយក្រសួងបានប្រកាសអញ្ជើញអតិថិជនក្នុងគម្រោងផ្លូវជាតិលេខ6A មកបំពេញបែបបទ និងនីតិវិធីក្នុងការផ្ទេរបណ្ណកម្មសិទ្ធិ (សម្រាប់អតិថិជនដែលបានបង់ប្រាក់គ្រប់ចំនួន១០០ភាគរយ) ។ ក្រៅពីបុរីមួយនេះ ក្រសួងក៏ធ្លាប់បានដោះស្រាយ និងបញ្ចប់ករណីវិវាទរវាងប្រជាពលរដ្ឋដែលជាអតិថិជន ជាមួយនឹងគម្រោងអភិវឌ្ឍផ្សេងទៀតផងដែរ ដូចជាគម្រោងបុរី VIP , កម្រោងបុរី វន ដានី , គម្រោងបុរី ណាឌី, និងគម្រោងបុរីផ្សេងៗមួយចំនួនទៀត។
សូមរំលឹកដែរថា ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែន ដីនគរូបនីយកម្ម និងសំណង់ តែងបានថ្លែងជារឿងៗថា ចក្ខុវិស័យរបស់ក្រសួងរៀបចំដែនដី នគរូបនីយកម្ម និងសំណង់ គឺបញ្ចប់វិវាទទាំងអស់ពាក់ព័ន្ធនឹងដីធ្លី ដោយមិនចង់ឱ្យពលរដ្ឋកម្ពុជា មានការទាស់ទែងគ្នារឿងដីធ្លីទៀតនោះទេ ។ ដោយឡែក បញ្ហាអភិវឌ្ឍន៍លំនៅឋាន ក្រសួងក៏បានព្យាយាមដោះស្រាយជាបន្តបន្ទាប់ និងឈានដល់ការដោះស្រាយបញ្ចប់ទាំងស្រុង ជាពិសេសគម្រោងអភិវឌ្ឍ និងទិញ-លក់លំនៅឋាននៅក្នុងបុរី ។
ឯកឧត្តមឧបនាយករដ្ឋមន្ត្រីបានបញ្ជាក់ថា ការអភិវឌ្ឍលំនៅឋានដោយមិនបានសិក្សាពីទីផ្សារច្បាស់នាំឱ្យលើសតម្រូវការ ហើយនៅពេលសេដ្ឋកិច្ចមានបញ្ហាទើបធ្វើឱ្យគម្រោងអភិវឌ្ឍន៍មួយចំនួនត្រូវជួបប្រទះនឹងបញ្ហាតែម្ដង ៕
Account
Security
Favourite Content