ភ្នំពេញ ៖ កន្លងមក​គេបានសង្កេតឃើញថា និយ័ត​ករអាជីវកម្ម​អចលនវត្ថុ និងបញ្ចាំ​បានចេញសេចក្ដី​ប្រកា​ស ព្រមទាំងបានបង្ហាញឈ្មោះគម្រោងអភិវឌ្ឍន៍អចលនទ្រព្យមួយចំនួនដែល​ធ្វើ​អាជីវកម្ម​មិនមានអាជ្ញា​បណ្ណពី​និយ័ត​ករ ហើយក៏បានអំពាវនាវ​ឱ្យ​ពលរដ្ឋ​បង្កើនការ​ប្រុងប្រយ័ត្ន​ខ្ពស់ចំពោះការទិញអចលនទ្រព្យ​ពីគម្រោង​ដែលមិន​មា​ន​អាជ្ញាបណ្ណទាំងនោះ ។ ការអភិវឌ្ឍ​អ​​​​ចលនទ្រព្យ​ដោយមិនមានអាជ្ញា​បណ្ណ​បែបនេះ ជាលទ្ធផលចុងក្រោយសម្រាប់អ្នកដែលរង​គ្រោះ​គឺអ្នក​ទិញ ជា​ប្រជាពលរដ្ឋ​ផ្ទាល់​តែម្ដង។​

​អ្នកឧកញ៉ា​ សំ សុខនឿន ប្រធានសមាគមអចលនទ្រព្យសកល និងជាអគ្គ​នាយកក្រុមហ៊ុន​ KW Sam SN Realty បានមានប្រសាសន៍​ប្រាប់ AMS Economy តាម​រយៈសារ​អេឡិច​ត្រូនិក​ឱ្យ​ដឹង​ថា​ នៅរយៈ​ពេល​កន្លងទៅ​នេះ គេសង្កេតឃើញថា​ មានក្រុមហ៊ុន​មួយចំនួនបានប្រក​បអាជីវកម្ម និងធ្វើសកម្មភាព​អភិវឌ្ឍន៍​អច​ល​នទ្រព្យ​ដោយមិនមានអាជ្ញាបណ្ណ ដូចជា​ក្រុម​ហ៊ុន​ពុះដីឡូត៍ ក្រុមហ៊ុនភ្នាក់ងារអចលនទ្រព្យ និងក្រុមហ៊ុន​អភិ​វឌ្ឍ​ន៍​​លំនៅឋានមួយចំនួនទៀត ​។

អ្នកឧកញ៉ា​បានបញ្ជាក់ថា ៖

«តាមរយៈ​សកម្មភាព​របស់​ក្រុមហ៊ុនទាំងអស់នេះ គឺបាន​រំលោភបំពានលើច្បាប់​នៃការ​ធ្វើ​អាជីវកម្ម​អចលនទ្រព្យក្នុង​ប្រទេស​កម្ពុជា​យើង​ ​ដែល​នឹង​ធ្វើឱ្យ​ប៉ះពាល់ដល់​អតិថិជន​ដែលជាអ្នកទិញ​អចល​នទ្រព្យ​ ជាក់ស្ដែង​កន្លងមកនេះ ឃើញថាអ្នកទិញអចលនទ្រព្យ​មួយចំនួន​បានទិញផ្ទះ តែមិនបានផ្ទះ ទិញ​ដី​បង់​​លុយហើយ មិនដឹង​ដីនៅឯណា និង​អាច​ប្រឈម​នឹង​ការ​ចាញ់​បោក​អស់​លុយអស់​កាក់​ទៀតផង»។

អ្នកឧកញ៉ា​បាន​បន្ថែមឱ្យដឹងថា ក្រៅពីក្រុមហ៊ុនអភិវឌ្ឍន៍​អចលនទ្រព្យ​នេះដែរ ក៏មានក្រុមហ៊ុន​ភ្នាក់ងារអចលន​​​អ​ច​​លនទ្រព្យ​ ជាច្រើនទៀត បានធ្វើសកម្មភាពដោយមិនមានអាជ្ញា​បណ្ណ​ពី​និយ័ត​ករ​អាជីវកម្ម​អចលនវត្ថុ​ និង​បញ្ចាំ​ ដែល​ការ​ធ្វើអាជីវកម្ម​បែបនេះធ្វើឱ្យ​បាត់ចំណូល​រដ្ឋតាមរយៈការ​មិនបង់ពន្ធជូនរដ្ឋ​ត្រឹមត្រូវ និង​បង្កជា​ហានិភ័យ​សម្រាប់​អ្នក​ប្រើ​ប្រាស់​សេវា​អ​ច​លនទ្រព្យ​របស់ក្រុមហ៊ុន​ដែលមិនមានអាជ្ញា​បណ្ណ​​ ។

អ្នកឧកញ៉ា​ សំ សុខនឿន បានបញ្ជាក់ថា ៖

«ការ​ធ្វើអាជីវកម្ម​មិនមានអាជ្ញា​បណ្ណនេះដែរ ក៏បានធ្វើឱ្យប៉ះពាល់ដល់​វិស័យ​អចលនទ្រព្យ​ទាំង​មូល ប៉ះពាល់​ដល់​អ្នកប្រកបរបរដែលមានអាជ្ញា​បណ្ណ​​មានច្បាប់មានទម្លាប់​ត្រឹមត្រូវ ជាក់ស្ដែង​ក្រុមហ៊ុនទិញ-លក់អចលនទ្រព្យ​ដែលមិនមាន​អាជ្ញា​បណ្ណ ហើយទៅលក់​អចលនទ្រព្យ​ឱ្យ​គម្រោង​ដែលមិនមានអាជ្ញា​បណ្ណ​ ដោយ​ប្រមូល​លុយ​ពីពលរដ្ឋ​ពីអតិថិជនជាច្រើន​រួចអស់ហើយ ចុងក្រោយ​គម្រោង​អត់ចេញជា​រូបរាង លុយក៏​យកទៅបាត់ ហើយ​ក្រុមហ៊ុនទាំងនោះក៏បិទទ្វារ​ចោល និងមិនដឹងថា​ទៅរក​នៅ​ឯណា បើប្ដឹងឱ្យ​និយ័តករ​ជួយរក​ក៏ពិបាក ព្រោះតែក្រុមហ៊ុនមិនមានក្នុង​បញ្ជី​របស់​និយ័ត​ករ​អាជីវកម្ម​អច​ល​នវត្ថុ​​ និង​បញ្ចាំ»​។

លោកឧកញ៉ាង ​ចេង ខេង​ អគ្គ​នាយក​ក្រុមហ៊ុនអចលនទ្រព្យ ​ស៊ីភីអិល ក៏បានមានប្រសាសន៍ផងដែរថា ការ​ធ្វើអាជីវកម្ម​ក្នុងនាមជា​ក្រុមហ៊ុនភ្នាក់ងារអចលនវត្ថុ​ ដោយមិនមានអាជ្ញា​បណ្ណ​មិន​មាន​ច្បាប់​ត្រឹមត្រូវ មិនត្រឹមតែ​ប៉ះ​ពា​ល់ក្នុ​ងស្រុ​កទេ តែក៏ធ្វើឱ្យប៉ះពាល់​ការ​វិនិយោគ​អចលនទ្រព្យ​ពីសំណាក់​វិនិយោគិនមកពីក្រៅ​ប្រទេស​ផងដែរ ។ នៅ​ពេល​ណា​ក្រុមហ៊ុ​ន​ដែល​ធ្វើ​អាជីវកម្ម​អត់ច្បាប់ ហើយចេះតែផ្ដល់សេវាទៅ​វិនិយោគិនមកពីក្រៅ​ប្រទេស​​ដោយមិនមានជំនាញ​ច្បាស់ លុះនៅពេល​មានបញ្ហា​ ក្រុមហ៊ុននោះរត់ទៅបាត់ អ្នកវិនិយោគ​បរទេស​ក៏មិនដឹងថា​នឹង​រត់ទៅរក​អ្នក​ណាឱ្យជួយដោះស្រាយដែរ ។​

លោកឧកញ៉ា​បញ្ជាក់ថា​ ​៖

«ដើម្បីទាក់ទាញ ​និងត្រៀមខ្លួន​ក្នុងការទទួលវិនិយោគិន​បរទេស​ដែល​នឹង​ចូលមក​កម្ពុជា​​នៅ​ពេ​លអ​​នាគ​ត​ឆាប់ៗនេះ ក្រុមហ៊ុនអចលនវត្ថុ និងភ្នាក់​ងារ​អច​ល​​ន​វត្ថុ​ទាំងអស់​ ត្រូវ​ស្វែងរកភាព​ស្រប​ច្បាប់​ និង​ត្រូវ​មានចំណេះជំនាញខាងវិស័យ​អចលនទ្រព្យ​ ដើម្បីផ្ដល់​សេវាកម្ម​អចលនវត្ថុ​ដល់​វិ​និ​យោ​គិន​​​ប​រទេស​ ក៏ដូចជាក្នុង​ស្រុក​ប្រកបដោយ​គុណ​ភាព»។​

បើតាមលោក​ សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បាន​បញ្ជាក់កាលពីពេលថ្មីៗនេះថា ក្នុង​រយៈប៉ុន្មានខែ​កន្លងមកនេះ គ្រាន់តែក្រុមការងារ​បាន​ស្រាវជ្រាវ​រកឃើញថា​មាន​ក្រុម​ហ៊ុន និងអ្នក​ប្រកបរបរ​​ផ្ដល់សេវា​ក្នុងវិស័យ​អចលនទ្រព្យ​ប្រមាណជាង ​២០០​ក្រុមទៅហើយដែលមិនមានអាជ្ញា​បណ្ណ ហើយក៏បានរាយការណ៍​ទៅនិយ័ត​ករ​ដើម្បីឱ្យនិយ័តករ​អាជីវកម្ម​អចលនវត្ថុ​ និង​បញ្ចាំ​​​ណែនាំ​ដល់ពួកគេពីផលប៉ះពាល់ ជាពិសេសភាពប្រឈមជាមួយនឹងច្បាប់តែម្ដង៕