សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រដ្ឋាភិបាលនៃព្រះរាជាណាចក្រកម្ពុជាបានសាងសង់ស្ពានឆ្លងទន្លេជាបន្តបន្ទាប់ដើម្បីជួយសម្រួលដល់ការធ្វើដំណើររបស់ប្រជាពលរដ្ឋដោយក្នុងនោះដែរ ស្ពានឆ្លងទន្លេធំៗចំនួន៣ កំពុងស្ថិតនៅក្នុងដំណាក់កាលសាងសង់ និងគិតជាតម្លៃសរុបមានទំហំប្រមាណជិត៤០០លានដុល្លារអាមេរិក ។
គម្រោងស្ពានឆ្លងទន្លេទាំង៣ដែលកំពុងសាងសង់នាពេលបច្ចុប្បន្ននេះ រួមមានស្ពានឆ្លងទន្លេពីផ្លូវជាតិលេខ១ ទៅល្វាឯម ក្នុងគម្រោងផ្លូវល្បឿនលឿនភ្នំពេញ-បាវិត ។ ស្ពានមួយនេះគ្រោងចំណាយទឹកប្រាក់សាងសង់ប្រមាណជាង២០០លានដុល្លារអាមេរិកដែលជាថវិការបស់រដ្ឋ ដើម្បីសម្រួលដល់ពលរដ្ឋក្នុងតំបន់ល្វាឯម ចេញចូលផ្លូវជាតិលេខ១ ។ ដំបូងឡើយគម្រោងនេះ ត្រូវបានក្រុមហ៊ុនសាងសង់ផ្លូវល្បឿនលឿនជាអ្នកសាងសង់ ហើយនឹងត្រូវយកលុយថ្លៃឆ្លងកាត់ពីប្រជាពលរដ្ឋ ប៉ុន្តែក្រោយមករាជរដ្ឋាភិបាលបានសម្រេចចេញលុយសាងសង់ទាំងស្រុងលើគម្រោងស្ពាននេះ ដោយឱ្យពលរដ្ឋឆ្លងកាត់មិនចាំបាច់អស់លុយ ។
គម្រោងស្ពានឆ្លងទន្លេមួយទៀត គឺស្ពានឆ្លងទន្លេព្រែកប្រសព្វក្នុងខេត្តក្រចេះ ជាគម្រោងមួយដែលមានសារសំខាន់សម្រាប់ពលរដ្ឋឆ្លងកាត់ទន្លេដោយលែងប្រើសាឡាងសម្រាប់ឆ្លងកាត់បន្តទៀតហើយ។ ស្ពាននេះ គ្រោងចំណាយថវិកាប្រមាណជាង១១១លានដុល្លារអាមេរិក និងកំពុងស្ថិតនៅក្នុងដំណាក់កាលសាងសង់ដូចនឹងស្ពានឆ្លងទន្លេភ្ជាប់ពីផ្លូវជាតិលេខ១ ទៅល្វាឯមដូចគ្នាដែរ ។
ស្ពានដែលមានសារសំខាន់មួយទៀត គឺស្ពានឆ្លងទន្លេបាសាក់ ព្រែកប្រា-ចាក់អង្រែក្រោមដែលទើបតែបើកការដ្ឋានសាងសង់កាលពីពេលថ្មីៗ ក្រោមអធិបតីភាព សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាណាចក្រកម្ពុជា ។ ស្ពាននេះដែរត្រូវបានគ្រោងចំណាយថវិកាប្រមាណ៦០លានដុល្លារអាមេរិក ហើយវាក៏ជាស្ពានដ៏មានសារសំខាន់ក្នុងការតភ្ជាប់រវាងតំបន់ព្រែកប្រា, ច្បារអំពៅទៅកាន់តំបន់ចាក់អង្រែក្រោម និងតំបន់ផ្លូវ៦០ម៉ែត្រ ។
សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាណាចក្រកម្ពុជាបានមានប្រសាសន៍កាលពីពេលថ្មីៗនេះថា រាជរដ្ឋាភិបាលមិនបញ្ឈប់ការសាងសង់ស្ពានឆ្លងទន្លេត្រឹមនេះទេ ពោលគឺរដ្ឋាភិបាលនឹងបន្តសាងសង់ស្ពានជាច្រើនកន្លែងទៀត ដើម្បីសម្រួលដល់ការធ្វើដំណើររបស់ពលរដ្ឋ ជាពិសេសគឺបង្រួមពេលវេលាក្នុងការធ្វើដំណើររបស់ប្រជាពលរដ្ឋឱ្យកាន់តែខ្លី ចំណេញថវិកា និងអាចជួយជំរុញសេដ្ឋកិច្ចគ្រួសារ និងសង្គមជាតិ។
គួរបញ្ជាក់ថា នៅពេលឆាប់ៗនេះដែរ ស្ពានឆ្លងទន្លេមួយទៀត ពីភ្នំពេញ ទៅក្រុងអរិយក្សត្រ ខេត្តកណ្ដាល ក៏នឹងត្រូវបើកការដ្ឋានសាងសង់ផងដែរ ខណៈគម្រោងនេះ បានបញ្ចប់ការសិក្សា និងចុះហត្ថលេខាជាមួយប្រទេសជាដៃគូរួចហើយដែរគឺប្រទេសកូរ៉េខាងត្បូង ហើយវាក៏ជាស្ពានមួយមានសារសំខាន់ខ្លាំងណាស់ក្នុងតភ្ជាប់ពលរដ្ឋក្រុងអរិយក្សត្រ និងរាជធានីភ្នំពេញស្របនឹងបច្ចុប្បន្ន ពលរដ្ឋនៃតំបន់ទាំងពីរប្រើមធ្យោបាយដោយឆ្លងសាឡាងទៅវិញទៅមក ៕
Account
Security
Favourite Content